ଶରଦ ପାୱାରଙ୍କ ଇସ୍ତଫା : ରହସ୍ୟ ଓ ରାଜନୀତି

ଏକ ନାଟକୀୟ ଘଟଣାକ୍ରମରେ ନିଜ ଆତ୍ମଜୀବନୀ ପୁସ୍ତକ ଉନ୍ମୋଚନ କରିବାକୁ ଯାଇ ଏନସିପି ଦଳର ଜାତୀୟ ସଭାପତି ଶରଦ ପାୱାର ଘୋଷଣା କଲେ ଯେ, ସେ ତାଙ୍କ ଦଳର ଜାତୀୟ ସଭାପତି ପଦରୁ ଇସ୍ତଫା ଦେଉଛନ୍ତି । ପାୱାରଙ୍କ ଇସ୍ତଫା ଘୋଷଣା ମହାରାଷ୍ଟ୍ର ରାଜନୀତିରେ ହଠାତ ଭୂକମ୍ପ ସୃଷ୍ଟି କରିଛି । କେବଳ ମହାରାଷ୍ଟ୍ର ନୁହେଁ, ଶରଦ ପାୱାରଙ୍କ ରାଜନୈତିକ ନିଷ୍ପତ୍ତି ଆଗାମୀ ଦିନରେ ଭାରତୀୟ ରାଜନୀତିର ଗତିପଥକୁ ମଧ୍ୟ ନିର୍ଣ୍ଣୟ କରିବ ।

ଏବେ ମହାରାଷ୍ଟ୍ରର ଏକନାଥ ସିନ୍ଧେ ସରକାର ସୂତା ଖିଅକରେ  ଝୁଲୁଛି । ସୁପ୍ରିମ କୋର୍ଟରେ ମହାରାଷ୍ଟ୍ର ମାମଲାର ଶୁଣାଣୀ ସରିଛି ଓ ଏହାର ରାୟ କୌଣସି ବି ଦିନ ପ୍ରକାଶ ପାଇବ । ସୁପ୍ରିମ କୋର୍ଟ ଯଦି ସିନ୍ଧେ ସରକାରକୁ ବେଆଇନ ଘୋଷଣା କରନ୍ତି ତା ହେଲେ ସେଠାରେ ସାମ୍ବିଧାନିକ ସଙ୍କଟ ସୃଷ୍ଟି ହେବ ଓ ରାଷ୍ଟ୍ରପତି ଶାସନ ଜାରି ହୋଇ ସେଠାରେ ନିର୍ବାଚନ ଅନୁଷ୍ଠିତ ହେବ। ବିଜେପି ଆଦୌ ଏବେ ମହାରାଷ୍ଟ୍ରରେ ନିର୍ବାଚନକୁ ଯିବା ପାଇଁ ଚାହୁଁ ନାଇଁ । ସରକାର ବଞ୍ଚାଇବାକୁ ଏବେ ବିଜେପି ଏନସିପିର ଅଜିତ ପାୱାରଙ୍କ ଶରଣାପନ୍ନ ହୋଇଛି । ଗତ କିଛି ଦିନ ହେଲାଣି ଅଜିତ ପାୱାରଙ୍କ ନେତୃତ୍ଵରେ ମହାରାଷ୍ଟ୍ର ସରକାର ଗଢିବାକୁ ବିଜେପି ପ୍ରାଣାମୂର୍ଚ୍ଛା ଉଦ୍ୟମ ଚଳାଇଛି । ଶରଦ ପାୱାରଙ୍କ ଆଶୀର୍ବାଦ ବିନା ସେକଥା ସମ୍ଭବ ନୁହେଁ । ଅଜିତ ପାୱାର ଏହା ପୂର୍ବରୁ ଶରଦ ପାୱାରଙ୍କ ବିରୋଧରେ ଯାଇ ବିଜେପି ସହିତ ସରକାରରେ ସାମିଲ ହେବାର ଯେଉଁ ଉଦ୍ୟମ କରିଥିଲେ, ତାହା ତାଙ୍କୁ ଭାଣ୍ଡିଆ କରିଥିଲା । ଏବେ ପୁଣିଥରେ ସମାନ ସ୍ଥିତିରେ ରହିବାକୁ ଅଜିତ ପାୱାର ଚାହୁଁ ନାହାନ୍ତି ।  

ଶରଦ ପାୱାର ଭଲ ଭାବରେ ଜାଣନ୍ତି ଯେ ବିଜେପି ସହିତ ମିଶିବାର ଅର୍ଥ ହେଉଛି, ଶିବସେନାର ଦଶା ଭୋଗିବା । ଶିବସେନାକୁ ଭାଙ୍ଗି ସାରିଲା ପରେ ଏବେ ବିଜେପି ଏନସିପିକୁ ଭାଙ୍ଗିବାକୁ ଚାହୁଁଛି ।ଏନସିପି ଭାଙ୍ଗିଲେ ଶରଦ ପାୱାରଙ୍କ ଘର ମଧ୍ୟ ଭାଙ୍ଗିବ । ଅଜିତ ପାୱାର ମୁଖ୍ୟମନ୍ତ୍ରୀ ହେବା ଲାଗି ଏକପ୍ରକାର ମନ ସ୍ଥିର କରି ବସିଛନ୍ତି, ହେଲେ ଶରଦ ପାୱାରଙ୍କୁ ଛାଡି ତାଙ୍କ ସହିତ ଏନସିପିର କେତେ ବିଧାୟକ ଯିବେ, ତାହା ଏବେ ସବୁଠୁ ବଡ ପ୍ରଶ୍ନବାଚୀ । ଶରଦ ପାୱାର ବୟସ୍କ ହେଲେ ମଧ୍ୟ ରାଜନୀତିରେ ଆଜି ମଧ୍ୟ ତାଙ୍କର ପ୍ରବଳ ପ୍ରଭାବ ରହିଛି । ତାଙ୍କୁ ମାତ ଦେଇ ଅଜିତ କ୍ଷମତା ହାତେଇବା ସହଜ କଥା ନୁହେଁ ।

ଶରଦ ପାୱାର ହଠାତ ନିଜର ଇସ୍ତଫା ଘୋଷଣା କରି ନିଜ ଦଳ ଭିତରେ ରହିଥିବା କ୍ଷମତା ଲଢେଇକୁ ନିୟନ୍ତ୍ରଣ କରିବାର ଉଦ୍ୟମ କରୁଛନ୍ତି । ନିଜ ଦଳକୁ ବଞ୍ଚାଇବାକୁ ହେଲେ ଦଳ ଭିତରେ ସବୁ ଗୋଷ୍ଠୀଙ୍କୁ ଏକାଠି ରଖିବାକୁ ହେବ- ଏକଥା ଶରଦ ପାୱାରଜାଣନ୍ତି । ତେଣୁ ସେ ଅଜିତଙ୍କୁ ହଠାତ ବିଜେପିରେ ସାମିଲ ହେବାକୁ ଦେଉନାହାନ୍ତି । ଅଜିତ ବିଜେପିରେ ମିଶିବାକୁ ଯେତେ ବିକଳ ହେଉଛନ୍ତି, ଶରଦ ପାୱାର ସେତେ ଅଧିକ ତାଙ୍କୁ ଅସୁବିଧାରେ ପକାଇ ଚାଲିଛନ୍ତି ।

ନାଟକୀୟ ଭାବରେ ନିଜର ଇସ୍ତଫା ଘୋଷଣା କରି ଶରଦ ପାୱାର ନିଜ ପୁତୁରା ଅଜିତ ପାୱାରଙ୍କୁ ଏକ ପ୍ରକାର ଜଣାଇ ଦେବାକୁ ଚାହାନ୍ତି ଯେ, ଦଳର ନେତୃତ୍ଵ ଏବେ ବି ତାଙ୍କ ହାତରେ ରହିଛି । ଅଜିତ ପାୱାର ଏ ପ୍ରସଙ୍ଗରେ ବଡ ଅକାଳିଆ ସ୍ଥିତିରେ ଅଛନ୍ତି । ସେ ବିଜେପିକୁ ଡେଇଁ ମୁଖ୍ୟମନ୍ତ୍ରୀ ହେବାକୁ ପାଗ ଭିଡୁଥିବା ବେଳେ ଶରଦ ପାୱାର ସେହି ରାସ୍ତାରେ କଣ୍ଟା ବିଛାଇ ଚାଲିଛନ୍ତି ।