ସୌମ୍ୟ ବାବୁଙ୍କୁ ଉତ୍ତର ଦେଉ ବିଜେଡି

ନିଜ ଜନ୍ମଦିନ ଅବସରରେ “ସମ୍ବାଦ”ର ସମ୍ପାଦକ ସୌମ୍ୟରଞ୍ଜନ ପଟ୍ଟନାୟକ ନିଜ ସମ୍ବାଦପତ୍ରରେ ଏକ ଅଗ୍ରଲେଖ ଲେଖି ଏମିତି କିଛି ମତ ରଖିଛନ୍ତି, ଯାହାକି ଓଡିଶାର ରାଜନୀତିକୁ ଚଳଚଞ୍ଚଳ କରିଦେଇଛି । ସୌମ୍ୟ ବାବୁ କେବଳ ଏକ ପ୍ରତିଷ୍ଠିତ ସଂବାଦପତ୍ରର ସମ୍ପାଦକ ନୁହନ୍ତି, ସେ ରାଜ୍ୟ ଶାସକ ଦଳ ବିଜେଡ଼ିର ଜଣେ ଟାଣୁଆ ବିଧାୟକ ଓ ବରିଷ୍ଠ କର୍ମକର୍ତ୍ତା ମଧ୍ୟ । ଆଜି ସେ ଯେଉଁ ମତ ରଖିଛନ୍ତି, ତାହା ଅବଶ୍ୟ ନୂଆ ନୁହେଁ, ସେ ନିଜର ଏକ ପୁରୁଣା ମତକୁ ଆଉଥରେ ସାବ୍ୟସ୍ତ କରିବାକୁ ଚେଷ୍ଟା କରିଛନ୍ତି । ବିଜେଡି କ୍ରମଶଃ ଏକ ନିର୍ଦ୍ଦିଷ୍ଟ ଅମଲାଙ୍କ ହାତକୁ ଚାଲିଯାଉଛି ଓ ଏଥିରେ ରାଜନେତାମାନେ ଗୌଣ ହୋଇଯାଉଛନ୍ତି ବୋଲି ସୌମ୍ୟ ବାବୁ ଅଭିଯୋଗ କରୁଛନ୍ତି । ଅବଶ୍ୟ ସୌମ୍ୟ ବାବୁ ଯେତେବେଳେ ବିଜେଡିରେ ଯୋଗଦେଲେ ସେତେବେଳେ ବିଜେଡିରେ ଯେ ଅଲଗା କିଛି ପରିସ୍ଥିତି ଥିଲା ତା ନୁହେଁ । ୬ ବର୍ଷ ତଳେ ବିଜେଡିରେ ଯୋଗଦାନ କରି ସିଧା ସିଧା ରାଜ୍ୟସଭାକୁ ଯାଇଥିବା ସୌମ୍ୟରଞ୍ଜନ କୌଣସି ରାଜନେତାଙ୍କ ଜରିଆରେ ନୁହେଁ ବରଂ ମୁଖ୍ୟମନ୍ତ୍ରୀଙ୍କ କାର୍ୟାଳୟ ଜରିଆରେ ହିଁ ବିଜେଡିରେ ପ୍ରବେଶ କରିଥିଲେ । ତାଙ୍କ ରାଜ୍ୟସଭା ଓ ବିଧାନସଭା ଟିକଟ କେଉଁ ସୂତ୍ରରୁ ମିଳିଥିଲା, ସେ ପ୍ରସଙ୍ଗ ମଧ୍ୟ ଲୋକେ ଜାଣନ୍ତି ।  

ଆଜି ପର୍ଯନ୍ତ ସୌମ୍ୟବାବୁଙ୍କୁ ବିଜେଡି ପ୍ରାୟତଃ ଅଣଦେଖା କରି ଆସୁଛି ଓ ବିଭିନ୍ନ ସମୟରେ ସେ ଦଳ ଉପରେ ଆଣିଥିବା ଅଭିଯୋଗକୁ ଗୁରୁତ୍ଵ ଦେଇନାହିଁ । ସୌମ୍ୟବାବୁଙ୍କ କୌଣସି ଲେଖା ବା ବକ୍ତବ୍ୟ ପ୍ରସଙ୍ଗରେ ବିଜେଡି ନୀରବତା ଅବଲମ୍ବନ କରିଆସିଛି । ଏଇ ପ୍ରସଙ୍ଗରେ ଆଜି ବି ଯଦି ବିଜେଡି ନୀରବ ରହେ, ତା ହେଲେ ଏହା ଦଳ ପାଇଁ ବେଶ ମହଙ୍ଗା ସାବ୍ୟସ୍ତ ହେବ । ସୌମ୍ୟବାବୁ ଯେଉଁ ଦୁଇଟି ପ୍ରଶ୍ନରେ ବିଜେଡ଼ିକୁ ଘେରିଛନ୍ତି, ସେ ଦୁଇଟି ଯାକ ପ୍ରଶ୍ନ ଅତ୍ୟନ୍ତ ସାଂଘାତିକ ।

ମୁଖ୍ୟମନ୍ତ୍ରୀଙ୍କ ସଚିବ ବାବୁ ଭି କାର୍ତ୍ତିକ ପାଣ୍ଡିୟାନଙ୍କ ଜିଲା ଗସ୍ତରେ ପ୍ରାୟ ୩୦୦ କୋଟି ଟଙ୍କା ଖର୍ଚ୍ଚ ହୋଇଛି ବୋଲି ସୌମ୍ୟବାବୁ ଯେଉଁ ଅଭିଯୋଗ ଆଣିଛନ୍ତି, ତାହା ସ୍ପଷ୍ଟୀକରଣର ଆବଶ୍ୟକତା ରଖୁଛି । ଜଣେ ସରକାରୀ ଅଧିକାରୀଙ୍କ ଗସ୍ତ ପଛରେ ରାଜ୍ୟ ସରକାର ଏତେ ଟଙ୍କା ଖର୍ଚ୍ଚ କରିପାରିବେ କେମିତି ? ନିର୍ବାଚନ ପୂର୍ବରୁ ସୌମ୍ୟବାବୁଙ୍କ ଏହି ଅଭିଯୋଗ ବିଜେଡି ଭିତରେ ଥିବା ଅସନ୍ତୁଷ୍ଟମାନଙ୍କୁ ମଧ୍ୟ ବଳ ଦେବ । ବିଜେଡ଼ିର ଆଭ୍ଯନ୍ତରୀଣ ରାଜନୀତିରେ ଅମଲାତନ୍ତ୍ରର ପ୍ରଭାବ ଯେ ବହୁ ଅଧିକ, ଏକଥା ସମସ୍ତେ ଜାଣିଲେ ମଧ୍ୟ କେହି ପାଟି ଖୋଲୁନାହାନ୍ତି । ଏହି ପ୍ରସଙ୍ଗକୁ ପ୍ରାଧାନ୍ୟ ଦେଇ ସୌମ୍ୟ ବାବୁ ନବୀନ ପଟ୍ଟନାୟକଙ୍କ କ୍ଷମତାକେନ୍ଦ୍ର ଆଗରେ ଏକ ବଡ ପ୍ରଶ୍ନବାଚୀ ଲଗାଇଛନ୍ତି ।

ଦ୍ଵିତୀୟ ପ୍ରସଙ୍ଗରେ ମଣିପୁରକୁ ନେଇ ନବୀନ ପଟ୍ଟନାୟକଙ୍କର ନୀରବତା ଓ ବିଜେପିକୁ ବିଜେଡ଼ିର ନିଃସର୍ତ୍ତ ସମର୍ଥନ ପ୍ରସଙ୍ଗ ମଧ୍ୟ ସୌମ୍ୟବାବୁ ଉଠାଇଛନ୍ତି । ଏହା ରାଜ୍ୟବାସୀଙ୍କ ମନର ପ୍ରଶ୍ନ । ମହିଳା ସଶକ୍ତିକରଣ ଏବଂ ମହିଳା ନେତୃତ୍ଵକୁ ସର୍ବାଧିକ ଗୁରୁତ୍ଵ ଦେଉଛି ବୋଲି ବିଜେଡି ବାରମ୍ବାର କହୁଥିଲେ ମଧ୍ୟ ମଣିପୁର ପ୍ରସଙ୍ଗରେ ବିଜେଡି ବିଜେପି ସହିତ ଯୋଡି ହୋଇରହିବା ଏକପ୍ରକାର ଅସ୍ଵାଭାବିକ ପରିସ୍ଥିତି ସୃଷ୍ଟି କରିଛି । ବିଜେଡି ଭିତରେ ମଧ୍ୟ ଏହି ପ୍ରସଙ୍ଗକୁ ନେଇ ଚାପା ଉତ୍ତେଜନା ରହିଛି । ସୌମ୍ୟବାବୁ ଏହି ପ୍ରସଙ୍ଗରେ ବିଜେଡି ନେତୃତ୍ବକୁ ସିଧା ସିଧା ଆକ୍ରମଣ କରିଛନ୍ତି ।  

ଅନ୍ୟ ସବୁଥର ପରି ବିଜେଡି ଏଥର ମଧ୍ୟ ସୌମ୍ୟବାବୁଙ୍କ ପ୍ରଶ୍ନକୁ ଯଦି ଅଣଦେଖା କରେ, ତାହେଲେ ଏହାର ପରିଣତି ଦଳକୁ ଭୋଗିବାକୁ ପଡିବ । ପୂର୍ବରୁ ଅତି ସାଧାରଣ କଥାରେ ବିଜେଡି ପ୍ରଫୁଲ୍ଲ ଘଡେଇ ଏବଂ ଦାମୋଦର ରାଉତଙ୍କ ଭଳି ପୁରୁଖା ନେତାଙ୍କ ଉପରେ କାର୍ୟାନୁଷ୍ଠାନ ନେଇଥିବା ବେଳେ ସୌମ୍ୟବାବୁଙ୍କୁ ଦଳ ଡରିକି ରହୁଛି ବୋଲି ଏକ ପ୍ରଶ୍ନ ମଧ୍ୟ ଉଠୁଛି । ଓଡିଆ ଗଣମାଧ୍ୟମରେ ବିଜେଡି ତୁଳନାରେ ବିଜେପିର ପ୍ରଭାବ ଅଧିକ, ତେଣୁ ସୌମ୍ୟବାବୁଙ୍କ ଆକ୍ରମଣ ବିଜେଡି ଉପରେ ମିଡିଆର ଚାପକୁ ଅଧିକ ସକ୍ରିୟ କରିବ ।

ସୌମ୍ୟବାବୁଙ୍କୁ ଖଣ୍ଡପଡାରେ ତାଙ୍କର ବିରୋଧୀ ଅନୁଭବ ପଟ୍ଟନାୟକଙ୍କୁ ବାଦ ଦେଲେ ବିଜେଡ଼ିର ଅନ୍ୟ କେହି ଉତ୍ତର ଦେଇନାହାନ୍ତି । ଏ ପ୍ରସଙ୍ଗରେ ବିଜେଡି ଯେତେ ନୀରବ ରହିବ ସୌମ୍ୟଙ୍କ ଶକ୍ତି ସେତେ ବଢିବ ।