ଭିଡ଼ ହିଂସା କବଳରେ ଓଡ଼ିଶା
କେଦାର ମିଶ୍ର
ଓଡ଼ିଶାର ସମାଜ ଓ ରାଜନୀତିରେ ଏକ ନୂଆ ଆତଙ୍କ ଜନ୍ମ ନେଇଛି — ଭିଡ଼ ହିଂସା ବା ମବ ଲିଞ୍ଚିଙ୍ଗ । ଏକଦା ଶାନ୍ତି ଓ ସୌହାର୍ଦ୍ଦ୍ୟ ପାଇଁ ପରିଚିତ ଆମ ରାଜ୍ୟରେ ଏବେ ରାସ୍ତାରେ ଖୋଲାଖୋଲି ମାଡ଼ ଓ ହତ୍ୟା ଏକ ସାଧାରଣ ଦୃଶ୍ୟ ପାଲଟିଛି। ବିଶେଷକରି ଭାରତୀୟ ଜନତା ପାର୍ଟି (ବିଜେପି) ସରକାର ଗଢ଼ିବା ପରେ ଆଇନ ଶୃଙ୍ଖଳା ପରିସ୍ଥିତି ଯେମିତି ଏକ ଅନିୟନ୍ତ୍ରିତ ମୋଡରେ ପହଞ୍ଚିଛି । ଗତ ୧୮ ମଇ ୨୦୨୬ ଦିନ ବ୍ରହ୍ମପୁର ସହରର ଗିରି ରୋଡ଼ରେ ଯାହା ଘଟିଲା ତାହା ପ୍ରତ୍ୟେକ ଓଡ଼ିଆଙ୍କ ମନରେ ଆତଙ୍କ ସୃଷ୍ଟି କରିଛି। ଜଣେ ଯୁବକ ଉମେଶ ରଥ ଓ ତାଙ୍କ ବାନ୍ଧବୀ ରାସ୍ତାରେ ମୋଟରସାଇକେଲରୁ ପଡ଼ିଯିବା ପରେ ଦୁଇ ଜଣ ଗୁଣ୍ଡା ବାଉଁଶ ଲାଠିରେ ତାଙ୍କୁ ନିର୍ମମ ଭାବେ ମାଡ଼ ମାରିଥିଲେ। ଯୁବତୀ ଜଣକ ନିଜ ବିକଳରେ ତାଙ୍କ ବନ୍ଧୁଙ୍କୁ ରକ୍ଷା କରିବା ପାଇଁ ନିଜେ ମାଡ ଖାଇଥିଲେ । ପୁରା ଘଟଣାର ଭିଡିଓ ସୋସିଆଲ ମିଡିଆରେ ଭାଇରାଲ ହୋଇଛି।
ଏହା ଓଡିଶାରେ ପ୍ରଥମ ଭିଡହିଂସା ଘଟଣା ନୁହେଁ। ଏହା ଏକ ସାଧାରଣ ଧାରା ପାଳତିଯାଇଛି ।
କେତେ ବଢ଼ିଲା ଭିଡ଼ ହିଂସା?
ବିଜେପି ସରକାର ଗଠନ ହେବା ପରେ (ଜୁନ ୨୦୨୪) ରାଜ୍ୟରେ ଭିଡ଼ ହିଂସା ଓ ହତ୍ୟାକାଣ୍ଡ ତଥା ସାମ୍ପ୍ରଦାୟିକ ହିଂସାର ସଂଖ୍ୟା ବହୁତ ବଢ଼ିଛି। ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ନିଜେ ବିଧାନସଭାରେ ସ୍ୱୀକାର କରିଛନ୍ତି ଯେ ଫେବୃଆରୀ ୨୦୨୬ ପର୍ଯ୍ୟନ୍ତ ୭ଟି ମବ୍ ଲିଞ୍ଚିଙ୍ଗ୍ ଓ ୫୪ଟି ସାମ୍ପ୍ରଦାୟିକ ଦଙ୍ଗା ଘଟିଛି। ଏଥିରେ ମୁସଲିମ୍, ଦଳିତ, ବଙ୍ଗଳା ଭାଷୀ ପ୍ରବାସୀ ଓ ସାଧାରଣ ନାଗରିକଙ୍କ ଉପରେ ହିଂସାଚରଣ କରାଯାଇଛି।
- ସମ୍ବଲପୁରରେ ଜୁଏଲ୍ ଶେଖ୍ (୧୯) ଙ୍କୁ ‘ବାଙ୍ଗଲାଦେଶୀ’ କହି ହତ୍ୟା
- ଦେଓଗଡ଼ରେ କିଶୋର ଚମାର୍ (୩୫) ଙ୍କୁ ଗୋ-ହତ୍ୟା ଅଭିଯୋଗରେ ମାଡ଼
- କଣାସରେ ଜଣେ ଯୁବକଙ୍କୁ ମାରିବା ପାଇଁ ପନିକିରେ ଆକ୍ରମଣ ଓ ତାଙ୍କ ଉପରେ ମଟର ସାଇକଲ ଚଢେଇଦେବା ।
- ଭୁବନେଶ୍ୱର ନିକଟରେ ରେଳ କନଷ୍ଟେବଳ ସୌମ୍ୟ ରଞ୍ଜନ ସ୍ୱାଇଁଙ୍କୁ ଭିଡ ଦ୍ୱାରା ହତ୍ୟା
- ନୟାଗଡ ଓ ଓଡଗାଁ ରେ ଏଇଭଳି ଘଟନା ।
ଏହି ଘଟଣାଗୁଡ଼ିକ ଦେଖାଉଛି ଯେ ଆଇନର ଭୟ କମିଯାଇଛି ଓ ଗୁଣ୍ଡାମାନେ ଖୋଲାଖୋଲି ଅପରାଧ କରିବାର ସାହସ ପାଇଛନ୍ତି।
କାହିଁକି ଏମିତି ହେଉଛି?
ବିରୋଧୀ କହୁଛନ୍ତି — ସରକାର ଆଇନ ଶୃଙ୍ଖଳା ଉପରେ ପୂର୍ଣ୍ଣ ନିୟନ୍ତ୍ରଣ ହରାଇଛି। ପୋଲିସ୍ କାର୍ଯ୍ୟାନୁଷ୍ଠାନ ମନ୍ଥର ଓ ରାଜନୈତିକ ପ୍ରଭାବିତ ହେବାର ଅଭିଯୋଗ ଉଠୁଛି। ଓଡ଼ିଶା ଯେଉଁ ଶାନ୍ତିର ପରିଚୟ ଦେଉଥିଲା, ଆଜି ସେହି ରାଜ୍ୟରେ ରାସ୍ତାରେ ମହିଳା ଓ ଯୁବକଙ୍କୁ ନିର୍ମମ ଭାବେ ଆକ୍ରମଣ କରାଯାଉଛି ଏବଂ ଲୋକେ ଭୟରେ ଚୁପ୍ ରହୁଛନ୍ତି।ବ୍ରହ୍ମପୁର ଘଟଣା ପରେ ବିଜେଡି ନେତା ନବୀନ ପଟ୍ଟନାୟକ ସମେତ ବିରୋଧୀ ଦଳ ସରକାରକୁ ତୀବ୍ର ସମାଲୋଚନା କରିଛନ୍ତି। ସାଧାରଣ ଜନତା ପଚାରୁଛନ୍ତି — “ଆମକୁ ରକ୍ଷା କରିବାକୁ ଆମ ରାଜ୍ୟରେ ସରକାର ଅଛି ତ ?
ଅକର୍ମା ପୁଲିସ
ଓଡିଶାରେ ଯେତେବେଳେ ବି ଅପରାଧ ଓ ଅନିୟନ୍ତ୍ରିତ ଭିଡ ହିଂସା ହେଉଛି ସେତେବେଳେ ମୁଖ୍ୟମନ୍ତ୍ରୀ ମୋହନ ମାଝୀ ଏକ ସମୀକ୍ଷା ବୈଠକ ଡାକି ନିଜ ଦାୟିତ୍ଵ ସରିଗଲା ବୋଲି ଭାବୁଛନ୍ତି । ମୁଖ୍ୟମନ୍ତ୍ରୀଙ୍କ ଅଧୀନରେ ଥିବା ପୁଲିସ ବିଭାଗ ଏକପ୍ରକାର ଅକର୍ମା ବିଭାଗରେ ପରିଣତ ହୋଇଛି । ରାଜ୍ୟ ପୁଲିସର ମୁଖିଆ ଯୋଗେଶ ବାହାଦୁର ଖୁରାନିଆ ଅପରାଧୀଙ୍କୁ ଓଡିଶାରେ ରହିବାକୁ ଦିଆଯିବ ନାହିଁ ବୋଲି ବାହାସ୍ଫୋଟ ମାରୁଛନ୍ତି ଓ “ଏନକାଉଣ୍ଟର” ର ଧମକ ଦେଉଛନ୍ତି । ହେଲେ ତାଙ୍କ ଧମକ କେବଳ ସଂବାଦପତ୍ର ଓ ଟିଭି ବାଇଟ ଭିତରେ ସୀମିତ ରହୁଛି ।
ଶେଷକଥା
ଓଡ଼ିଶାର ଗରିମା କେବଳ ମନ୍ଦିର, ସମୁଦ୍ର ଓ ସଂସ୍କୃତି ଭିତରେ ସୀମିତ ନୁହେଁ, ବରଂ ଶାନ୍ତି, ସଂହତି, ସୌହାର୍ଦ୍ଦ୍ୟ ଓ ନିରାପତ୍ତାରେ ରହିଛି। ଯଦି ଭିଡ଼ ହିଂସା ଓ ଗୁଣ୍ଡାଗିରିକୁ ନିୟନ୍ତ୍ରଣ କରାନଯାଏ, ତେବେ ଆମ ସମାଜର ମୂଳ ଆଧାର ନଷ୍ଟ ହୋଇଯିବ।
ଭାରତୀୟ ଜନତା ପାର୍ଟି ଓଡ଼ିଶାରେ ସରକାର ଗଢ଼ିବା ପରେ ଆଉ କିଛି ହେଉ ବା ନ ହେଉ ଓଡ଼ିଶାର ଆଇନ ଶୃଙ୍ଖଳା ପରିସ୍ଥିତି ସବୁଠୁ ଖରାପ ସ୍ଥିତିକୁ ଚାଲି ଆସିଛି। ଭିଡ଼ ହିଂସା ବା ମବ୍ ଲିଞ୍ଚିଙ୍ଗ୍ ଓଡ଼ିଶାରେ କେବେ ଦେଖିବାକୁ ବା ଶୁଣିବାକୁ ମିଳିନଥିଲା। ଏବେ କିନ୍ତୁ ଓଡ଼ିଶାରେ ଭିଡ଼ ହିଂସା ଅତି ସାଧାରଣ ଓ ସ୍ବାଭାବିକ ଘଟଣା ପାଲଟିଛି। ଏହା ନ ବଦଳିଲେ ଓଡିଶାବାସୀ ବିଜେପିକୁ କଦାପି କ୍ଷମା କରିବେ ନାହିଁ ।
