ଉଡନ୍ତା ଚୁମା ଓ ବୁଡି ଯାଉଥିବା ସଂସଦୀୟ ଗରିମା

ଆମ ଲୋକସଭାରେ ବର୍ତ୍ତମାନ ମିଳିତ ବିରୋଧୀ ଦଳ ନରେନ୍ଦ୍ର ମୋଦୀ ସରକାର ବିରୋଧରେ ଅବିଶ୍ବାସ ପ୍ରସ୍ତାବ ଆଗତ କରିଛନ୍ତି ଓ ତା'ରି ଉପରେ ଲୋକସଭାରେ ବିତର୍କ ଚାଲିଛି। ସଂସଦୀୟ ଇତିହାସରେ ବିଶ୍ବାସ କିମ୍ବା ଅବିଶ୍ବାସ ପ୍ରସ୍ତାବ ଆଲୋଚନା ସମୟରେ ଆମ ସଂସଦର ସବୁଠାରୁ ଗୁରୁତ୍ୱପୂର୍ଣ୍ଣ ବକ୍ତବ୍ୟ ଆମେ ଶୁଣିଆସିଛୁ । ପ୍ରଥମ ଥର ଲାଗି ଏ ପ୍ରସଙ୍ଗରେ ଆଲୋଚନା ଶୁଣିବାକୁ ଦେଶବାସୀ ପ୍ରାୟତଃ ଆଗ୍ରହ ପ୍ରକାଶ କରୁନାହାନ୍ତି । ସଂସଦ ଟିଭିର ଦର୍ଶକ ଆକଳନ ଦେଖି ଆମେ ଗୋଟିଏ କଥା ବୁଝିଯିବା ଉଚିତ ଯେ ଦେଶବାସୀ ଏବେ ଆଉ ସଂସଦୀୟ ଭାଷଣ ପ୍ରତି ଆକୃଷ୍ଟ ନୁହନ୍ତି । ଲୋକସଭାର ଅବିଶ୍ବାସ ପ୍ରସ୍ତାବ ବିତର୍କରେ କେବଳ ରାହୁଲ ଗାନ୍ଧୀଙ୍କୁ ବାଦ୍ ଦେଲେ ଅନ୍ୟ କୌଣସି ରାଜନେତାଙ୍କ ଭାଷଣକୁ ଲୋକ ଶୁଣିନାହାନ୍ତି । ରାହୁଲଙ୍କ ଭାଷଣକୁ ସଂସଦ ଟିଭିରେ ପ୍ରାୟ ୩ଲକ୍ଷ ଲୋକ ଦେଖିଥିବା ବେଳେ ଅମିତ ଶାହାଙ୍କୁ ମାତ୍ର ଲକ୍ଷେ ଲୋକ ଶୁଣିଛନ୍ତି । ସଂସଦରେ ମର୍ଯ୍ୟାଦାଜନକ ବିତର୍କ ଅପେକ୍ଷା ନିମ୍ନରୁଚିର ଆକ୍ଷେପ ଓ ଆକ୍ରମଣ ଲୋକଙ୍କୁ ଯେ ବ୍ୟଥିତ କରୁଛି, ଏକଥା ଆମର ମାନ୍ୟବର ସାଂସଦମାନେ ବୁଝିବା ଉଚିତ।

ଗତକାଲି ୯ ଅଗଷ୍ଟ ଦିନ କଂଗ୍ରେସ ନେତା ରାହୁଲ ଗାନ୍ଧୀ ଅବିଶ୍ବାସ ପ୍ରସ୍ତାବ ଉପରେ ନିଜର ମତ ରଖିଥିଲେ। ରାହୁଲଙ୍କ ପରେ ପରେ କେନ୍ଦ୍ର ମହିଳା ଓ ଶିଶୁ ବିକାଶ ମନ୍ତ୍ରୀ ସ୍ମୃତି ଇରାନୀ ନିଜର ବକ୍ତବ୍ୟ ରଖିବାକୁ ଯାଇ ହଠାତ ରାହୁଲ ଗାନ୍ଧୀ ସଂସଦ ଭିତରେ ଉଡନ୍ତା ଚୁମା ବା ଫ୍ଲାଇଂ କିସ ଦେଇ ସଂସଦର ସବୁ ମହିଳାଙ୍କୁ ଅପମାନିତ କରିଛନ୍ତି ବୋଲି ଅଭିଯୋଗ କରିଥିଲେ । ସଂସଦର ସବୁ କୋଣରେ କ୍ୟାମେରା ରହିଥିଲା ଓ ରାହୁଳଙ୍କ ବକ୍ତବ୍ୟ ଲାଇଭ ଦେଶବାସୀ ଶୁଣୁଥିଲେ । ରାହୁଲଙ୍କ ଆଚରଣ ବା ବ୍ୟବହାରରେ ସେମିତି କିଛି ଅସଙ୍ଗଟି ଦେଶବାସୀ ଦେଖିନଥିବା ବେଳେ ତାଙ୍କ ଉପରେ ହଠାତ ଏ ପ୍ରକାର ଆକ୍ରମଣର ଅର୍ଥ କଣ ? ଏ ପ୍ରସଙ୍ଗରେ ବିଜେପି ସାଂସଦ ହେମା ମାଳିନୀ ଏମିତି କିଛି ଘଟିଥିବାର ସେ ଦେଖିନଥିଲେ ବୋଲି କହିଛନ୍ତି, ହେଲେ ରାହୁଲଙ୍କ ବିରୋଧରେ ବାଚସ୍ପତିଙ୍କୁ ଲେଖା ଯାଇଥିବା ଚିଠିରେ ସେ ଦସ୍ତଖତ କରିଛନ୍ତି । ଏମିତି ବିଚିତ୍ର ଅଭିଯୋଗ ସଂସଦ ଭିତରେ କେବେ ହୋଇନଥିଲା ।

ବିରୋଧୀ ଦଳର ପ୍ରମୁଖ ସାଂସଦଙ୍କ ବିରୋଧରେ ଶାସକ ଦଳର ଜଣେ ମନ୍ତ୍ରୀ ଏମିତି ମିଛ ଅଭିଯୋଗ କରିଥିବାର ରେକର୍ଡ ଅନ୍ତତଃ ସଂସଦରେ କେହି କେବେ ଦେଖି ନଥିଲେ । ରାହୁଲ ଗାନ୍ଧୀଙ୍କୁ “ମିଶୋଜିନିଷ୍ଟ” ବା ନାରୀ ବିଦ୍ଵେଷୀ ବୋଲି ସ୍ମୃତି ଇରାନୀ ଆକ୍ଷେପ କରିଛନ୍ତି । ଏ ସମ୍ପର୍କରେ ବାଚସ୍ପତିଙ୍କ ପାଖରେ ଲିଖିତ ଅଭିଯୋଗ ହୋଇଥିବାରୁ ସେ ଏହାର ତୁରନ୍ତ ସ୍ପଷ୍ଟୀକରଣ ଦେବା କଥା । ହେଲେ ଏ ସମ୍ପର୍କରେ ଲୋକସଭା ସଚିବାଳୟ ଏଯାଏ କିଛି କହିନାହାନ୍ତି ।

ଫ୍ଲାଇଂ କିସ ବା ଉଡନ୍ତା ଚୁମା ପୃଥିବୀର ସବୁଠି ସ୍ନେହ ବା ଭଲପାଇବା ପ୍ରକଟ କରିବାର ଏକ ସଙ୍କେତ ଭାବରେ ବ୍ଯବହୃତ ହୋଇଆସିଛି । ଆମ ଦେଶରେ ମଧ୍ୟ ଚିତ୍ରତାରକା, ଖେଳାଳୀ ଓ ରାଜନେତାମାନେ ଏହା ବ୍ୟବହାର କରିଥାନ୍ତି। ଏହାକୁ ନାରୀ ବିଦ୍ଵେଷୀ ବୋଲି କହିବାର କାରଣ କଣ ? ହଠାତ ସଂସଦ ଭିତରେ ବାସ୍ତବ ପ୍ରସଙ୍ଗ ଉପରେ ଆଲୋଚନା ନକରି ରାହୁଲ ଗାନ୍ଧୀଙ୍କ ଉପରେ ମିଛ ଅଭିଯୋଗ ଆଧାରରେ ଆକ୍ରମଣ କରିବା, ସଂସଦର ଗରିମାକୁ କ୍ଷୁଣ୍ଣ କରୁଛି ।