ପାକିସ୍ତାନ ରଙ୍ଗର ସ୍କୁଲ !!

ଓଡିଶା ବିଧାନସଭାର ବିରୋଧୀଦଳ ନେତା ଗୋଟେ ନୂଆ ରଙ୍ଗର ଆବିଷ୍କାର କରିଛନ୍ତି – ପାକିସ୍ତାନ ରଙ୍ଗ । ଓଡିଶା ସରକାର ନିଜର ଫାଇଭ ଟି ଯୋଜନା ଆଧାରରେ ଯେଉଁ ସବୁ ସ୍କୁଲ ତିଆରି କରୁଛନ୍ତି ସେସବୁ ପାକିସ୍ତାନ ରଙ୍ଗର ସ୍କୁଲ ବୋଲି ଜୟ ନାରାୟଣ ମିଶ୍ର କହିଛନ୍ତି। ତେବେ ଏ ପାକିସ୍ତାନ ରଙ୍ଗଟି କଣ ? ପୃଥିବୀରେ ସବୁଥି ମୌଳିକ ଭାବରେ ସାତୋଟି ରଙ୍ଗ । ତାରି ଭିତରେ ସବୁଜ ମଧ୍ୟ ଏକ ରଙ୍ଗ । ତେବେ ଏସବୁ ରଙ୍ଗର ଦେହ ଅଛି ବୋଲି ଆମେ ନୂଆ ଜାଣିଲୁ । ରାଜନୈତିକ ବିରୋଧ ଯେ ମଣିଷର ମନକୁ ଏତେ ବିକୃତ କରିଦିଏ ତାର ଉଦାହରଣ ମଧ୍ୟ ପାଇଲୁ । ସରକାରକୁ ବିରୋଧ କରିବାର ସବୁ ଅଧିକାର ବିରୋଧୀ ଦଳ ନେତାଙ୍କର ଅଛି ଓ ସେ ତାହାକୁ ତୁଲାଇବା ଉଚିତ । ହେଲେ ସରକାର ବିରୋଧ କରିବାକୁ ଯାଇ ପୂରା ସବୁଜ ରଙ୍ଗକୁ ପାକିସ୍ତାନୀ ବୋଲି କହିବା କେବଳ ଏକ ହାଲୁକା ମନ୍ତବ୍ୟ ନୁହେଁ, ଏହା ପଛରେ ଘୃଣା ଓ ସାମ୍ପ୍ରଦାୟିକ ରାଜନୀତିର ଗୋଟେ ଜଘନ୍ୟ ଉଦ୍ଦେଶ୍ୟ ରହିଛି ।

ଉଦ୍ଦେଶ୍ୟମୂଳକ ଭାବରେ ବିଜେପି ନେତା ଜୟ ନାରାୟଣ ମିଶ୍ର ବିଜେଡି ପତାକାର ରଙ୍ଗ ସହିତ ପାକିସ୍ତାନ ଓ ଇସ୍ଲାମକୁ ଯୋଡିବାର ଉଦ୍ୟମ କରିଛନ୍ତି । ରଙ୍ଗ, ପୋଷାକ ଓ ଖାଦ୍ୟକୁ ନେଇ ରାଜନୀତି କରିବା ବିଜେପିର ପୁରୁଣା ଅଭ୍ୟାସ। “ଗେରୁଆ ଆମର,ସବୁଜ ତାଙ୍କର”- ଏମିତି ଏକ ବିଭାଜନକାରୀ ଚିନ୍ତା ଯୋଗୁଁ ଏମିତି ବିକୃତି ସମାଜକୁ ଛଡା ଯାଉଛି । ବିଜେଡ଼ିକୁ ଧର୍ମଛଡା ଏବଂ ଏହା ପାକିସ୍ତାନର ରଙ୍ଗରେ ନିଜକୁ ରଙ୍ଗାଇଛି ବୋଲି ଏକ ପିଲାଳିଆ ନାଟକ ଜୟ ନାରାୟଣ କରିବାକୁ ଚେଷ୍ଟା କରିଛନ୍ତି । ହେଲେ ବିଜେଡ଼ିର ପତାକା ରଙ୍ଗ ସାମ୍ବିଧାନିକ ଭାବରେ ନିର୍ବାଚନ କମିଶନଙ୍କ ସ୍ଵୀକୃତି ପାଇଛି। ତେଣୁ ଏ ଭଳି ପ୍ରଶ୍ନ ସମ୍ବିଧାନର ମର୍ଯାଦାକୁ କ୍ଷୁଣ୍ଣ କରୁଛି।

ଫାଇଭ ଟି କୁ ନେଇ ଜୟ ନାରାୟଣ ଯେଉଁ ପ୍ରଶ୍ନ ପଚାରୁଛନ୍ତି, ସେଥିରେ ତାଙ୍କର ଉଦ୍ଦେଶ୍ୟ କିଛି ବୁଝାପଡୁନି । ପ୍ରଶାସନର ପରିଚାଳନା ଲାଗି ଏମିତି ନୂଆ ନୂଆ ଶବ୍ଦ ବାବୁମାନେ ସବୁବେଳେ ତିଆରି କରିଥାନ୍ତି। ସେଥିରେ ରାଜନେତାମାନେ ବିଚଳିତ ହେବାର କାରଣ କଣ ? ବିଜେପି ଓଡିଶାରେ ନବୀନ ପଟ୍ଟନାୟକଙ୍କ ବିରୋଧରେ ଲଢୁଛି ନା ଓଡିଶା ସରକାରଙ୍କ ଅମଲାମାନଙ୍କ ବିରୋଧରେ ଲଢୁଛି ? ଏବେ ଲାଗୁଛି, ଯେମିତି ପୂରା ବିଜେପି ଓଡିଶାର ଫାଇଭ ଟି ସଚିବଙ୍କ ବିରୋଧରେ ଲଢାଇ କରୁଛି । ନବୀନଙ୍କ ବିରୋଧରେ କହିବା ଛାଡି ଫାଇଭ ଟି ପଛରେ ଲାଗିଲେ ରାଜନୈତିକ ଫାଇଦା ଅପେକ୍ଷା କ୍ଷତିର ଆଶଙ୍କା ଅଧିକ ।

ତେବେ ଏଠି ପ୍ରସଙ୍ଗ ହେଉଛି ପାକିସ୍ତାନର ରଙ୍ଗ । ଜୟ ନାରାୟଣ ପୂରା ଓଡିଶାରୁ ସବୁଜ ରଙ୍ଗ ହଟାଇଦେବାକୁ ଚାହୁଁଛନ୍ତି କି ? ସେତକ କରିବାକୁ ହେଲେ ତାଙ୍କୁ ବାବୁ ଅରୁଣ ସାହୁଙ୍କ ପରାମର୍ଶ ମାନି ସବୁଜ ପନିପରିବା ଖାଇବାକୁ ବନ୍ଦ କରିବାକୁ ପଡିବ । ଆମର ବଣ ଜଙ୍ଗଲ, କ୍ଷେତ ଓ ବିଗିଚା, ସବୁକୁ ପାକିସ୍ତାନୀ ରଙ୍ଗ ବୋଲି ବିବେଚନା କରିବାକୁ ପଡିବ ।

ପ୍ରକୃତି ଓ ଜୀବନକୁ ଦେଶ ଦେଶ ମଧ୍ୟରେ ବିଭାଜିତ କରିବା ସବୁଠୁ ନିକୃଷ୍ଟ ରାଜନୀତି । ତେବେ ତା ଠୁ ନିକୃଷ୍ଟ ହେଉଛି ନିଜର ରାଜନୈତିକ ପ୍ରତିପକ୍ଷଙ୍କୁ ଶତୃଦେଶର ଲୋକ ବୋଲି ଭାବିବା ।

ଏ ପ୍ରକାର ନିକୃଷ୍ଟ ରାଜନୀତି, ଓଡିଶାରେ ବିଜେପିକୁ ଆହୁରି ତଳିତଳାନ୍ତ କରିବ ।