ଟ୍ଵିଟରର ମତ ଓ ସତ୍ୟବାଦୀ ଭାରତ ସରକାର !!

ମୋଦୀ ସରକାର ଦେଶର କୃଷି କ୍ଷେତ୍ରରେ କର୍ପୋରେଟ ବଜାରକୁ ଅନୁପ୍ରବେଶ କରାଇବା ପାଇଁ ଯେଉଁ କୃଷି ଆଇନ ତିଆରି କରିଥିଲେ, ତା ବିରୋଧରେ ଦେଶର ସବୁଠୁ ବଡ କୃଷକ ଆନ୍ଦୋଳନ ଗଢି ଉଠିଥିଲା । ପ୍ରାୟ ବର୍ଷେ ଦେଶର କୃଷକମାନେ ମୋଦୀ ସରକାରକୁ ବିରୋଧ କରି ରାସ୍ତାରେ ଆନ୍ଦୋଳନ କରିଥିଲେ । ଏହି ଆନ୍ଦୋଳନରେ ୭୦୦ରୁ ଅଧିକ କୃଷକଙ୍କର ପ୍ରାଣହାନି ଘଟିଥିଲା । କୃଷକଙ୍କର ଏହି ବିଶାଳ ଆନ୍ଦୋଳନ ଆଗରେ ମୋଦୀ ସରକାର ପରାଜୟ ସ୍ଵୀକାର କରିଥିଲେ ଓ ପରିଶେଷରେ ତିନୋଟି କୃଷି ଆଇନକୁ ପ୍ରତ୍ୟାହାର କରିଥିଲେ । ତେବେ କୃଷକ ଆନ୍ଦୋଳନ ସମୟରେ ଏହାକୁ ଭାଙ୍ଗିବା ଲାଗି ସରକାର ନିଜର ସବୁ ଶକ୍ତି ଓ ସାମର୍ଥ୍ୟ ପ୍ରୟୋଗ କରିବାକୁ ପଛାଇ ନଥିଲେ । ଦେଶର ଗଣମାଧ୍ୟମ ଦେଶର ସବୁଠୁ ବଡ ଜନ ଆନ୍ଦୋଳନ ବିରୋଧରେ ସବୁଠୁ ଅଧିକ ଅପପ୍ରଚାର କରୁଥିଲା । ଏହି ଆନ୍ଦୋଳନ ବିରୋଧରେ ଦେଶର ମୁଖ୍ୟଧାରାର ଗଣମାଧ୍ୟମ ଖୋଲାଖୋଲି ସରକାର ସହଯୋଗୀ ଭାବରେ କାମ କରୁଥିବା ବେଳେ ସୋସିଆଲ ମିଡିଆରେ ଯେମିତି ଏହାର ପ୍ରଭାବ ନପଡେ ସେଥିଲାଗି କେନ୍ଦ୍ର ସରକାର ଯାବତୀୟ କଳ, ବଳ ଓ କୌଶଳ ପ୍ରୟୋଗ କରୁଥିଲେ । ସେହି କ୍ରମରେ ଆନ୍ତର୍ଜାତିକ ମାଇକ୍ରୋ ବ୍ଲଗିଙ୍ଗ ସଂସ୍ଥା ଟ୍ବିଟରରେ କୃଷକ ଆନ୍ଦୋଳନକୁ ନେଇ ଲେଖୁଥିବା ସାମ୍ବାଦିକ ଓ ସାମାଜିକ କର୍ମୀଙ୍କ ସ୍ଵର ଚାପି ଦେବାକୁ ଭାରତ ସରକାର ଚାପ ପକାଇଥିଲେ । ସେତେବେଳେ ଏ କଥା ସମସ୍ତେ ଜାଣିଥିଲେ ।

ଏହାର ଠିକ ଦୁଇ ବର୍ଷ ପରେ ଟ୍ବିଟରର ପ୍ରତିଷ୍ଠାତା ସିଇଓ ଜ୍ୟାକ ଡୋର୍ସି ଏକ ଟେଲିଭିଜନ କାର୍ୟକ୍ରମରେ ଭାରତ ସରକାରଙ୍କ ଚାପ ବିଷୟରେ ସ୍ପଷ୍ଟ ମତ ରଖିଛନ୍ତି । ଯଦି କୃଷକ ଆନ୍ଦୋଳନ ସପକ୍ଷବାଦୀଙ୍କ ସ୍ଵର ଟ୍ବିଟରରେ ଜାଗା ପାଏ ତା ହେଲେ ଟ୍ବିଟରକୁ ବନ୍ଦ କରିଦେବାକୁ ଭାରତ ସରକାର ଧମକ ଦେଉଥିଲେ । ଆଜି ଜ୍ୟାକ ଡୋର୍ସି ଯାହା କହୁଛନ୍ତି, ସେତେବେଳେ ତାହା ଜଳ ଜଳ ଦେଖା ଯାଉଥିଲା । ତତ୍କାଳୀନ ଟେଲି ଯୋଗାଯୋଗ ମନ୍ତ୍ରୀ ରବିଶଙ୍କର ପ୍ରସାଦ ସର୍ବ ସାଧାରଣରେ ଟ୍ବିଟରକୁ ସମାଲୋଚନା କରୁଥିଲେ । ବିଜେପି ମୁଖପାତ୍ର ସଂବିତ ପାତ୍ର କଂଗ୍ରେସ ସମ୍ପର୍କରେ ଜାଲ କାଗଜ ଟ୍ବିଟରରେ ଦେବାପରେ, ଏହାକୁ ଜାଲ ବୋଲି କୁହାଯାଇଥିଲା । ତା ପରଠୁ ଟ୍ବିଟର ଉପରେ ବିଜେପି ଏବଂ ମୋଦୀ ସରକାରର ଚାପ ବଢିବା ଆରମ୍ଭ କରିଥିଲା ।

ଜ୍ୟାକ ଡୋର୍ସି ଯାହା କହିଛନ୍ତି, ତାହା ମିଛ ବୋଲି ବିଜେପି ସମର୍ଥକଙ୍କ ଛଡା ଆଉ କେହି କହିପାରିବେ ନାଇଁ । ତେବେ ଭାରତ ସରକାରଙ୍କ ଆଇଟି ବିଭାଗର ମନ୍ତ୍ରୀ ରାଜୀବ ଚନ୍ଦ୍ରଶେଖର ଏ ପ୍ରସଙ୍ଗରେ  ଜ୍ୟାକ ଡୋର୍ସି ଡାହା ମିଛ କହୁଛନ୍ତି ବୋଲି କହିଛନ୍ତି । ଟ୍ବିଟର ୨୦୨୦ ରୁ ୨୦୨୨ମଧ୍ୟରେ ଭାରତୀୟ ଆଇନ ବିରୋଧରେ କାମ କରୁଥିଲା ବୋଲି ମନ୍ତ୍ରୀ କହୁଛନ୍ତି । ଏଠି ପ୍ରଶ୍ନ ଉଠୁଛି, ଯଦି ଟ୍ବିଟର ଭାରତୀୟ ଆଇନ ବିରୋଧରେ କାମ କରୁଥିଲା, ତାହେଲେ ଭାରତ ସରକାର ତା ବିରୋଧରେ କି କାର୍ୟାନୁଷ୍ଠାନ ନେଇଛନ୍ତି । ଆଇନର ଡର ଦେଖାଇ ଟ୍ଵିଟରକୁ ଭାରତ ସରକାର ନିଜ ସ୍ଵାର୍ଥରେ ବ୍ୟବହାର କରୁଥିଲେ କି ? ଜ୍ୟାକ ଡୋର୍ସିଙ୍କୁ ମିଛୁଆ ବୋଲି କହିବାକୁ ଯାଇ ମନ୍ତ୍ରୀ ରାଜୀବ ଚନ୍ଦ୍ରଶେଖର ଏବଂ ବିଜେପି ନେତାମାନେ ଏବେ ଏମିତି କଥା କହୁଛନ୍ତି, ଯାହା ଆହୁରି ସାଂଘାତିକ ।

ବିଜେପି ଆଇଟି ସେଲର ମୁଖ୍ୟ ଅମିତ ମାଲବ୍ୟ ବଡ ଅଭିଯୋଗ ଆଣି କହିଛନ୍ତି ଯେ ଜ୍ୟାକ ଡୋର୍ସି ଭାରତର ସାର୍ବଭୌମତ୍ଵ ବିରୋଧରେ କାମ କରୁଥିଲେ । ଯଦି ତାହା ସତ, ତା ହେଲେ ତାଙ୍କ ବିରୋଧରେ କିଛି କାର୍ୟାନୁଷ୍ଠାନ ନିଆ ହୋଇନି କାହିଁକି ? ଜ୍ୟାକ ଡୋର୍ସିଙ୍କ ବିରୋଧରେ ଆମେରିକାରେ ଭାରତ ସରକାର ମାମଲା କରିବାର ସାହସ ରଖିଛନ୍ତି କି?

 ଜ୍ୟାକ ଡୋର୍ସିଙ୍କୁ ମିଛୁଆ କହିଦେଲେ ଭାରତ ସରକାରଙ୍କ ଦାୟିତ୍ଵ ସରିଗଲା ବୋଲି ଭାବନ୍ତୁ ନାଇଁ । ଜ୍ୟାକ ଡୋର୍ସି ଙ୍କ ମତ ସ୍ପଷ୍ଟ କରୁଛି ଯେ ନାଗରିକଙ୍କୁ ଆମ ସମ୍ବିଧାନ ଦେଇଥିବା ବାକ ସ୍ଵାଧୀନତାର ଅପହରଣ ଦୋଷରେ ଭାରତ ସରକାର ଦୋଷୀ ।

ନିଜେ ନିଜକୁ ସତ୍ୟବାଦୀ ବୋଲି କହି ଢୋଲ ପିଟିଳେ ମିଛ କେବେ ସତ୍ୟ ହୋଇଯିବ ନାଇଁ ।