ବିରୋଧୀ ଦଳ ନଥିବା ନାଗାଲାଣ୍ଡ : ଗଣତନ୍ତ୍ରର ନୂଆ ପରିଚୟ

୨୦୨୧ରେ ଉତ୍ତର-ପୂର୍ବ ରାଜ୍ୟ ନାଗାଲାଣ୍ଡ ବିଧାନସଭାର ସବୁ ବିରୋଧୀ ସଦସ୍ୟ ମୁଖ୍ୟମନ୍ତ୍ରୀ ନେଫିଉ ରିଓଙ୍କୁ ସମର୍ଥନ କରିଥିଲେ । ଅର୍ଥାତ ୨୦୨୧ ପରେ ନାଗାଲାଣ୍ଡ ରାଜନୀତିରେ ବିରୋଧୀ ଦଳ ଆଉ ନଥିଲେ । ୨୦୨୩ ନାଗାଲାଣ୍ଡ ବିଧାନସଭା ନିର୍ବାଚନରେ ୧୦ରୁ ଅଧିକ ସ୍ଵୀକୃତିପ୍ରାପ୍ତ ରାଜନୈତିକ ଦଳ ନିର୍ବାଚନ ଲଢିଥିଲେ । ସେମାନଙ୍କ ମଧ୍ୟରୁ କଂଗ୍ରେସ କୌଣସି ଆସନ ଜିତିନଥିବା ବେଳେ ବାକି ଦଳ ଗୁଡିକ ନିର୍ବାଚନ ପରେ ପୁଣିଥରେ ମୁଖ୍ୟମନ୍ତ୍ରୀ ଭାବରେ ନିର୍ବାଚିତ ନେଫିଉ ରିଓଙ୍କୁ ସେମାନଙ୍କର ସମର୍ଥନ ଘୋଷଣା କରିଛନ୍ତି । ନିର୍ବାଚନରେ ନେଫିଉ ରିଓଙ୍କ ଦଳ ନେସନାଲିଷ୍ଟ ଡେମୋକ୍ରାଟିକ ପ୍ରୋଗ୍ରେସିଭ ପାର୍ଟି ୨୫ ଆସନ ଓ ତାଙ୍କର ସହଯୋଗୀ ବିଜେପି ୧୨ ଟି ଆସନ ପାଇଥିଲେ । ୬୦ ସଦସ୍ୟ ବିଶିଷ୍ଟ ନାଗାଲାଣ୍ଡରେ ସରକାର ଗଢିବା ଲାଗି ଏତିକି ଆସନ ଯଥେଷ୍ଟ । ତା ସତ୍ତ୍ୱେ ବିଜେପିକୁ ବାହାରେ ବିରୋଧ କରୁଥିବା ଶରଦ ପାୱାରଙ୍କ ଏନସିପି ଏବଂ ନୀତିଶ କୁମାରଙ୍କ ସଂଯୁକ୍ତ ଜନତା ଦଳ ନେଫିଉ ରିଓଙ୍କୁ ସମର୍ଥନ ଦେଇଛନ୍ତି କାହିଁକି ?

ଏହାର ସରଲା ଏବମ ସହଜ ଉତ୍ତର ହେଉଛି, ନେଫିଉ ରିଓଙ୍କୁ ସମର୍ଥନ ନ କଲେ ସେଠାରେ ଏହି ସବୁ ଦଳର ଅସ୍ତିତ୍ଵ ରହିବ ନାହିଁ । ଚାପ ଏବଂ ଲୋଭ ଦେଖାଇ ବିଧାୟକମାନଙ୍କୁ ସରକାର ନିଜ ଆଡକୁ ନେଇଆସିବେ । ଅନ୍ତତଃ ସରକାରକୁ ସମର୍ଥନ ଦେଲେ ଦଳ ର ଅସ୍ତିତ୍ଵ ବଞ୍ଚିଯିବ ! ଉତ୍ତର ପୂର୍ବ ରାଜ୍ୟ ଗୁଡିକରେ ବିଧାୟକ କିଣାବିକା ସବୁଠୁ ସହଜ ବ୍ୟବସ୍ଥା ପାଲଟି ଯାଇଛି । ୨୦୧୪ରେ କେନ୍ଦ୍ରରେ ମୋଦୀ ସରକାର ଗଠନ ହେବା ପରେ ପରେ ଅରୁଣାଚଳରେ ପୂର୍ଣ୍ଣ ବହୁମତ ପାଇ ସରକାର ଗଢିଥିବା କଂଗ୍ରେସ ଦଳର ସବୁ ସଦସ୍ୟଙ୍କୁ ବିଜେପିରେ ସାମିଲ କରିଦିଆଗଲା । ଏହି ଘଟଣା ପରଠୁ ଉତ୍ତରପୂର୍ବ ରାଜ୍ୟରେ ବିରୋଧୀ ରାଜନୀତି ପ୍ରାୟ ନିଃଶେଷ ହୋଇଯାଇଛି ।

ଗୋଟେ ରାଜ୍ୟର ସବୁ ନିର୍ବାଚିତ ସଦସ୍ୟ ଯଦି ସରକାରକୁ ସମର୍ଥନ କରନ୍ତି ତା ହେଲେ, ଗଣତନ୍ତ୍ରର ଆବଶ୍ୟକତା କଣ ? ଗଣତନ୍ତ୍ରରେ ନିର୍ବାଚିତ ବିଧାୟକମାନଙ୍କ କିଣାବିକା ଏବେ ଏକ ସାଧାରଣ ଘଟଣା ପାଲଟି ଯାଇଛି । ନିର୍ବାଚନ ପରେ କେନ୍ଦ୍ରୀୟ ଏଜେନ୍ସିର ଡର ଏବଂ  ପଇସାର ଲୋଭ ମାଧ୍ୟମରେ ସରକାର ଗଢାଯାଉଛି । ଦଳବଦଳ ନିରୋଧ ଆଇନ କେବଳ ନାମକୁ ମାତ୍ର ଏକ ଆଇନ ହୋଇ ପଡିରହିଛି । ମହାରାଷ୍ଟ୍ରରେ ଉଦ୍ଧବ ଥାକରେ ସରକାର ଭାଙ୍ଗିବା ଲାଗି ଯେଉଁ ପ୍ରକାର ଉଦ୍ୟମ ହେଲା ଓ ସେଥିରେ ସୁପ୍ରିମ କୋର୍ଟ ଯେଉଁ ଭାବରେ ମୁକ ଦର୍ଶକ ଭାବରେ ଠିଆ ହୋଇ ରହିଲେ, ସେଥିରୁ ଗୋଟେ କଥା ସ୍ପଷ୍ଟ ଯେ ଗଣତନ୍ତ୍ରକୁ ମାରିବା ଲାଗି ଆଉ ଅଲଗା କିଛି କରିବାର ଆବଶ୍ୟକତା ନାହିଁ । ଗଣତାନ୍ତ୍ରିକ ଅନୁଷ୍ଠାନ ଜରିଆରେ ହିଁ ଗଣତନ୍ତ୍ରକୁ ହତ୍ୟା କରାଯାଇପାରିବ ! ନାଗାଲାଣ୍ଡରେ ଆଜି ଯାହା ଘଟିଛି, ଗୁଜରାଟରେ ତାହା ବହୁତ ଆଗରୁ ଘଟି ଆସୁଛି । କର୍ଣ୍ଣାଟକ, ମହାରାଷ୍ଟ୍ର, ଗୁଜରାଟ, ଉତ୍ତରାଖଣ୍ଡ, ଗୋଆ, ମଣିପୁର, ରାଜସ୍ଥାନ, ମଧ୍ୟପ୍ରଦେଶ  ଭଳି ରାଜ୍ୟରେ ବିଧାୟକ ବିକାକିଣାର ନିରଳଜ ବଜାର ଆମେ ଦେଖିସାରିଛୁ ।

ଏ ବଜାରର ସବୁଠୁ ବଡ ଖରିଦଦାର କିଏ, ସେଟା ବି ଆମେ ଜାଣିଛୁ । ତେଣୁ ଗଣତନ୍ତ୍ରକୁ ବଞ୍ଚାଇବା ଏବେ ଆଉ ରାଜନୈତିକ ଦଳଙ୍କ ସାମର୍ଥ୍ୟ ଭିତରେ ନାହିଁ !!