ଓଡିଶା ରାଜନୀତିରେ ପାଣ୍ଡିଆନ ଯୁଗ !!

ଗତ କିଛିଦିନ ହେଲାଣି ଓଡିଶାର ରାଜନୀତିରେ କେବଳ ଗୋଟେ ନାଁ ଶୁଣିବାକୁ ମିଳୁଛି- ଭିକେ ପାଣ୍ଡିଆନ । ସବୁ ବିରୋଧୀ ଦଳ ଏବଂ ଶାସକ ଦଳ ଭିତରେ ଥିବା ବିରୋଧୀ ଶକ୍ତିମାନେ ଏବେ ଭିକେ ପାଣ୍ଡିଆନଙ୍କୁ ତାଙ୍କ ରାଜନୀତିର ଉପଲକ୍ଷ୍ୟ ଭାବରେ ବ୍ୟବହାର କରୁଛନ୍ତି । ଭୁବନେଶ୍ୱର ବିଜେପି ସାଂସଦ ଅପରାଜିତା ଷଡଙ୍ଗୀ ଏହି ପ୍ରସଙ୍ଗକୁ ପ୍ରଥମେ ଉଠାଇବା ପରେ ବିଜେପିର ସବୁ ତୁଙ୍ଗ ନେତା ଏହାକୁ ପ୍ରମୁଖ ପ୍ରସଙ୍ଗ ଭାବରେ କହିବା ଆରମ୍ଭ କଲେ । ତେବେ ବିଜେପି ପାଣ୍ଡିଆନଙ୍କ ବିରୋଧରେ ସାମ୍ବାଦିକ ସମ୍ମିଳନୀରେ କହୁଥିବା ବେଳେ ପ୍ରଧାନମନ୍ତ୍ରୀଙ୍କ ଅଧୀନରେ ଥିବା ପର୍ସୋନେଲ ଏବଂ କାର୍ମିକ ବିଭାଗରେ ଏ ନେଇ ଅଭିଯୋଗ କରୁନାହାନ୍ତି । (ଇତି ମଧ୍ୟରେ ଏକ ଖବର ଆସିଛି ଯେ ଜନୈକ ଆଇଏଏସ ଅଧିକାରୀଙ୍କ ନାମରେ ସାଂସଦ ଅପରାଜିତା ଷଡଙ୍ଗୀ ଏବଂ ବିଜେପି ରାଜ୍ୟ ସଭାପତି ମନମୋହନ ସାମଲ ନିର୍ଦ୍ଦିଷ୍ଟ ଅଭିଯୋଗ କରିଥିବାରୁ ଏ ସମ୍ପର୍କରେ କେନ୍ଦ୍ର ସରକାର ଯଥାଯଥ ପଦକ୍ଷେପ ନେବାକୁ ମୁଖ୍ୟ ଶାସନ ସଚିବଙ୍କୁ ଚିଠି ଲେଖିଛନ୍ତି। ) 

ପ୍ରଥମଥର ପାଇଁ ପୂର୍ବତନ ମୁଖ୍ୟ ଶାସନ ସଚିବ ତଥା କଂଗ୍ରେସ ପ୍ରଚାର କମିଟିର ଅଧ୍ୟକ୍ଷ ବିଜୟ ପଟ୍ଟନାୟକ ଭିକେ ପାଣ୍ଡିଆନଙ୍କ ବିରୋଧରେ ସଂପୃକ୍ତ ମନ୍ତ୍ରଣାଳୟରେ ଅଭିଯୋଗ କରିଛନ୍ତି । ତେବେ ସବୁଠୁ ମଜାର କଥା ହେଲା, ଆଜି ଭିକେ ପାଣ୍ଡିଆନଙ୍କ ବିରୋଧରେ ଅଭିଯୋଗ ଆଣୁଥିବା ବିଜୟ ପଟ୍ଟନାୟକ କିଛି ବର୍ଷ ତଳେ ସେଇ ସମାନ ଜାଗାରେ ଥିଲେ ଓ ତାଙ୍କ ନାମରେ ଏମିତି ଅଭିଯୋଗ ସବୁ ରହିଥିଲା । ବିଜୟ ପଟ୍ଟନାୟକ ମୁଖ୍ୟମନ୍ତ୍ରୀଙ୍କ ପ୍ରମୁଖ ସଚିବ ଏବଂ ମୁଖ୍ୟ ଶାସନ ସଚିବ ଭାବରେ ନିରଙ୍କୁଶ କ୍ଷମତା ଉପଭୋଗ କରୁଥିବାରୁ ସେତେବେଳେ ବିଜେଡ଼ିର ଦ୍ଵିତୀୟ କ୍ଷମତା କେନ୍ଦ୍ର କୁହା ଯାଉଥିବା ପ୍ୟାରୀ ମୋହନ ମହାପାତ୍ର ତୀବ୍ର ଅସନ୍ତୋଷ ପ୍ରକାଶ କରିଥିଲେ । ପ୍ୟାରୀ ବାବୁଙ୍କ ବିକ୍ଷୋଭ ପଛରେ ବିଜୟ ପଟ୍ଟନାୟକଙ୍କର ମାତ୍ରାଧିକ କ୍ଷମତା ଏକ ବିଶେଷ କାରଣ ଥିଲା ।  

ପାଣ୍ଡିଆନଙ୍କ ବିଭିନ୍ନ ଜିଲା ଗସ୍ତ ଓ ତାଙ୍କ ଉପସ୍ଥିତିରେ ଓଡିଶାର ରାଜନୈତିକ ନେତୃତ୍ଵ ମଳିନ ପଡିଯାଉଥିବାର ଦୃଶ୍ୟ ଅନେକଙ୍କୁ ବିଚଳିତ କରୁଛି । ବିରୋଧୀ ଦଳ ଏହାକୁ ଏକ ବଡ ପ୍ରସଙ୍ଗ ବୋଲି ଭାବୁଛନ୍ତି । ଏହି ପ୍ରସଙ୍ଗରେ ବିଜେଡି ବିଧାୟକ ତଥା ଦୈନିକ ସମ୍ବାଦପତ୍ର “ସମ୍ବାଦ” ର ସମ୍ପାଦକ ସୌମ୍ୟରଞ୍ଜନ ପଟ୍ଟନାୟକ ଏକ ସମ୍ପାଦକୀୟ ଲେଖିବା ପରେ ଆଲୋଚନା ଆଉଟିକେ ସରଗରମ ହୋଇ ଉଠିଛି । ତେବେ ବିରୋଧୀ ପାଣ୍ଡିଆନଙ୍କୁ ଯେତେ ସମାଲୋଚନା କରୁଛନ୍ତି, ସେ ସେତିକି ଅଧିକ ଜିଲା ଗସ୍ତ କରୁଛନ୍ତି ଓ ଖୋଲାଖୋଲି ବିଭିନ୍ନ ପ୍ରକଳ୍ପ କାମରେ ସାମିଲ ହେଉଛନ୍ତି । ବିରୋଧୀଙ୍କ ସମାଲୋଚନା ପାଣ୍ଡିଆନଙ୍କ ସ୍ଥିତିକୁ ବିଗାଡିବା ପରିବର୍ତ୍ତେ ଅଧିକ ସୁଦୃଢ କରୁଛି । ବରଗଡର ଏକ ସଭାରେ ଭିକେ ପାଣ୍ଡିଆନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କର ଏକ ଟେଲିଫୋନ ବାର୍ତ୍ତା ଶୁଣାଇଲେ- ଯେଉଁଥିରେ ମୁଖ୍ୟମନ୍ତ୍ରୀ ତାଙ୍କୁ ଲୋକଙ୍କ ଖବର ବୁଝିବାକୁ ପଠାଇଛନ୍ତି ବୋଲି କହିଲେ । ଅର୍ଥାତ ମୁଖ୍ୟମନ୍ତ୍ରୀଙ୍କ ସଚିବ ମୁଖ୍ୟମନ୍ତ୍ରୀଙ୍କ ଚଳନ୍ତି ପ୍ରତିନିଧି ଭାବରେ ଏ କାମ କରୁଛନ୍ତି ।  ଏ ପ୍ରସଙ୍ଗରେ ରାଜନୀତି ବିଜ୍ଞାନର ଅଧ୍ୟାପକ ଥିବା ସୌମ୍ୟରଞ୍ଜନ ପଟ୍ଟନାୟକ ପଚାରିଛନ୍ତି ଯେ, ଆମ ଶାସନରେ ଡେଲିଗେସନ ଅଫ ପାୱାର ସମ୍ଭବ ନୁହେଁ । ମୁଖ୍ୟମନ୍ତ୍ରୀଙ୍କ ପଦବୀ ଓ କ୍ଷମତା ଆଉ କେହି ଉପଭୋଗ କରିପାରିବେ ନାହିଁ- ଏହା ହେଉଛି ସାମ୍ବିଧାନିକ ନିୟମ ।  

ଏଠି ବାବୁ ଭିକେ ପାଣ୍ଡିଆନ ମୁଖ୍ୟମନ୍ତ୍ରୀଙ୍କ ରାଜନୈତିକ ପ୍ରତିନିଧି ଭାବେ କାମ କରୁନାହାନ୍ତି । ସେ ଶାସନର ବିକାଶମୂଳକ କାମ ତଦାରଖ କରିବାକୁ ଫାଇଭ ଟି ସଚିବ ଭାବରେ କାମ କରୁଛନ୍ତି । ଶାସନ ବ୍ୟବସ୍ଥା ଅନୁଯାୟୀ ପାଣ୍ଡିଆନଙ୍କ କାମକୁ ବେଆଇନ କହିହେବ ନାହିଁ । ସେ କୌଣସି ରାଜନୈତିକ ମତ ବା ବାର୍ତ୍ତା ଦେଉନାହାନ୍ତି ।  ବିରୋଧୀ ତାଙ୍କ ଉପସ୍ଥିତିକୁ ରାଜନୈତିକ ବୋଲି କହିଲେ ସେଥିରେ ପାଣ୍ଡିଆନ ବିଚଳିତ ନହେବା ସ୍ଵାଭାବିକ ।  

୨୦୨୪ ସାଧାରଣ ନିର୍ବାଚନ ପୂର୍ବରୁ ବିରୋଧୀ ଦଳଙ୍କୁ ପାଣ୍ଡିଆନଙ୍କ ପଛରେ ଲଗାଇ ବିଜେଡି ନିଜ ନିର୍ବାଚନୀ ପ୍ରସ୍ତୁତି ଚଳାଇଛି । ବିରୋଧୀ ପକ୍ଷ ଲୋକଙ୍କ ବାସ୍ତବ ପ୍ରସଙ୍ଗ ନ ଉଠାଇ ଏକ ଅପ୍ରସଙ୍ଗକୁ ଏବେ ମୁଖ୍ୟ ପ୍ରସଙ୍ଗ ଭାବରେ ଉଠାଇ ଚାଲିଛନ୍ତି । ଯାହାକି ବିଜେଡ଼ିକୁ ବେଶ ସୁହାଉଛି ।

ଏ ପ୍ରସଙ୍ଗରେ ବିଜେପିର ସ୍ଥିତି ଅତି ବିକଳ ଅବସ୍ଥାରେ ରହିଛି । କେନ୍ଦ୍ରରେ ନବୀନ ଏବଂ ନରେନ୍ଦ୍ର ମୋଦୀଙ୍କ ଘନିଷ୍ଠ ସମ୍ପର୍କ ବିଷୟରେ ରାଜ୍ୟ ବିଜେପି ନେତାମାନେ ବେଶ ଅବଗତ । କେନ୍ଦ୍ର ଗୃହମନ୍ତ୍ରୀ ଅମିତ ଶାହ ବାରମ୍ବାର ନିଜର ଓଡିଶା ଗସ୍ତକୁ ବାତିଲ କରିବା ପଛରେ ବିଜେଡ଼ିକୁ ସନ୍ତୁଷ୍ଟ କରି ରଖିବାର ଏକ ବାର୍ତ୍ତା ରହିଛି । ଭିକେ ପାଣ୍ଡିଆନ ସର୍ବ ଭାରତୀୟ ସେବାର ଜଣେ ଅଧିକାରୀ ହୋଇଥିବାରୁ ତାଙ୍କୁ ବଦଳି କରିବାର କିମ୍ବା ଡେପୁଟେସନରେ ନେବାର ଅଧିକାର କେନ୍ଦ୍ର ସରକାରଙ୍କର ରଖିଛି । ନବୀନଙ୍କୁ ଅସନ୍ତୁଷ୍ଟ କରି ବିଜେପି ସେ କାମ ଆଦୌ କରିବାକୁ ଚାହୁଁନାହିଁ । ପାଣ୍ଡିଆନଙ୍କ ବିରୋଧରେ ବିଜେପି କେବଳ କାଗଜବାଘ ପରି ଗର୍ଜନ କରୁଛି, ଯାହାର କୌଣସି ପ୍ରଭାବ ଓଡିଶା ଲୋକଙ୍କ ଉପରେ ପଡୁନାହିଁ ।

ପାଣ୍ଡିଆନଙ୍କ ପ୍ରତି ବିରୋଧୀଙ୍କ ସମାଲୋଚନା ଯେତେ ବଢୁଛି, ଓଡିଶାର ସାମାଜିକ ଓ ରାଜନୈତିକ କ୍ଷେତ୍ରରେ ତାଙ୍କର ପତିଆରା ସେତିକି ବଢୁଛି । ବିରୋଧୀଙ୍କ ସମାଲୋଚନା ପାଣ୍ଡିଆନଙ୍କୁ ଜଣେ ପ୍ରଭାବଶାଳୀ ଶାସନ ସଚିବରୁ ଏବେ ଓଡିଶା ରାଜନୀତିର ସବୁଠୁ ବଡ ଚେହେରାରେ ରୂପାନ୍ତରିତ କରୁଛି ।