ଖରାର କ୍ରିସେଣ୍ଡୋ
କେଦାର ମିଶ୍ର
0
75
ଏକା ସାଙ୍ଗରେ ଜଳି ଉଠେ ଗୋଟେ ସହର ।
ଲାଲ-ଧଳା-ଗୋଲାପୀ ବୁଗେନଭିଲାର ରାସ୍ତା
ଶେଷ ଚଇତର ପଲାଶ
ସତର ମହଲା ଉପରେ ଦାଉ ଦାଉ ନୀଳରଙ୍ଗର କାଚ
ସିନେମା ପୋଷ୍ଟରରେ ଗାଢ ଲିପଷ୍ଟିକ
ସବୁଠି ଖରା
ସବୁଠି ନିଆଁ
ସବୁଠି ଟିକେ ଟିକେ ନିଆଁର ବିରଳ ଚୁମା ।
ଏକା ସାଙ୍ଗରେ ଉତ୍ତପ୍ତ ଛାତ ଓ ଛାତି ।
ଏବେ ତୀବ୍ରଲୟରେ ବାଜୁଛି
ଗୀଟାର ଓ ଭାଓଲିନ
ଗାୟକର ଗଳାରେ ଟକମକ ଏପ୍ରିଲ
ଡ୍ରମ ଓ ତବଲା
ଢୋଲ ଓ କଞ୍ଜିରା
ମହୁ ଓ ମଦିରା
ମଝି ଆକାଶରେ ବାଜୁଛି ସୁତୀବ୍ର ଅର୍କେଷ୍ଟ୍ରା
ତୀବ୍ରଲୟରେ ତରଳୁଛି
ଆମର ପ୍ରେମକାହାଣୀ ।
ଏ ପ୍ରଚଣ୍ଡ ଦହନର ଋତୁରେ
ମୋ ହାତରେ ଗୋଟେ ପ୍ରେମକାହାଣୀର ନକ୍ସା
ପୃଥିବୀର ସବୁ ବାଦ୍ୟଯନ୍ତ୍ରକୁ ଏକାକାର କରି
ମୁଁ ତିଆରି କରିଛି
ଏ ପ୍ରେମକାହାଣୀର ସିଗନେଚର ଧୁନ ।
ଏ ଧୂନରେ ଦହନ ଅଛି
ଏ ଧୂନରେ ମରଣ ଅଛି
ଏ ଧୂନରେ ଚୁମ୍ବନ ଅଛି
ଏ ଧୂନରେ ଏପ୍ରିଲ ଏପ୍ରିଲ ଗୋଟେ
ନିର୍ଦ୍ଧୂମ ଖରାର ସହର
ଏ ଧୂନ ଗୋଟେ ଅସରନ୍ତି ଶୋଷ
ତମ ପାଇଁ ମୋର
ଓ ମୋ ଲାଗି ତୁମର ।
