ଭାରତ ମାଝୀର ପ୍ରେମକବିତା
କେଦାର ମିଶ୍ର
0
192
ମୋର ଅଭିଯୋଗ –
ଭାରତ ମାଝୀ ପ୍ରେମକବିତା କାହିଁକି ଲେଖେନାଇଁ ।
ଭାରତର କବିତାରେ
ପ୍ରେମ ଥାଏ
ଆକାଶର ମେଘ ପରି
ଏଇନା ଅଛି, ଏଇନା ନାଇଁ
ଭାରତର କବିତାରେ
ପ୍ରଚୁର ଶୋଧା ବକା
ଠୋ ଠୋ ହସ, ଢୋ ଢୋ ବିଷ୍ଫୋରଣ
ଭାରତର କବିତା
ଫଟା କପାଳ ଓ ଫାଟି ଯାଉଥିବା
ଗୋଟେ ପୃଥିବୀର କବିତା ।
ଭାରତର ପ୍ରେମ ଶୁଖୁନଥିବା ଗୋଟେ ଘା’
ପ୍ରଚୁର କଷ୍ଟ ଓ ଘା’ ଉପରେ ଯନ୍ତ୍ରଣାର ଉତ୍ସବ ।
ମୋର ଅପେକ୍ଷା
ଭାରତ ମାଝୀ କେବେ ଦିନେ
ମଲ୍ଲିଫୁଲର ରକତ ନିଗାଡି
ଜହ୍ନରାତିରେ
କବିତାକୁ ବେହୋସ କରିଦେବ ।
ଲେଖିବ, ଭାରତ ମାଝୀ ପ୍ରେମକବିତା ଇ ଲେଖିବ ।
----
(ଆଜି ଆମ ସମୟର ଅନ୍ୟତମ ଶକ୍ତିଶାଳୀ କବି ଭାରତ ମାଝୀଙ୍କ ଜନ୍ମଦିନ । ବନ୍ଧୁ ଓ ସହକବି ପାଇଁ ଏଇ ଶୁଭେଛାର କବିତା।)
