ସତ୍ୟପାଲ ମଲ୍ଲିକଙ୍କ ସତ୍ୟର ପ୍ରମାଣ !!

ଜାମ୍ମୁ କାଶ୍ମୀରର ଶେଷ ରାଜ୍ୟପାଳ ସତ୍ୟପାଲ ମଲ୍ଲିକ ନରେନ୍ଦ୍ର ମୋଦୀ ସରକାରର କାଶ୍ମୀର ନୀତି ଉପରେ ଯେଉଁ ସବୁ ଅଭିଯୋଗ ଆଣିଛନ୍ତି, ସେ ସବୁର ଅକାଟ୍ୟ ପ୍ରମାଣ ଖୋଦ ମୋଦୀ ସରକାର ହିଁ ଦେଇଛନ୍ତି । ମଲ୍ଲିକଙ୍କର ବିଷ୍ଫୋରକ ସାକ୍ଷାତ୍କାର ପ୍ରକାଶିତ ହେବାର ସପ୍ତାହେ ଭିତରେ ମୋଦୀ ସରକାରଙ୍କ ପୋଶା ଶୁଆ ସିବିଆଇ ସତ୍ୟପାଲ ମଲ୍ଲିକଙ୍କୁ  ସମନ କରିଛି । ଅବଶ୍ୟ ମଲ୍ଲିକ ନିଜେ ଯେହେତୁ ରିଲାଏନ୍ସ ଘୋଟାଲା ସମ୍ପର୍କରେ ଅଭିଯୋଗକାରୀ ସାକ୍ଷୀ ଭାବରେ ତାଙ୍କର ବୟାନ ଜରୁରୀ । ଏକାଧିକ ଥର ସତ୍ୟପାଲ ମଲ୍ଲିକ କହିଛନ୍ତି ଯେ କାଶ୍ମୀରର ସରକାରୀ କର୍ମଚାରୀଙ୍କ ପାଇଁ ଅନୀଲ ଅମ୍ବାନୀ ଗୋଷ୍ଠୀର ବୀମା ଏକ ବଡ ଘୋଟାଲା ଥିଲା । ରିଲାଏନ୍ସ ବୀମା କମ୍ପାନୀ ସହିତ ହୋଇଥିବା କାଶ୍ମୀର ସରକାରଙ୍କ ଚୁକ୍ତିକୁ ବାତିଲ ନ କରିବା ପାଇଁ ବିଜେପିର ତତ୍କାଳୀନ ସାଧାରଣ ସମ୍ପାଦକ ତଥା ସଂଘର  ପ୍ରଭାବଶାଳୀ ନେତା ରାମ ମାଧବ ଏବଂ କାଶ୍ମୀରର ପୂର୍ବତନ ଅର୍ଥମନ୍ତ୍ରୀ ହାସିବ ଡ୍ରାବୁ ତାଙ୍କ ଉପରେ ଚାପ ପକାଇଥିଲେ ବୋଲି ଶ୍ରୀ ମଲ୍ଲିକ ବାରମ୍ବାର କହି ଆସିଛନ୍ତି । ରାଜ୍ୟପାଳ ଏ ପ୍ରସଙ୍ଗରେ ପ୍ରଧାନମନ୍ତ୍ରୀଙ୍କୁ ଜଣାଇଥିବା କଥା ମଧ୍ୟ କହିଛନ୍ତି ।

ରାଜ୍ୟପାଳ ସତ୍ୟପାଳ ମଲ୍ଲିକ ଯେ ଏ ପ୍ରସଙ୍ଗରେ ସତ୍ୟ କହିଛନ୍ତି, ତାର ପ୍ରମାଣ ସିବିଆଇ ଦେଇଛି । ଏହି ମାମଲାର ତଦନ୍ତ ଗତ କିଛି  ବର୍ଷ ହେଲା ସିବିଆଇ କରୁଛି । ତେବେ ମାମଲାରେ ଅଭିଯୁକ୍ତ ରାମ ମାଧବ, ହସିବ ଡ୍ରାବୁ ଏବଂ ଅନୀଲ ଅମ୍ବାନୀଙ୍କୁ ଏ ବିଷୟରେ ସିବିଆଇ ଡାକି ପଚରା ଉଚୁରା କରିବା କିମ୍ବା ସେମାନଙ୍କ ଗିରଫଦାରୀ ବିଷୟରେ ଚିନ୍ତା କରିବାକୁ ସିବିଆଇ ଉଚିତ ଭାବିନାଇଁ । କାଶ୍ମୀର ପ୍ରସଙ୍ଗରେ ରାଜ୍ୟପାଳ ମଲ୍ଲିକ ସିଧା ସିଧା ପ୍ରଧାନମତ୍ରୀଙ୍କୁ ପ୍ରଶ୍ନ କରିବା ପରେ ଏବେ ତାଙ୍କୁ ଇ ସିବିଆଇ ଜେରା କରିବାକୁ ଡାକିଛି ।

ମୋଦୀ ସରକାରର ଗୋଟେ ଭଲ ଗୁଣ ହେଉଛି, ରାଜନୀତିରେ ଯେ କୌଣସି ଅନୈତିକ କାମ କରିବାକୁ ଏହା ଭୟ କରେ ନାହିଁ ଓ ନିଜ ବିରୋଧୀଙ୍କୁ ନିର୍ଲଜ ଭାବରେ ଓ ଖୋଲାଖୋଲି ହଇରାଣ କରିବାର ପ୍ରକ୍ରିୟାକୁ ଏହା ଲୁଚାଇବାକୁ ଉଚିତ ବୋଲି ଭାବେ ନାଇଁ । ଯେ ହେତୁ ସତ୍ୟପାଳ ମଲ୍ଲିକ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ “ଦୁର୍ନୀତି ପ୍ରତି ବେଶ ଉଦାର” ଏବଂ “କାଶ୍ମୀର ପ୍ରସଙ୍ଗରେ ଅତ୍ୟନ୍ତ ଅଜ୍ଞ” ବୋଲି କହିଛନ୍ତି, ତେଣୁ ତାଙ୍କୁ ଏଥିପାଇଁ ମୂଲ୍ୟ ଦେବାକୁ ପଡିବ । ଯିଏ ମୋଦୀ ସରକାରକୁ  ବିରୋଧ କଲା ତା ପଛରେ ମୋଦୀ ସରକାର ବିନା ଦ୍ଵିଧାରେ ନିଜ ପୋଷା ଏଜେନ୍ସିମାନଙ୍କୁ ଲଗାଇବେ- ଏହା ହିଁ ତାଙ୍କର ବୀରତ୍ଵ ।  

ପୁଲୱାମାରେ ୪୦ ଜଣ ଯବାନଙ୍କ ସହିଦ ହେବା  ପ୍ରସଙ୍ଗରେ ଯେଉଁ ନିର୍ଦ୍ଦିଷ୍ଟ ସୁରକ୍ଷା ତ୍ରୁଟି କଥା ରାଜ୍ୟପାଳ ମଲ୍ଲିକ କହିଥିଲେ- ସେ ବିଷୟରେ ମୋଦୀ ସରକାରର ପାଟି ଫିଟୁ ନାହିଁ । ମୋଦୀ ସରକାର ଦେଶବାସୀଙ୍କୁ ଉତ୍ତର ଦେବାର ଆବଶ୍ୟକତା ଅଛି ଯେ-

• କାହିକି ସିଆରପିଏଫର ଅନୁରୋଧ ସତ୍ତ୍ୱେ ଯବାନଙ୍କୁ ବିମାନ ଯୋଗେ ସ୍ଥାନାନ୍ତରିତ କରାଗଲା ନାହିଁ? ଗୃହ ବିଭାଗ ଏ ପ୍ରସଙ୍ଗରେ ଉତ୍ତର କାହିଁକି ଦେଉନାହିଁ ?
• ପୁଲୱାମା ରାସ୍ତାକୁ ସଂଯୋଗ କରୁଥିବା ରାସ୍ତା ଗୁଡିକରେ ସୁରକ୍ଷା ବ୍ୟବସ୍ଥା କାହିଁକି ହୋଇନଥିଲା ?
• ଏତେ ପରିମାଣର ଆରଡିଏକ୍ସ ଥିବା ଏକ ଗାଡିକୁ ଏତେ ଦିନ ଧରି କେହି କେମିତି ଠାବ କରିପାରିଲେ ନାହିଁ ?
• ପୁଲୱାମାରେ ଏତେ ବଡ ଦୁର୍ଘଟଣା ଘଟୁଥିବା ସମୟରେ ପ୍ରଧାନମନ୍ତ୍ରୀ ମୋଦୀ ସିନେମା ଶୁଟିଙ୍ଗ ରେ ବ୍ୟସ୍ତ ଥିଲେ ନା ନାଇଁ ?
• ସୁରକ୍ଷା ପ୍ରସଙ୍ଗରେ ରାଜ୍ୟପାଳ ମଲ୍ଲିକଙ୍କୁ ଚୁପ ରହିବାକୁ ପ୍ରଧାନମନ୍ତ୍ରୀ ମୋଦୀ ଏବଂ ଜାତୀୟ ସୁରକ୍ଷା ପରାମର୍ଶଦାତା ଅଜିତ ଦୋଭାଲ ଚାପ ପକାଇଥିଲେ କାହିଁକି ?

ଏ ସବୁ ପ୍ରଶ୍ନର ଉତ୍ତର ନ ରଖି ସତ୍ୟପାଲ ମଲ୍ଲିକଙ୍କ ପଛରେ ସିବିଆଇକୁ ଲଗାଇଲେ ସତ୍ୟ ଲୁଚିଯିବ ନାଇଁ । ସବୁଠୁ ମଜା କଥା ହେଉଛି –ସତ୍ୟପାଲ ମଲ୍ଲିକଙ୍କ ସାକ୍ଷାତକାରକୁ ଅଣଦେଖା କରିଥିବା ଆମର ଗଣମାଧ୍ୟମ ଏବେ ସିବିଆଇ ସମନ ବିଷୟରେ ବଡ ଖବର ଦେଖାଉଛି । ଆଜି ପ୍ରଶ୍ନ ଉଠୁଛି, ରିଲାଏନ୍ସ ଦୁର୍ନୀତି ମାମଲାରେ ରାମ ମାଧବଙ୍କୁ ସିବିଆଇ ଜେରା କରିବ କେବେ ?  ରାମ ମାଧବଙ୍କ ଭଳି ସଂହାର ଆହୁରି ଅନେକ ନେତା କାଶ୍ମୀରରେ ପ୍ରଶାନ ଉପରେ ଚାପ ପକାଇ କାମ ହାସଲ କରୁଥିବା ଖବର ଏବେ ଆସୁଛି । ସିବିଆଇ ସେମାନଙ୍କୁ କେବେ ଧରିବ? ହସିବ ଡ୍ରାବୁ ଏବଂ ଅନୀଲ ଅମ୍ବାନୀ କେବେ ସିବିଆଇ ପଞ୍ଝାକୁ ଆସିବେ ?

ସତ୍ୟପାଲ ମଲ୍ଲିକ ବିରୋଧୀ ଦଳ ନେତା ନୁହନ୍ତି । ତାଙ୍କୁ ଖୋଦ ମୋଦୀ ସରକାର କାଶ୍ମୀର ଦାୟିତ୍ଵ ଦେଇଥିଲା ଓ ତାଙ୍କରି ସମୟରେ କାଶ୍ମୀରରୁ ଧାରା ୩୭୦ ହଟିଥିଲା । ତେଣୁ ତାଙ୍କୁ ସିବିଆଇର ଡର ଦେଖାଇ ଚୁପ କରାଇବାର ପ୍ରକ୍ରିୟା  ମୋଦୀ ସରକାର ପାଇଁ ଆତ୍ମଘାତୀ ହୋଇପାରେ ।