ନାଚ
ବୀଣାପାଣି ଦେବତା
0
48
ମୁଁ ନାଚି ଚାଲିଛି କଣ୍ଢେଇ ନାଚ
ଶବ୍ଦର ଡୋର, କାଠର ହାତ
କାଗଜର ମଂଚ ।
ତୁମେ କହିଲ, ଲଢେଇ କର
ମାଡ଼ି ଆସୁଛି ଅଂଧାର
ମୁଁ ବାଡ଼ି ବୁଲେଇଲି ।
କହିଲ, ଭାଂଗ ହାଟ ଗହଳି , ଏ ଭାରି ଗାଉଁଲୀ
ବଜାର କର ଉଦାର ହୁଅ
ଆଖିରେ ପିଂଧିଲି ତୁମ ଜ୍ଞାନର କଜଳ ।
ଭୂଇଁ ପାଣି ପବନ
ପ୍ରେମ ବନ୍ଧୁତା ବାତ୍ସଲ୍ୟ
ଓଡ଼ିଶୀ ସାଂତାଳି ମଣିପୁରୀ
ସବୁ ମୁଦ୍ରାମୟ ।
ସ୍ୱର ତୁମର ମାଇକ ତୁମର
ତୁମର କିଣା ଉତ୍ତରୀୟ
ଏକାଟିଆ ଘର ଫେରିବା ବାଟରେ
ମୁଁ ଖୋଜିଚାଲିଛି ନିଜର ହାତ ,ନିଜର କଣ୍ଠସ୍ୱର
ସେଇ ଅଭିନୟ ରଜନୀରେ ବିସ୍ଥାପିତ
ହୋଇଯାଇଛି ବି
ମୋର ହୃଦୟ ।
