ମୋଦୀଙ୍କ ଏଣ୍ଟାୟାର ପଲିଟିକାଲ ସାଇନ୍ସ ପ୍ରମାଣପତ୍ର : ସତ୍ୟ ଓ ସନ୍ଦେହ

ଗୋଟେ ଅଦ୍ଭୁତ ଦେଶରେ ଆମେ ରହୁଛୁ । ଏଠି ପ୍ରତିଦିନ ମହାତ୍ମା ଗାନ୍ଧୀଙ୍କ ଡିଗ୍ରୀ ବିଷୟରେ ଶାସକ ଦଳର ବଡ ନେତାମାନେ ପ୍ରଶ୍ନ କରୁଛନ୍ତି, ହେଲେ ଆଜିର ପ୍ରଧାନମନ୍ତ୍ରୀଙ୍କ ପାଠ ପଢା କେତେ, ସେ କଥା ଜାଣିବାର ଅଧିକାର କାହାର ନାହିଁ । ଇଂଲଣ୍ଡର ଲଣ୍ଡନ ବିଶ୍ୱବିଦ୍ୟାଳୟ ଅନ୍ତର୍ଗତ ପ୍ରସିଦ୍ଧ ଇନର ଟେମ୍ପଲ କଲେଜରୁ ବାରିଷ୍ଟର ହୋଇଥିବା ଜାତିର ପିତାଙ୍କ ଡିଗ୍ରୀ ଉପରେ ସନ୍ଦେହ କରୁଥିବା ଲୋକେ ତାଙ୍କ ଦଳର ନେତାଙ୍କ ଡିଗ୍ରୀ ଲୁଚାଉଛନ୍ତି କାହିଁକି? ସବୁଠୁ ଆଶ୍ଚର୍ଯ୍ୟର କଥା ହେଲା, ଗୁଜରାଟ ହାଇକୋର୍ଟ ଏ ସମ୍ପର୍କିତ ତଥ୍ୟ ମାଗିଥିବାରୁ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ଙ୍କୁ ୨୫ ହଜାର ଟଙ୍କାର ଜରିମାନା ଦେବାକୁ ଆଦେଶ ଦେଇଛନ୍ତି ।

ତେବେ ଗୁଜରାଟ ହାଇକୋର୍ଟଙ୍କ ଏ ଆଦେଶ ବି ବଡ ବିଚିତ୍ର । ଗୁଜରାଟ ହାଇକୋର୍ଟରେ ଏ ସଙ୍କ୍ରାନ୍ତରେ ଦିଲ୍ଲୀ ମୁଖ୍ୟମନ୍ତ୍ରୀ କୌଣସି ଆବେଦନ କରିନଥିଲେ । ଅରବିନ୍ଦ କେଜ୍ରିୱାଲ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଶିକ୍ଷାଗତ ଯୋଗ୍ୟତାର ପ୍ରମାଣପତ୍ର ଦେଖିବାକୁ ଦେଶର ମୁଖ୍ୟ ସୂଚନା କମିଶନରଙ୍କ ପାଖରେ ଆବେଦନ କରିଥିଲେ । ସୂଚନା କମିଶନର ଏ ସମ୍ପର୍କରେ ତଥ୍ୟ ରଖିବାକୁ ଗୁଜରାଟ ବିଶ୍ଵ ବିଦ୍ୟାଳୟକୁ ନିର୍ଦ୍ଦେଶ ଦେଇଥିଲେ । ତେବେ ସୂଚନା କମିଶନରଙ୍କ ନିଷ୍ପତ୍ତି ବିରୋଧରେ ଗୁଜରାଟ ବିଶ୍ଵ ବିଦ୍ୟାଳୟ ହାଇକୋର୍ଟ ଯାଇଥିଲେ । ତାର ବିଚାର କରି ହାଇକୋର୍ଟ ସୂଚନା କମିଶନରଙ୍କ ନିର୍ଦ୍ଦେଶକୁ ଖାରଜ କରିବା ସହିତ ଅରବିନ୍ଦ କେଜ୍ରିୱାଲଙ୍କ ଉପରେ ଜରିମାନା ଲଗାଇଛନ୍ତି । ଗୁଜରାଟ ବିଶ୍ଵ ବିଦ୍ୟାଳୟ ମୁଖ୍ୟ ସୂଚନା କମିଶନରଙ୍କ ନିର୍ଦ୍ଦେଶ ବିରୋଧରେ ଅପିଲ କରିଥିଲେ, ହେଲେ ହାଇକୋର୍ଟ ଅରବିନ୍ଦ କେଜ୍ରିୱାଲଙ୍କୁ ଦଣ୍ଡିତ କରିବାର ଆଧାର କଣ ବୁଝାପଡୁନି ।

ସୌଜନ୍ୟ - ଦ ହିନ୍ଦୁ

ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଶିକ୍ଷାଗତ ଯୋଗ୍ୟତାକୁ ନେଇ ଆମ ଆଦମୀ ପାର୍ଟି ବାରମ୍ବାର ପ୍ରଶ୍ନ ପଚାରି ଆସୁଛି । ଏ ପ୍ରସଙ୍ଗରେ ୯, ମଇ, ୨୦୧୬ ଦିନ ତତ୍କାଳୀନ ବିଜେପି ସଭାପତି ଅମିତ ଶାହ ଏବଂ ଅର୍ଥମନ୍ତ୍ରୀ ଅରୁଣ ଜେଟଲି ଏକ ସାମ୍ବାଦିକ ସମ୍ମିଳନୀରେ ନରେନ୍ଦ୍ର ମୋଦୀ “ଏଣ୍ଟାୟାର ପଲିଟିକାଲ ସାଇନ୍ସ”ରେ ଏମଏ କରିଥିବାର ପ୍ରମାଣପତ୍ର ଉପସ୍ଥାପନ କରିଥିଲେ । ସେହି ସାମ୍ବାଦିକ ସମ୍ମିଳନୀରେ ଉପସ୍ଥାପିତ ପ୍ରମାଣପତ୍ରକୁ ନେଇ ସନ୍ଦେହ ଭିନ୍ନ ଭିନ୍ନ ସମୟରେ ଆସିଛି । ତେବେ ଏ ପ୍ରସଙ୍ଗରେ ଗୁଜରାଟ ହାଇକୋର୍ଟ ଏତେ କ୍ରୋଧିତ ହେବାର କାରଣ କଣ ?

ଯଦି ପ୍ରଧାନମନ୍ତ୍ରୀ ସତରେ “ଏଣ୍ଟାୟାର ପଲିଟିକାଲ ସାଇନ୍ସ”ରେ ଏମଏ କରିଛନ୍ତି, ତା ହେଲେ ସେମିତି ଏକ ବିଷୟ ରହିଛି କି ନାହିଁ, ତାହା ଜାଣିବାର ଅଧିକାର ଲୋକଙ୍କର ନିଶ୍ଚୟ ରହିଛି । ସର୍ବ ସାଧାରଣରେ ରହିଥିବା ତଥ୍ୟକୁ ନେଇ ଯଦି କିଛି ସନ୍ଦେହ ରହିଛି, ତା ହେଲେ ତାର ନିରାକରଣ ଲାଗି ସମ୍ପୃକ୍ତ ବିଶ୍ଵ ବିଦ୍ୟାଳୟ ବା ଅନୁଷ୍ଠାନ ଚେଷ୍ଟା କରିବା କଥା । ପ୍ରଧାନମନ୍ତ୍ରୀଙ୍କ ଭଳି ବ୍ୟକ୍ତି ଯଦି ଗୋଟେ ଅନୁଷ୍ଠାନରୁ ଉତ୍ତୀର୍ଣ୍ଣ ହୋଇଥାନ୍ତି, ତାହା ସେ ଅନୁଷ୍ଠାନର ଗୌରବର କାରଣ । ପ୍ରଧାନମନ୍ତ୍ରୀଙ୍କ ପରୀକ୍ଷା ପ୍ରମାଣପତ୍ର ପ୍ରଦର୍ଶନୀର ବିଷୟ ହେବା କଥା । ହେଲେ ଏହାକୁ ଅଯଥାରେ ଲୁଚାଇବାକୁ ଚେଷ୍ଟା କରାଯାଉଛି କାହିଁକି ?  

ପ୍ରଧାନମନ୍ତ୍ରୀଙ୍କ ପ୍ରମାଣପତ୍ର ମାମଲାରେ ଯୁକ୍ତି ବାଢିବା ଲାଗି ଦେଶର ସଲିସିଟର ଜେନେରାଲ ଗୁଜରାଟ ହାଇକୋର୍ଟ ଯାଉଛନ୍ତି । ସଲିସିଟର ଜେନେରାଲ ତୁଷାର ମେହେଟା ବୋଧହୁଏ ଦେଶର ଏକମାତ୍ର ସରକାରୀ ଓକିଲ ଯିଏ ତଳୁ ଉପର ସବୁ ଅଦାଲତରେ ମୋଦୀ-ଶାହଙ୍କ ସବୁ ମକଦ୍ଦମା ପରିଚାଳନା କରନ୍ତି । ଗୁଜରାଟ ହାଇକୋର୍ଟରେ ତୁଷାର ମେହେଟାଙ୍କ ଯୁକ୍ତି ଥିଲା –ଅରବିନ୍ଦ କେଜ୍ରିୱାଲଙ୍କ ପିଲାଳିଆ ଆଗ୍ରହର ଉତ୍ତର ରଖିବା ଅନାବଶ୍ୟକ ।

ଏଠି ପ୍ରଶ୍ନ ଉଠୁଛି, ଯଦି କେଜ୍ରିୱାଲଙ୍କ ଆଗ୍ରହ ପିଲାଳିଆ ତାହେଲେ, ତାର ଉତ୍ତର ଖୋଦ ବିଜେପି ସଭାପତି ଓ ଅର୍ଥମନ୍ତ୍ରୀ ସେତେବେଳେ ଦେଉଥିଲେ କାହିଁକି ? ସେତେବେଳେ ଯେଉଁ ପ୍ରମାଣପତ୍ର ବିଜେପି ନିଜେ ଉପସ୍ଥାପନ କରିଥିଲା ତାର ଅସଲ କପି ଦେଖାଇବାରେ ଅସୁବିଧା କଣ ଅଛି ? ଦେଶର ସର୍ବୋଚ୍ଚ କ୍ଷମତାରେ ଥିବା ବ୍ୟକ୍ତିଙ୍କର ଶିକ୍ଷାଗତ ଯୋଗ୍ୟତା କଣ ଏକ ଗୋପନୀୟ ଏବଂ ବ୍ୟକ୍ତିଗତ ବ୍ୟାପାର ?

ବର୍ଷ ବର୍ଷ ଧରି “ଏଣ୍ଟାୟାର ପଲିଟିକାଲ ସାଇନ୍ସ”ରେ ଏମଏ ପ୍ରସଙ୍ଗକୁ ନେଇ ଲୋକଙ୍କ ମନରେ ରହିଥିବା ସନ୍ଦେହ ଗୁଜରାଟ ହାଇକୋର୍ଟଙ୍କ ରାୟ ପରେ ଅଧିକ ବଢିଯାଇଛି ।