ବଦ୍ରୀ ନାରାୟଣଙ୍କ ଦୁଇଟି କବିତା
କେଦାର ମିଶ୍ର
ସମକାଳୀନ ହିନ୍ଦୀ କବିତାର ଚର୍ଚ୍ଚିତ କବି ବଦ୍ରୀ ନାରାୟଣଙ୍କୁ ଚଳିତ ବର୍ଷର ସାହିତ୍ୟ ଏକାଡେମୀ ପୁରସ୍କାର ମିଳିଛି । "ସଚ ଶୁନେ କଇ ଦିନ ହୁଏ", "ଶବ୍ଦପଦୀୟମ", "ଖୁଦାଇ ମେ ହିଂସା" ଭଳି ଚର୍ଚ୍ଚିତ କବିତା ସଙ୍କଳନର ସ୍ରଷ୍ଟା ବଦରୀ ନାରାୟଣ ଜଣେ ଚର୍ଚ୍ଚିତ ଐତିହାସିକ ମଧ୍ୟ । ଉତ୍ତର ଭାରତର ରାଜନୈତିକ ଇତିହାସ ରଚନାରେ ତାଙ୍କର ବିପୁଳ ଖ୍ଯାତି ରହିଛି ।
ମହାନାୟକ
ସେ ଏକ ଆଶ୍ଚର୍ୟ ସକାଳ ଥିଲା
ଯାହା ମୁଁ ଲେଖିବାକୁ ଚାହୁଁ ଥିଲି, ପାରୁ ନଥିଲି
ଯାହା ଭାବିବାକୁ ଚାହୁଁ ଥିଲି, ପାରୁ ନଥିଲି
ମୁଣ୍ଡକୁ ଆସୁନଥିଲା କିଛି ବି ଶବ୍ଦ
ଏପରିକି କମା, ହଳନ୍ତ ବି ହଜି
ଯାଇଥିଲେ ।
ମୁଁ ଖୋଲିଦେଲି ସ୍ମୃତିର ସବୁ ଦୁଆର
ଖୋଲିଦେଲି ମନ ତଳର ସବୁ ଆଖି
ଦଶ ଦ୍ଵାର, ଚଉଦ ଭୁବନ, ଚଉରାଅଶୀ ଲୋକ
ଘୂରି ଆସିଲି
ମାଟି ଓ ଆକାଶ ଏକାକାର କଲି ।
କେଉଁଠି ବି ପାଇଲି ନାହିଁ ଗୋଟେ ଶବ୍ଦ
କି ଭୁଲ ହେଲା କେଜାଣି
ବୁଝି ପାରିଲିନି ।
ଧୀରେ ଧୀରେ ଏଇ ଝଟକାରୁ ମୁକୁଳିଲା ପରେ ବୁଝିଲି
ଇଏ ଥିଲା ମୋ ବିରୋଧରେ
ଶବ୍ଦମାନଙ୍କର ଏକ ମହାନ ବିଦ୍ରୋହ
ଏକ ମହାନ ମେଳି
ଏକ ସଚେତନ ପ୍ରତିବାଦ ।
ଏ ବିଦ୍ରୋହର କାରଣ – ଯେବେ ବି ମୁଁ ଶବ୍ଦ ଯୋଡିଛି
ବାକ୍ୟ ଇ ଲେଖିଛି
ମୁଁ ଶବ୍ଦମାନଙ୍କୁ ନିଜ ଲାଗି ଇ ଉପଯୋଗ କରିଛି ।
ନିଜ ବିଷୟରେ ଲେଖିଛି
ନିଜର ଗୁଣଗାନ କରିଛି
ନିଜର ସୁଖକୁ ଗାଇଛି
ନିଜର ଦୁଃଖକୁ ଗାଇଛି
ମୁଁ ଶବ୍ଦରେ ନିଜକୁ କରିଛି ଗୌରବାନ୍ଵିତ
ଆତ୍ମସର୍ବସ୍ଵ: ଆତ୍ମରତିରେ ନିମଗ୍ନ ରହିଛି ।
ଶବ୍ଦମାନେ ଜାଣିଥିଲେ
ଏଇ ପ୍ରବୃତ୍ତି ମୋତେ ଏକଛତ୍ରବାଦୀ କରିଦେବ
ଅବା ମୋତେ କରିଦେବ ପାଗଳ କିମ୍ବା ବେକାର
ଶବ୍ଦମାନେ ଚାହୁଁ ନଥିଲେ ସେମିତି କିଛି ହେଉ ମୋର ।
ଶବ୍ଦମାନେ ଜାଣିଥିଲେ
ମୋ ଭିତରେ ନା ଅଛି ପ୍ରତିବାଦ
ନା ଅଛି ପ୍ରେମ
ନା ବଞ୍ଚିଛି ମୋ ଭିତରେ ପାଗଳ ପ୍ରେରଣା ।
ସେଥିଲାଗି ଜଣେ ମହାନାୟକର ନେତୃତ୍ବରେ
ଶବ୍ଦମାନେ ମୋ ବିରୋଧରେ
ଘୋଷଣା କରିଛନ୍ତି ବିଦ୍ରୋହ ।
ପ୍ରେମପତ୍ର
ପ୍ରେତ ଆସିବ ତ ବହି ଭିତରୁ
ବାହାର କରି ନେଇଯିବ ପ୍ରେମପତ୍ର
ଶାଗୁଣା ତାକୁ ନେଇ
ପାହାଡ ଉପରେ ଝୁଣି ଝୁଣି ଖାଇବ ।
ଚୋର ଆସିବ ତ ଚୋରେଇ ନେବ ପ୍ରେମପତ୍ର
ଜୁଆରୀ ପ୍ରେମପତ୍ରକୁ
ଲଗାଇବ ବାଜିରେ
ଋଷି ଆସିଲେ ପ୍ରେମପତ୍ରକୁ ମାଗିବେ ଦାନରେ ।
ବର୍ଷା ଆସିବ ତ ଭିଜେଇ ଦେଇଯିବ ପ୍ରେମପତ୍ର
ନିଆଁ ଆସି ପୋଡି ଦେଇଯିବ ପ୍ରେମପତ୍ର
ସାପ ଆସିବ ତ ଦଂଶିବ ପ୍ରେମପତ୍ରକୁ
ଝିଙ୍କାରୀ ଚାଟି ଖାଇବ ପ୍ରେମପତ୍ର
କୀଟମାନେ ପ୍ରେମପତ୍ର ଇ କାଟିବେ ।
ପ୍ରଳୟ କାଳରେ ସପ୍ତର୍ଷି, ମନୁ ଓ ମତ୍ସ୍ୟାବତାର
ବଞ୍ଚେଇବେ ବେଦକୁ
କେହି ବଞ୍ଚାଇବାକୁ ନଥିବେ ପ୍ରେମପତ୍ର ।
କିଏ ବଞ୍ଚେଇବ ରୋମ କିଏ ବା ମଦିନା
କିଏ ବଞ୍ଚାଇବ ରୂପା କିଏ ବା ସୁନା
ମୁଁ ନିପଟ ଏକଲା
କେମିତି ବଞ୍ଚେଇ ରଖିବି ତୁମର ପ୍ରେମପତ୍ର !!
ଅନୁବାଦ - କେଦାର ମିଶ୍ର
