ଜଣେ ଯୌନ ଅପରାଧୀର ସମର୍ଥକ ଓ ଭକ୍ତଙ୍କ ପ୍ରସଙ୍ଗରେ

ଗତକାଲି ଯେତେବେଳେ ଏ ଦେଶର ସବୁଠୁ ସଫଳ ଏବଂ ଗୌରବଶାଳୀ କୁସ୍ତିଯୋଦ୍ଧାମାନେ ନିଜ ନିଜର ମେଡାଲ ଧରି ସେସବୁକୁ ଗଙ୍ଗାରେ ପ୍ରବାହିତ କରିଦେବାକୁ ବାହାରିଲେ, ତାହା ଯେ କୌଣସି ସଭ୍ୟ ଦେଶର ବିବେକକୁ ଦୋହଲାଇ ଦେବାକୁ ବାଧ୍ୟ । ତାହା ହେଲା ବି। ଏ ଦେଶର ଶିକ୍ଷିତ ଏବଂ ସଭ୍ୟ ଜନତାର ତୀବ୍ର ପ୍ରତିକ୍ରିୟା ସୋସିଆଲ ମିଡିଆରେ ପ୍ରକାଶ ପାଇଲା । ତେବେ ଏହି ଘଟଣାରେ ଯଦି କିଏ ବିଚଳିତ ନ ହୋଇ, ଆମର ସବୁଠୁ ସମ୍ମାନୀତ ଖେଳାଳୀଙ୍କ ବିରୋଧରେ ବିଷୋଦଗାର କଲା, ସେ ଥିଲା ଏ ଦେଶରେ ସରକାରକୁ ସମର୍ଥନ କରୁଥିବା ଏକ ବିବେକହୀନ ଗୋଷ୍ଠୀ । ଗତ ୯ ବର୍ଷ ଧରି ସରକାରକୁ ସମର୍ଥନ କରୁଥିବା ଏ ଗୋଷ୍ଠୀ କେବଳ ବିବେକହୀନ ନୁହନ୍ତି, ଏମାନେ ସାଧାରଣତଃ ମୁଣ୍ଡ ନଥିବା ଗୋଟେ ବିରଳ ପ୍ରଜାତିର ମେଣ୍ଢା। ଏମାନେ କେବଳ ଜଣେ ନେତାଙ୍କୁ ଭକ୍ତି କରନ୍ତି ଓ ତାଙ୍କ ବିରୋଧରେ ଯିଏ କୁହେ ତାକୁ ଗାଳି କରନ୍ତି । ଏମାନେ ନିଜ ଝିଅ, ଭଉଣୀ କିମ୍ବା ମା ର ସମ୍ମାନ ଅପେକ୍ଷା ଶାସକ ଦଳର ଗୋଟେ ଗୁଣ୍ଡା ପଛରେ ଠିଆ ହେବାକୁ ନିଜର କର୍ତ୍ତବ୍ୟ ବୋଲି ଭାବନ୍ତି । କହିବାରେ ଦ୍ଵିଧା ନାହିଁ, ଭାରତୀୟ କୁସ୍ତି ମହାସଂଘର ପୂର୍ବତନ ଅଧ୍ୟକ୍ଷ ତଥା ବିଜେପି ସାଂସଦ   ବ୍ରିଜଭୁଷଣ ଶରଣ ସିଂଙ୍କ ନାଁରେ ୪୦ ରୁ ଅଧିକ ଅପରାଧ ମାମଲା ରହିଛି ଓ ଅନେକଥର କ୍ୟାମେରା ଆଗରେ ସେ ନିଜର ହିଂସ୍ର ଚେହେରା ଓ ଚରିତ୍ର ଦେଖାଇଛନ୍ତି।

ଇତିହାସରେ ଏ ସମୟ ଗୋଟେ କଳଙ୍କିତ ସମୟ ହୋଇ ଲେଖା ହେବ, କାରଣ ଜଣେ ପେଷାଦାର ଅପରାଧୀ ସପକ୍ଷରେ ଏ ଦେଶର ଶାସକ ଦଳ ଏବଂ ତଥାକଥିତ ସାଧୁସନ୍ଥ ସମର୍ଥକ ଭାବରେ ଛିଡା ହୋଇଛନ୍ତି। ଦେଶର ସବୁଠୁ ଗୌରବଶାଳୀ ଖେଳାଳୀଙ୍କୁ ଗାଳି କରି ଜଣେ ଅପରାଧୀ ପଛରେ ଠିଆ ହୋଇଥିବା ଏ ଜୀବମାନଙ୍କୁ ଆମେ କଣ ବୋଲି କହିବା?

ଏଠି ଆଉ ଗୋଟେ ପ୍ରସଙ୍ଗ ମଧ୍ୟ କହିବା ଜରୁରୀ । ଆନ୍ତର୍ଜାତିକ ପଦକ ବିଜେତା ଏ କୁସ୍ତିଯୋଦ୍ଧାମାନେ ସରକାର ବିରୋଧୀ ଆନ୍ଦୋଳନ କରୁଛନ୍ତି କି ? ଯେମିତି କୃଷକ ଆନ୍ଦୋଳନ ସଂପୂର୍ଣ୍ଣ ଭାବରେ ସରକାର ବିରୋଧୀ ଥିଲା, ଅନ୍ତତଃ ପ୍ରଥମ ଦୁଇ ମାସ କୁସ୍ତିଯୋଦ୍ଧାଙ୍କ ଆନ୍ଦୋଳନ ସଂପୂର୍ଣ୍ଣ ଅଣରାଜନୈତିକ ଥିଲା । ଏମାନେ ସରକାର ବିରୋଧରେ କିଛି କହୁନଥିଲେ । ଏମାନଙ୍କର ମୂଳ ଦାବୀ ଥିଲା ( ଓ ଆଜି ବି ରହିଛି) ବ୍ରିଜଭୂଷଣ ଶରଣ ସିଂ ବିରୋଧରେ କାର୍ୟାନୁଷ୍ଠାନ । ଦେଶର ସବୁଠୁ ଶକ୍ତିଶାଳୀ ଓ ପ୍ରଭାବଶାଳୀ ଖେଳାଳୀ ଯେତେବେଳେ ଏହି ପ୍ରସଙ୍ଗ ଉଠାଇଲେ, ତାକୁ ତୁରନ୍ତ ସମାଧାନ କରିବା ସରକାରଙ୍କ ଦାୟିତ୍ଵ ଥିଲା । ସରକାର ସମାଧାନ ପରିବର୍ତ୍ତେ ଅପରାଧୀକୁ ସୁରକ୍ଷା ଦେଇ ଚାଲିଲେ । ଯାହା ଫଳରେ ଏହି ଆନ୍ଦୋଳନକୁ ରାଜନୈତିକ ସମର୍ଥନ ମିଳିଲା, ମିଳିବା ଉଚିତ ମଧ୍ୟ । ଆଜି ମଧ୍ୟ ସରକାର ଓ ସରକାରେ ସମର୍ଥକ ଜଣେ ଅପରାଧୀ ପଛରେ ଠିଆ ହୋଇ ଆମ ଦେଶର ଖେଳାଳୀମାନଙ୍କୁ ଗାଳି କରୁଛନ୍ତି ।

ସବୁଠୁ ଚିନ୍ତାର ବିଷୟ ହେଉଛି ଏହି ଖେଳାଳୀମାନେ କେହି ସରକାର ବିରୋଧୀ କେବେ ନଥିଲେ । ବରଂ ଏମାନଙ୍କ ମଧ୍ୟରୁ ଅନେକ ଥିଲେ ସରକାରଙ୍କ ସମର୍ଥକ । ଏମାନଙ୍କୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ନିଜ ପରିବାରର ପୁଅ ଝିଅ ବୋଲି ଡାକୁଥିଲେ । ଏମାନଙ୍କ ସହିତ ବିଜେପି ସରକାରର ଜଣେ କଟ୍ଟର ସମର୍ଥକ ବାବା ରାମଦେବ ମଧ୍ୟ ଛିଡା ହୋଇଛନ୍ତି। ତଥାପି ଏମାନଙ୍କୁ ଏତେ ଗାଳି ସହିବାକୁ ପଡୁଛି କାହିଁକି ?

ଭାରତୀୟ ରାଜନୀତିରେ ଗୋଟେ ନୂଆ କଥା ଗତ ୯ ବର୍ଷରେ ଘଟିଛି । ଏଠି ଗୋଟେ ବର୍ଗର ଲୋକେ ଭାବି ନେଇଛନ୍ତି ଯେତେ ଯାହା ଅନ୍ୟାୟ କଲେ ମଧ୍ୟ ସରକାର ବା ସରକାରୀ ଲୋକଙ୍କ ବିରୋଧରେ କେହି ପାଟି ଖୋଳିବେ ନାହିଁ । ସରକାରୀ ଦଳର ଗୁଣ୍ଡା ଯୌନ ଅପରାଧୀ ହେଲେ ବି ତା ପଛରେ ନିର୍ଲଜ ଭାବରେ ଠିଆ ହେବାକୁ ଏମାନଙ୍କୁ ଲଜ୍ଜା ଲାଗୁନାଇଁ ।

ନିଜ ଦେଶର ପ୍ରତିଭାକୁ ହୀନିମାନ କରି କୌଣସି ରାଜନୀତି ବା ରାଜନେତା ମହାନ ହୁଏ ନାଇଁ । ଦିନେ ନା ଦିନେ ପ୍ରତିଭା ଓ ପ୍ରଜ୍ଞା ବିରୋଧୀ ଏ ସରକାର ଇତିହାସରେ ସବୁଠୁ କଳଙ୍କିତ ସରକାର ହୋଇ ଧିକ୍କାରର ସାମ୍ନା କରିବାକୁ ବାଧ୍ୟ ହେବ ।    ,