କେନ୍ଦ୍ର ବିଜେପିର ବୁଝାମଣା, ରାଜ୍ୟ ବିଜେପି ଲାଗି ପ୍ରତାରଣା

ଗତକାଲି ଓଡିଶା ଗସ୍ତରେ ଆସିଥିବା ବିଜେପିର ଦ୍ଵିତୀୟ କ୍ଷମତାକେନ୍ଦ୍ର ତଥା ଗୃହମନ୍ତ୍ରୀ ଅମିତ ଶାହ ଓଡିଶାର ବିଜେପି କର୍ମୀଙ୍କୁ ସିଧା ସିଧା କହିଦେଇଗଲେ ଯେ, ତମେ ତମର ଲଢାଲଢି ହୁଅ । କେନ୍ଦ୍ରର ଷ୍ଟ୍ରାଟେଜି ଦେଖି ତମେ ଚିନ୍ତା କରନାହିଁ । ଏହାର ଅର୍ଥ ଏୟା ଯେ ବିଜେପି କେନ୍ଦ୍ରୀୟ ନେତୃତ୍ଵ ବିଜେଡି ସାଙ୍ଗରେ ରହିବାକୁ ବାଧ୍ୟ- ହେଲେ ତମେ କର୍ମୀମାନେ ନିଜ ସ୍ତରରେ ବିଜେପିକୁ ସରକାରରେ ଆଣିବାକୁ ସଂଘର୍ଷ କର । ଏହା ଏକପ୍ରକାର ଚମତ୍କାର ପ୍ରବଞ୍ଚନା । ଆମେ ବିଜେଡି ସାଙ୍ଗେ ବୁଝାମଣା କରିବୁ ହେଲେ ତମେ ବିଜେଡି ବିରୋଧରେ ଲଢେଇ କର ବୋଲି କହି- ଅମିତ ଶାହ ଓଡିଶା ବିଜେପିକୁ ଏକପ୍ରକାର ଦିଶାହୀନ ଅବସ୍ଥାରେ ଛାଡି ଯାଇଛନ୍ତି । ମୁହଁଟାଣ ଦେଖାଇବାକୁ ଯାଇ ରାଜ୍ୟ ବିଜେପି ସଭାପତି ଏବଂ ପୂର୍ବତନ ମନ୍ତ୍ରୀ ଜୁଏଲ ଓରାମ ଆମେ ବିଜେଡି ବିରୋଧରେ ଏକୁଟିଆ ଲଢିବୁ ବୋଲି କହୁଥିଲେ ମଧ୍ୟ ସେମାନଙ୍କ ସ୍ଵରରେ ଆଗର ଦମ୍ଭ ଆଉ ନାହିଁ । ଅମିତ ଶାହ ନିଜେ ଓଡିଶା ଆସି ରାଜ୍ୟ ବିଜେପିର ସ୍ଵାଭିମାନ ଓ ଅସ୍ତିତ୍ଵକୁ ନବୀନ ପଟ୍ଟନାୟକଙ୍କ ପାଖରେ ବନ୍ଧା ପକେଇଦେଇ ଯାଇଛନ୍ତି । ତେଣୁ ଆଗକୁ ଓଡିଶା ବିଜେପି ନାମକୁ ମାତ୍ର ବିଜେଡି ବିରୋଧରେ ଲଢିବ, ହେଲେ ଅସଲ ଲଢେଇରେ ବିଜେପି ଏଠି ବିଜେଡ଼ିର “ବି ଟିମ” ହୋଇ କାମ କରିବାକୁ ବାଧ୍ୟ ।

୨୦୨୪ ସାଧାରଣ ନିର୍ବାଚନ ବିଜେପି ଲାଗି ଆଦୌ ସହଜ ନୁହେଁ । ବିରୋଧୀ ଦଳଙ୍କ ମହାମେଣ୍ଟ “ଇଣ୍ଡିଆ” ଗଠନ ହେବା ପରେ  ସେଥିଲାଗି ବିଜେପି ଆଗତୁରା ନିଜର ପୁରୁଣା ମେଣ୍ଟ ଏନଡିଏକୁ ସକ୍ରିୟ କରିବାକୁ ଚେଷ୍ଟା କରୁଛି । ହେଲେ ଏନଡିଏ ମେଣ୍ଟରେ ଏଆଇଡିଏମକେକୁ ବାଦ ଦେଲେ ଏମିତି କୌଣସି ପ୍ରଭାବଶାଳୀ ରାଜନୈତିକ ଦଳ ନାହାନ୍ତି ଯେଉଁମାନେ ମୋଦୀଙ୍କୁ ସଂସଦରେ ସୁରକ୍ଷା ଦେଇପାରିବେ । ୨୦୨୪ ନିର୍ବାଚନରେ ନିଜ ଚୌକି ବଞ୍ଚାଇବା ଲାଗି ଏବେ ବିଜେପି ଓଡିଶାର ବିଜୁ ଜନତା ଦଳ ଏବଂ ଆନ୍ଧ୍ରର ୱାଇଏସଆର କଂଗ୍ରେସକୁ ନିଜ ପକ୍ଷରେ ରଖିବାକୁ ଏକରକମ ବାଧ୍ୟ ହୋଇଛି ।

ବିରୋଧୀମେଣ୍ଟରୁ ଶାରଦା ପାୱାର ଏବଂ ନୀତିଶ କୁମାରଙ୍କୁ ଛଡାଇ ଆଣି ଏନଡିଏରେ ସାମିଲ କରିବାକୁ ବିଜେପି ପ୍ରାଣାମୂର୍ଚ୍ଛା ଉଦ୍ୟମ କରୁଛି । ଏ ପ୍ରସଙ୍ଗରେ ତେଲେଙ୍ଗାନା ମୁଖ୍ୟମନ୍ତ୍ରୀ କେ ଚନ୍ଦ୍ରଶେଖର ରାଓଙ୍କୁ ମନାଇବା ଲାଗି ମଧ୍ୟ ଭିତିରି ଉଦ୍ୟମ ଚାଲିଛି । ତେବେ ଓଡିଶା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ମନାଇବା ବିଜେପି ପାଇଁ ସହଜ ହୋଇଛି କାରଣ ନବୀନ ନିଜର ବୟସାଧିକ୍ୟ ଯୋଗୁଁ ଅଧିକ ମୁହାଁମୁହିଁ ରାଜନୀତି କରିବା ଅବସ୍ଥାରେ ନାହାନ୍ତି । ବିଜେପି ସହିତ ବୁଝାମଣାରେ ବିଜେଡ଼ିର ବିଶେଷ କିଛି କ୍ଷତି ହେବାର ନାହିଁ । ବିଜେପି ସହିତ ବିଜେଡ଼ିର ବୁଝାମଣା ରାଜ୍ୟ ବିଜେପିକୁ ସ୍ଥାଣୁ କରିଦେବ ଓ ସେଥିରେ ବିଜେଡ଼ିର ଲାଭ ସର୍ବାଧିକ । ୨୦୨୪ ସାଧାରଣ ନିର୍ବାଚନରେ ଉଭୟ  ବିଧାନସଭା ଏବଂ ଲୋକସଭାରେ ବିଜେଡି ନିଜ ପାଇଁ  କ୍ଷେତ୍ର ପ୍ରସ୍ତୁତ କରିସାରି ଏବେ ନିଜର ସବୁଠୁ ଶକ୍ତିଶାଳୀ ବିରୋଧୀକୁ ନିଜ ଜାଲରେ ପକାଇଛି । ବାସ୍ତବରେ ବିଜେପି ଏବେ ନିଜର ଭବିଷ୍ୟତକୁ ସୁରକ୍ଷା ଦେବାକୁ ଯାଇ ଓଡିଶାରେ ନିଜର ବର୍ତ୍ତମାନକୁ ବଳି ପକାଇଦେଇଛି ।

କିଛି ରାଜନୈତିକ ସମୀକ୍ଷକ କହୁଛନ୍ତି, ହୁଏତ ଲୋକସଭାରେ ବିଜେଡି ବିଜେପି ପାଇଁ ଅଧିକ ଆସନ ଛାଡି ଦେଇପାରେ । ୨୦୧୯ରେ ଓଡିଶାରେ ବିଜେପିର ପ୍ରଦର୍ଶନ ସବୁଠୁ ଭଲ ଥିଲା ଓ ସେଥିରୁ ଅଧିକ ଭଲ ପ୍ରଦର୍ଶନ ବିଜେପି କରିବାର କୌଣସି ସମ୍ଭାବନା ଆଉ ନାହିଁ । ଗତ ନିର୍ବାଚନରେ ପଶ୍ଚିମ ଓଡିଶାର ପାଞ୍ଚୋଟି ଯାକ ଲୋକସଭା ଆସନ ବିଜେପି ଜିତିଥିଲା । ଯଦି ବିଜେପି –ବିଜେଡି ବୁଝାମଣା ହୋଇ ଏହି ସବୁ କ୍ଷେତ୍ରରେ ବିଜେଡି ଦୁର୍ବଳ ପ୍ରାର୍ଥୀ ଦିଏ, ତା ହେଲେ ସେଥିରେ କଂଗ୍ରେସ ଅଧିକ ଲାଭବାନ ହେବ । ବିଜେପିକୁ ହରାଇବାକୁ ଚାହୁଁଥିବା ବିରୋଧୀ ଭୋଟ ସବୁବେଳେ ବିଜେଡି ସପକ୍ଷରେ ଯାଉଥିଲା ।

ବିଜେଡି-ବିଜେପି ବୁଝାମଣାରେ ଏହି ଭୋଟ କଂଗ୍ରେସକୁ ଫେରିବା ନିଶ୍ଚିତ । ଓଡିଶାରେ ବିଜେଡି-ବିଜେପିର ଏହି ଖୋଲା ବୁଝାମଣା କଂଗ୍ରେସକୁ ରାଜ୍ୟରେ ନୂଆ ଜୀବନ ଦେଇଛି ।