କାପ୍ତାକାପ୍ତି
ସୌଭାଗ୍ୟ କୁମାର ମିଶ୍ର
0
56
କାପ୍ତା ପଚାରିଲା କାପ୍ତିକି
କୋଉ ବୁଦାରେ
ଲୁଚେଇଚୁ ତୋ' ସରାଗ ?
ବାହାର କରି ଆଣ୍,
ଏ କ୍ଷେତଟା ହରାଭରା ହେବ ଯେ !
ଦିନସାରା ସୂର୍ଯ୍ୟକିରଣ ପଡୁଛି,
ସଞ୍ଜବେଳେ ଝିରି ଝିରି ବର୍ଷା,
ହେଲା ଯେ, ଏବେ ତୋ' ହାତଟା ଦେ
ମୋ' ହାତରେ, ଆଉଜି ଆ' ମୋ' ଆଡେ ।
କୁଜି ଗେଣ୍ଡାଦଳ କେତେବେଳୁ
ବାହାରି ଗଲେଣି ନେଳି ଶିଉଳି ଭେଟି ଧରି,
ଏବେ ଆସି ପହଞ୍ଚିଯିବେ,
କାନ୍ଥ କଣରେ ବୁଢିଆଣି ଚାହିଁଛି ।
ଏମିତି ମହମହ ବାସ୍ନାରେ
ଆମେ ନାଚିବା କଥା,
ଆମର ଜନମ ଏଠି ମରଣ ଏଠି,
ତୋ' ସରାଗସୋହାଗରେ ଉର୍ବର ଏ ମାଟି ।
