୨୦୨୪ ନିର୍ବାଚନ : ବିଜେଡ଼ି ଲାଗି କେତେ ସହଜ, କେତେ କଠିନ
![୨୦୨୪ ନିର୍ବାଚନ : ବିଜେଡ଼ି ଲାଗି କେତେ ସହଜ, କେତେ କଠିନ](https://thesamata.in/uploads/images/2023/03/image_750x_6414470793e77.jpg)
୨୦୨୪ ସାଧାରଣ ନିର୍ବାଚନକୁ ଯିବା ପୂର୍ବରୁ ୨୦୧୯ ପୂର୍ବର ପୃଷ୍ଠଭୂମିକୁ ଆଲୋଚନା କରିବା ଜରୁରୀ । ୨୦୧୭ ରୁ ୨୦୧୯, ଏହି ଦୁଇ ବର୍ଷ ବିଜେଡି ନିଜ ଶାସନର ସବୁଠୁ କଠିନ ସମୟକୁ ସାମ୍ନା କରିଥିଲା । ସେହି ସମୟର ରାଜନୈତିକ ଘଟଣାକ୍ରମ ଥିଲା ଜଟିଳ ଏବଂ ବିଜେଡି ପାଇଁ ସବୁଠୁ କଠୋର ଭାଗ୍ୟର ସମୟ । ସେ ସମୟର ଘଟଣାକ୍ରମ ଥିଲା-
- ୨୦୧୭ ପଞ୍ଚାୟତ ନିର୍ବାଚନରେ ବିଜେପିର ଅଭ୍ୟୁଦୟ ହଠାତ ବିଜେଡ଼ିକୁ ପଛକୁ ଠେଲିବା ଆରମ୍ଭ କରିଥିଲା । ଜିଲା ପରିଷଦ ନିର୍ବାଚନରେ ବିଜେପି ୨୦୦ରୁ ଅଧିକ ଆସନ ପାଇଥିଲା । ବିଜେପିର ପଞ୍ଚାୟତ ନିର୍ବାଚନ ଫଳାଫଳରେ ଏହି ଦଳ ଏତେ ଉତ୍ସାହିତ ହୋଇପଡିଥିଲା ଯେ ପ୍ରଧାନମନ୍ତ୍ରୀ ମୋଦୀ ଏହାକୁ ଏକ ବିରାଟ ସଫଳତା ଭାବରେ ଉତ୍ତର ପ୍ରଦେଶ ନିର୍ବାଚନ ପ୍ରଚାରରେ କହି ବୁଲୁଥିଲେ।
- ପଞ୍ଚାୟତ ନିର୍ବାଚନ ପରେ ପରେ ଭୁବନେଶ୍ବରରେ ବିଜେପିର ଜାତୀୟ କାର୍ୟକାରିଣୀ ବୈଠକ ବସିଥିଲା ଓ ସେହି ପୃଷ୍ଠଭୂମିରେ ବିଜେପି ସାମାଜିକ ଏବଂ ମୁଖ୍ୟଧାରାର ଗଣମାଧ୍ୟମରେ ବିଜେଡି ବିରୋଧୀ ଏକ ପ୍ରବଳ ହାୱା ତିଆରି କରିସାରିଥିଲା । ସେତେବେଳେ ସ୍ଥିତି ଏମିତି ଥିଲା ଯେ ଲାଗୁଥିଲା, ଯେମିତି କୌଣସି ବି ସମୟରେ ବିଜେଡି ସରକାରକୁ ଭାଙ୍ଗି ଦିଆଯାଇପାରେ ।
- ତତ୍କାଳୀନ ବିଜେପି ସଭାପତି ଅମିତ ଶାହ ଘନଘନ ଓଡିଶା ଗସ୍ତରେ ଆସି ନବୀନ ପଟ୍ଟନାୟକ ସରକାରକୁ ଓପାଡି ଫୋପାଡି ଦେବାକୁ ପ୍ରଚାର କରୁଥିଲେ ।
- ବିଜେଡି ଭିତରେ ସେହି ସମୟରେ ଅସନ୍ତୁଷ୍ଟ ନେତାମାନଙ୍କର ଏକ ଲମ୍ବା ତାଲିକା ଦେଖିବାକୁ ମିଳିଥିଲା । ୨୦୧୭ ପରେ ଏକଦା ନବୀନଙ୍କର ଅତ୍ୟନ୍ତ ଘନିଷ୍ଠ ଥିବା ବୈଜୟନ୍ତ ପଣ୍ଡା ବିଜେପି ସଂସଦୀୟ ଦଳକୁ ଦୁଇଫାଳ କରିବାର ଯୋଜନା ଆରମ୍ଭ କରି ଦେଇଥିଲେ । ବୈଜୟନ୍ତ ବିଜେଡି ଛାଡିଲା ପରେ ଦଳର ଏକାଧିକ ଲୋକସଭା ସଦସ୍ୟ ବିଜେପିକୁ ଚାଲି ଯାଇଥିଲେ । ନିର୍ବାଚନ ପାଖାପାଖି ବିଜେଡ଼ିର ଟାଣୁଆ ନେତା ଦାମୋଦର ରାଉତ ମଧ୍ୟ ବିଜେପି ଶିବିରରେ ଯୋଗ ଦେଇଥିଲେ । ୨୦୧୭ ରୁ ୨୦୧୯- ଏହି ଦୁଇ ବର୍ଷରେ ଶତାଧିକ ବିଜେଡି ନେତା ବିଜେପିରେ ମିଶିଥିଲେ ।
- ଚିଟ ଫଣ୍ଡ ମାମଲାରେ ଏକାଧିକ ବିଜେଡି ବିଧାୟକଙ୍କୁ ସେତେବେଳେ ସିବିଆଇ ଜେରା କରିବା ସହିତ କେତେକଙ୍କୁ ଗିରଫ ମଧ୍ୟ କରିଥିଲା ।
୨୦୧୯ ତୁଳନାରେ ୨୦୨୪ ନିର୍ବାଚନରେ ବିଜେଡ଼ିର ସ୍ଥିତି ଅଧିକ ମଜବୁତ ରହିଛି । ପଞ୍ଚାୟତ ଓ ପୌର ନିର୍ବାଚନରେ ବିଜେଡି ୮୦ ଭାଗରୁ ଅଧିକ ଆସନ ପାଇଛି । ୨୦୧୯ ତୁଳନାରେ ୨୦୨୩ର ସ୍ଥିତି ପ୍ରାୟତଃ ବିଜେଡି ସପକ୍ଷରେ ଅଛି । ତେଣୁ ଆଗାମୀ ସାଧାରଣ ନିର୍ବାଚନ ବିଜେଡି ପାଇଁ ସହଜସାଧ୍ୟ ହେବ କି ? ଏ ପ୍ରଶ୍ନର ଉତ୍ତରରେ ଏତିକି କୁହା ଯାଇପାରିବ ଯେ ସବୁ ନିର୍ବାଚନର ସମୀକରଣ ସବୁବେଳେ ଅଲଗା । ୨୦୧୯ ଯଦିଓ ବିଜେଡି ପାଇଁ କଠୋର ସମୟ ଥିଲା, ତଥାପି ସେତେବେଳେ ହଠାତ ନବୀନଙ୍କ ପ୍ରତି ଲୋକଙ୍କର ଏକ ବିଶେଷ ସମବେଦନା ଜାଗ୍ରତ ହୋଇଥିଲା । ବିଜେପି ସଭାପତି ଅମିତ ଶାହ ଏବଂ ପ୍ରଧାନମନ୍ତ୍ରୀ ମୋଦୀ ନବୀନଙ୍କୁ ବାରମ୍ବାର ସମାଲୋଚନା କରିବା ଫଳରେ ଲୋକଙ୍କ ମନରେ ଏହା ତୀବ୍ର ପ୍ରତିକ୍ରିୟା ସୃଷ୍ଟି କରିଥିଲା । ସେହି ଦୃଷ୍ଟିରୁ ଆଜିର ତାରିଖରେ ନବୀନଙ୍କ ପ୍ରତି ବିଜେପି କେନ୍ଦ୍ରୀୟ ନେତାମାନଙ୍କର ଆଚରଣ ବେଶ ନରମ । ଏହା ବିଜେଡି ଲାଗି ସବୁଠୁ ବଡ ଜଞ୍ଜାଳ ବୋଲି କୁହାଯାଇପାରେ ।
୨୦୧୯ ନିର୍ବାଚନ ପୂର୍ବରୁ ଉଭୟ ବିଜେପି ଓ କଂଗ୍ରେସ ନବୀନଙ୍କ ଡାହାଣ ହାତ ବୋଲି କୁହା ଯାଉଥିବା ତାଙ୍କର ସଚିବ ଭି କାର୍ତ୍ତିକ ପାଣ୍ଡିୟାନଙ୍କ ଉପରେ ଆକ୍ରମଣ ଆରମ୍ଭ କରି ଦେଇଛନ୍ତି । ଯଦିଓ ୨୦୧୯ ପୂର୍ବରୁ ମଧ୍ୟ ଏମିତି କିଛି ଘଟିଥିଲା, ହେଲେ ତାର ଲାଭ ସିଧା ସିଧା ବିଜେଡ଼ିକୁ ମିଳିଥିଲା । ସେତେବେଳେ ପାଣ୍ଡିୟାନଙ୍କ ଘର ଉପରେ କିଛି ଲୋକ ଆକ୍ରମଣ କରିଥିଲେ ଓ ତାହା ସ୍ପଷ୍ଟ ଭାବରେ କିଏ କରାଇଥିଲା, ତାହା ଜଣା ପଡିଥିଲା । ଚତୁରତାର ସହିତ ବିଜେଡି ସେହି ଘଟଣାକୁ ସେତେବେଳେ ଆଦୌ ଗୁରୁତ୍ଵ ଦେଇନଥିଲା । ଆଜି କିନ୍ତୁ ପରିସ୍ଥିତି ଭିନ୍ନ । ପାଣ୍ଡିୟାନଙ୍କୁ ବିରୋଧୀ ଘେରିବାକୁ ଚେଷ୍ଟା କଲେ, ବିଜେଡି ତୁରନ୍ତ ପ୍ରତିକ୍ରିୟା ପ୍ରକାଶ କରୁଛି ।
ମନ୍ତ୍ରୀ ନବ ଦାସଙ୍କ ହତ୍ୟାକାଣ୍ଡ ପରେ ଏହାର ପ୍ରଭାବ ରାଜନୈତିକ ଭାବରେ ନିଶ୍ଚୟ ପଡିଛି ଓ ବିଜେଡି ପାଇଁ ଏହାର ମୁକାବିଲା ନିଶ୍ଚୟ କଷ୍ଟସାଧ୍ୟ ।
ସବୁଠୁ ବଡ ସଙ୍କଟ ହେଉଛି, ୨୦୨୪ ରେ ବିଜେଡି ୨୪ ବର୍ଷର ସ୍ଥିତାବସ୍ଥା ବଜାୟ ରଖିବାକୁ ନିର୍ବାଚନ ଲଢିବ । ଯେ କୌଣସି ନେତୃତ୍ଵ ଓ ରାଜନୈତିକ ଦଳ ପାଇଁ ୨୪ ବର୍ଷ କ୍ଷମତାରେ ରହିବା ପରେ ନିର୍ବାଚନ ଜିତିବା ଆଦୌ ସହଜ ନୁହେଁ । ୨୦୦୦ ନିର୍ବାଚନ ବେଳକୁ ନବୀନଙ୍କ ବୟସ ଥିଲା ୫୪ ଓ ଏବେ ସେ ପରିଣତ ୭୭ ବୟସରେ ପହଞ୍ଚିଛନ୍ତି । ତାଙ୍କ ତୁଳନାରେ ତାଙ୍କର ପ୍ରତିଦ୍ବନ୍ଦ୍ବୀମାନେ ଅଧିକ ତରୁଣ ।
ରାଜନୀତିରେ ପ୍ରବୀଣ ବନାମ ତରୁଣର ଲଢେଇକୁ ବିଜେଡି କେମିତି ସାମ୍ନା କରୁଛି, ତାରି ଉପରେ ସବୁ କିଛି ନିର୍ଭର କରିବ ।