ଅନାବନା କିଛି
ଶୁଭଶ୍ରୀ ଶୁଭସ୍ମିତା ମିଶ୍ର 
ଗୋଟେ ବ୍ୟୂହ ରଚନାର
ଅହଂକାର ନେଇ
ତୁମେ କଣ ଏ ଅସମାପ୍ତ ସମ୍ପର୍କକୁ
ନାଁ ଟେ ଦେଇ ପାରିବ ।
ବିଜବିଜାଇ ଯାଇଥିବା ଗୋଟେ
ଅଧା ଚୋପାଛଡା ଘା' ପରି ଏ ଋତୁ
ମେଘଭର୍ତ୍ତି ଆକାଶ ପରି ଥମଥମ ।
ଆଉ ଗର୍ଭକଷ୍ଟର ଅକୁହା
ଯନ୍ତ୍ରଣା ପରି ଏ ପ୍ରେମ,
ଯାହାକୁ ମୁଁ ପୁଞ୍ଜି କରି ଭୋଗୁଛି
ଗଞ୍ଜେଇର ନିଶା ପରି ।
ତୁମେ ମୋର ସ୍ମୃତିକୁ
କୀଟଦଷ୍ଟ ପରି ଆଡେଇ ଦେଇ ଯାଇ ପାର
ମନା ନାହିଁ ;
ତେବେ କୁହ ଏ ଆକାଶଭର୍ତ୍ତି ଭଲପାଇବା ନେଇ
ମୁଁ ଯିବି ଯଦି କୋଉ ଗାତକୁ ।
ମୁଁ ଜାଣେ ଉତ୍ତର ପାଇଁ ଅସମର୍ଥ
ତୁମ କଣ୍ଠ ,
ସେଥିପାଇଁ ତ ଧାରେ ହସରେ
ତୁମ ଅସହାୟତାକୁ କ୍ଷମା କରିଦେଲି ।
ଯାଅ
ବାଟ ଲାଗି ମୁଣାଭର୍ତ୍ତି ଭଲପାଇବା ଦଉଛି
ପାରିବ ତ ସବୁ ଖର୍ଚ୍ଚ କରିଯାଅ ।
