ନବୀନ ଓ ମମତା କଥାବାର୍ତ୍ତା : ଜାତୀୟ ରାଜନୀତି ପାଇଁ କଣ ରହିବ ବାର୍ତ୍ତା

ଆଜି ପଶ୍ଚିମ ବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ଓଡିଶା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଭେଟୁଛନ୍ତି । ସରକାରୀ ଭାବରେ ଏହା ଏକ ସୌଜନ୍ୟମୂଳକ ସାକ୍ଷାତ ହୋଇଥିବା ବେଳେ ରାଜନୀତି ଦୃଷ୍ଟିରୁ ଏହା ଭିନ୍ନ ଏକ ସଙ୍କେତ ଦେଉଥିବା ଭେଟଘାଟ । ମମତା ବାନାର୍ଜୀ ନବୀନଙ୍କୁ ଭେଟିବାର ସମୟ ସବୁଠୁ ଗୁରୁତ୍ୱପୂର୍ଣ୍ଣ । ଜାତୀୟ ରାଜନୀତିରେ ନିଜର ପତିଆରା ବଢାଇବାକୁ ମମତା  ବାନାର୍ଜୀ ବର୍ତ୍ତମାନ କଂଗ୍ରେସ ଏବଂ ବିଜେପି ଠାରୁ ସମ ଦୂରତାରେ ରହି ଏକ ତୃତୀୟ ସାମ୍ମୁଖ୍ୟ ଗଠନ ଯୋଜନାରେ ଲାଗି ପଡିଛନ୍ତି । ସବୁ ବିଜେପି ବିରୋଧୀ ଶକ୍ତି ଏକାଠି ହୋଇ ନିର୍ବାଚନ ଲଢିବା ଆଦୌ ସମ୍ଭବ ନୁହେଁ ଏବଂ ପ୍ରାକ ନିର୍ବାଚନ ମେଣ୍ଟ ଅପେକ୍ଷା ନିର୍ବାଚନ ପରବର୍ତ୍ତୀ ମେଣ୍ଟକୁ ନେଇ ଏବେ ଅଙ୍କକଷା ବ୍ୟାପକ ହୋଇଚାଲିଛି ।

ନବୀନଙ୍କୁ ଭେଟିବା ପୂର୍ବରୁ ମମତା ବାନାର୍ଜୀ ଉତ୍ତରପ୍ରଦେଶରେ ପୂର୍ବତନ ମୁଖ୍ୟମନ୍ତ୍ରୀ ଅଖିଲେଶ ଯାଦବଙ୍କୁ ଭେଟି ସାରିଛନ୍ତି । ଉତ୍ତରପ୍ରଦେଶର ସମାଜବାଦୀ ପାର୍ଟି, ତେଲେଙ୍ଗାନାର ଭାରତ ରାଷ୍ଟ୍ର ସମିତି ଏବଂ ତୃଣମୂଳ ଭିତରେ ଏକ ପ୍ରକାର ପ୍ରାକ ନିର୍ବାଚନୀ ବୁଝାମଣା ସରିଛି । ଏହି ତିନୋଟି ଦଳ କେହି କାହର ବିରୋଧୀ ନୁହନ୍ତି କିମ୍ବା ଏମାନେ ପ୍ରତିଦ୍ବନ୍ଦ୍ବୀ ଭାବରେ କେଉଁଠି ନିର୍ବାଚନ ଲଢିବାର ସମ୍ଭାବନା ନାହିଁ । ସଂଖ୍ୟା ଦୃଷ୍ଟିରୁ ଏହି ତିନୋଟି ରାଜ୍ୟର ଲୋକସଭା ଆସନ ଜାତୀୟ ରାଜନୀତିରେ ସମୀକରଣ ବଦଳାଇଦେବାର ସାମର୍ଥ୍ୟ ରଖେ । ଉତ୍ତର ପ୍ରଦେଶ, ପଶ୍ଚିମବଙ୍ଗ ଏବଂ ତେଲେଙ୍ଗାନାର ଲୋକସଭା ଆସନ ସଂଖ୍ୟା ୧୩୯ । ଏଥିରେ ଓଡିଶାର ୨୧ ଟି ଆସନ ମିଶିଲେ ମୋଟ ସଂଖ୍ୟା ହେବ ୧୬୦ । ଯଦି ମେଣ୍ଟ ଭାବରେ ଏହି ଦଳ ଗୁଡିକ ପରଷ୍ପରକୁ ସହଯୋଗ ଦେଇ ଭଲ ଆସନ ଜିତନ୍ତି, ତା ହେଲେ ୨୦୨୪ ନିର୍ବାଚନ ପରବର୍ତ୍ତୀ ସ୍ଥିତିରେ ସରକାର ଗଢିବାର ଲଗାମ ଏମାନଙ୍କ ହାତରେ ରହିବ ।  ନିଜ ନିଜ ଭିତରେ ଏମାନେ କେହି କାହାର ବିରୋଧୀ ହୋଇନଥିବାରୁ ଏକ ବୁଝାମଣା ଭିତ୍ତିକ ମେଣ୍ଟ ଏମାନଙ୍କ ମଧ୍ୟରେ ସମ୍ଭବ ହୋଇପାରେ ।

କଂଗ୍ରେସ ଏବଂ ବିଜେପି ମଧ୍ୟରୁ ଯିଏ ଜିତିଲେ ମଧ୍ୟ ମମତା-ଅଖିଳେଶ-ରାଓ ମେଣ୍ଟ “କିଙ୍ଗ ମେକର” ଭୂମିକାରେ ନିଜକୁ ରଖିବାକୁ ଚାହାନ୍ତି । ସେମାନଙ୍କ ସହିତ ନବୀନ ସହଯୋଗ କଲେ, ସ୍ଥିତି ଆହୁରି ମଜବୁତ ହେବାର ସମ୍ଭାବନା ରହିଛି । ସେହି ଦୃଷ୍ଟିରୁ ମମତା ନବୀନ ଭେଟଘାଟର ବିଶେଷ ଗୁରୁତ୍ଵ ରହିଛି । ମମତାଙ୍କ ନେତୃତ୍ବରେ ଆମ ଆଦମୀ ପାର୍ଟି ଏବଂ ଉଦ୍ଧବ ଥାକରେଙ୍କ ଶିବସେନା ମଧ୍ୟ ରହିଛନ୍ତି । ଇତିମଧ୍ୟରେ ଆପ ଦିଲ୍ଲୀ, ଗୁଜରାଟ, ପଞ୍ଜାବ ଏବଂ ଉତ୍ତରାଖଣ୍ଡରେ ନିଜର ସଂଗଠନ ବଢାଇଛି । ଏହା ସହିତ ଆବଶ୍ୟକତା ଦୃଷ୍ଟିରୁ କଂଗ୍ରେସ ସାଙ୍ଗରେ ରହିଥିବା ଶରଦ ପାୱାର ଏବଂ ନୀତିଶ କୁମାରଙ୍କ ସହିତ ମମତା ଯୋଗାଯୋଗରେ ଅଛନ୍ତି । କର୍ଣ୍ଣାଟକ ବିଧାନସଭା  ନିର୍ବାଚନ ପରେ କଂଗ୍ରେସର ମତିଗତିକୁ ଦେଖି ସର୍ବଭାରତୀୟ ସ୍ତରରେ ମେଣ୍ଟ କଥା ଅନ୍ୟ ଦଳ ମାନେ ଚିନ୍ତା କରିବେ । ତେବେ ଜାତୀୟ ସ୍ତରରେ ଆଞ୍ଚଳିକ ଦଳଗୁଡିକ ସହିତ କଂଗ୍ରେସର ପ୍ରାକ ନିର୍ବାଚନୀ ବୁଝାମଣାର ସମ୍ଭାବନା ପ୍ରାୟ ନାହିଁ ।

ମମତା, କେସିଆର ଏବଂ ନବୀନ ଏବେ ଏକ “ମିତ୍ରଗୋଷ୍ଠୀ” ଭାବରେ ନିଜର ପ୍ରଭାବ ବିସ୍ତାର କରିବାକୁ ଉଦ୍ୟମ କରିବେ । ମମତା-ନବୀନ ଭେଟଘାଟ ପରେ ଏହି ମେଣ୍ଟକୁ ଏକପ୍ରକାର ନୈତିକ ବଳ ମିଳିବ । ଯଦିଓ ଆଜିର ଦେଖାରେ ଉଭୟ ପକ୍ଷ ରାଜନୈତିକ ଦୃଷ୍ଟିରୁ ନୀରବ ରହିପାରନ୍ତି, କିନ୍ତୁ ଜାତୀୟ ରାଜନୀତିରେ ଏହି ଭେଟଘାଟକୁ ନେଇ ଅଧିକ ଆକଳନ ଆରମ୍ଭ ହୋଇଯିବ ।