ବିଜେପି ସଭାପତି ହଠାତ୍ ବଦଳିବାର କାରଣ କ'ଣ?

 ଆଜି ବିଜେପି ରାଷ୍ଟ୍ରୀୟ ସଭାପତି ଜେପି ନଡ୍ଡା ଓଡ଼ିଶା ବିଜେପି ସଭାପତି ସମୀର ମହାନ୍ତିଙ୍କୁ ତାଙ୍କ ପଦରୁ ବିତାଡିତ କରିଛନ୍ତି ଓ ତାଙ୍କ ସ୍ଥାନରେ ପୂର୍ବତନ ମନ୍ତ୍ରୀ ମନମୋହନ ସାମଲଙ୍କୁ ନୂଆ ସଭାପତି ଦାୟିତ୍ୱ ଦେଇଛନ୍ତି । ସମୀର ମହାନ୍ତି ରାଜ୍ୟ ସଭାପତି ଦାୟିତ୍ୱ ନେବା ପରଠୁଁ ବିଜେପିର ସାଙ୍ଗଠନିକ ଶକ୍ତି ତଳମୁହାଁ ହେବା ଆରମ୍ଭ କରିଥିଲା । ବିଜେପି ଓଡ଼ିଶାରେ ୨୦୧୭ ବେଳକୁ ଯେଉଁ ସ୍ଥିତିରେ ଥିଲା, ଅବିକା ଅଧିକ ଖରାପ ଅବସ୍ଥାରେ ରହିବା କାରଣରୁ ସମୀର ମହାନ୍ତିଙ୍କୁ ଦଳ ସଭାପତି ପଦରୁ ବିଦା କଲା କି ? ସମୀର ସଭାପତି ଦାୟିତ୍ଵ ନେବା ପରଠୁ ସବୁ ନିର୍ବାଚନରେ (କେବଳ ଧାମନଗର ଉପ ନିର୍ବାଚନକୁ ବାଦ ଦେଇ) ବିଜେପି ନୈରାଶ୍ୟଜନକ ପ୍ରଦର୍ଶନ କରିଛି । ଧାମନଗର ଉପ ନିର୍ବାଚନ ବିଜୟରେ ମନମୋହନ ସାମଲଙ୍କର ଏକ ବିଶେଷ ଭୂମିକା ରହିଥିଲା । ସେଥିପାଇଁ ତାଙ୍କୁ ବିଜେପି ପୁରସ୍କୃତ କରିଛି । ତେବେ ବିଜେପିର ସାଙ୍ଗଠନିକ ବିଫଳତା ଲାଗି ସମୀର ମହାନ୍ତି ସତରେ ଦାୟୀ କି ?

ଯେତେବେଳେ ସମୀର ମହାନ୍ତିଙ୍କୁ ରାଜ୍ୟ ସଭାପତି ଦାୟିତ୍ଵ ଦିଆ ଯାଇଥିଲା ସେତେବେଳେ ସମସ୍ତେ ଜାଣିଥିଲେ ଯେ ସମୀର ବାବୁ କେବଳ ରବର ଷ୍ଟାମ୍ପ ଭାବରେ ଇ କାମ କରିବେ । ବିଜେପି ସଂଗଠନର ଅସଲ ମଙ୍ଗୁଆଳ ଯେ ରାଜ୍ୟ ବିଜେପି ସଭାପତି ନୁହନ୍ତି, ଏକଥା ବାରମ୍ବାର ପ୍ରମାଣିତ ହୋଇସାରିଛି । କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ପ୍ରଭାବ ଆଗରେ ରାଜ୍ୟ ସଭାପତିଙ୍କ ଭୂମିକା ନାମକୁ ମାତ୍ର । ଦଳର ସବୁ ପ୍ରମୁଖ ନିଷ୍ପତ୍ତି ଧର୍ମେନ୍ଦ୍ର ନେଉଛନ୍ତି ଓ ଆଗକୁ ମଧ୍ୟ ନେବେ । ସେହି ମର୍ମରେ ସମୀର ହୁଅନ୍ତୁ ବା ମନମୋହନ, ସେ ଧର୍ମେନ୍ଦ୍ରଙ୍କ କଥା ମାନି ଚାଲିବାକୁ ବାଧ୍ୟ । ଯଦି ବିଜେପିର ସାଙ୍ଗଠନିକ ବିଫଳତା ବା ପରାଜୟ ପାଇଁ କିଏ ଦାୟୀ ରହିବା କଥା, ସେ ହେଉଛନ୍ତି ଧର୍ମେନ୍ଦ୍ର ପ୍ରଧାନ । ସେ ହିଁ ରାଜ୍ୟ ବିଜେପିର ନିର୍ଣ୍ଣାୟକ । ତାଙ୍କୁ ନ ପଚାରି ରାଜ୍ୟ ବିଜେପିରେ ପତ୍ରଟିଏ ମଧ୍ୟ ହଲିବାର ନାଇଁ । ତେଣୁ ସମୀରଙ୍କୁ ଏ କ୍ଷେତ୍ରରେ ବଳିର ଛେଳି ଭାବରେ ବ୍ୟବହାର କରାଯାଉଛି ମାତ୍ର ।

ନିର୍ବାଚନ ବର୍ଷରେ ମନମୋହନ ସାମଲଙ୍କୁ ରାଜ୍ୟ ସଭାପତି ଦାୟିତ୍ଵ ଦେଇ ହୁଏତ ରାଜ୍ୟରେ ଓବିସି ଭୋଟର ବର୍ଗଙ୍କୁ ବିଜେପି ଆକୃଷ୍ଟ କରିବାକୁ ଚାହୁଁଛି । ତେବେ ରାଜନେତା ଭାବରେ ମନମୋହନ ସାମଲଙ୍କ ପ୍ରଭାବ ଭଦ୍ରଖ ଏବଂ ଯାଜପୁର ଜିଲା ଭିତରେ ସୀମିତ । ତେବେ ସମୀର ମହାନ୍ତିଙ୍କ ତୁଳନାରେ ମନମୋହନ ସାମଲଙ୍କ ପ୍ରୋଫାଇଲ ଟିକେ ପ୍ରଭାବଶାଳୀ । ସେ ପୂର୍ବରୁ ରାଜ୍ୟ ବିଜେପି ସଭାପତି ଥିଲେ ଏବଂ ନବୀନ ପଟ୍ଟନାୟକ ସରକାରରେ ରାଜସ୍ୱ ମନ୍ତ୍ରୀ ଭଳି ଗୁରୁତ୍ୱପୂର୍ଣ୍ଣ ପଦବୀରେ ମଧ୍ୟ ରହିଥିଲେ । ତେବେ ଏକ ବିବାଦୀୟ ପରିସ୍ଥିତିରେ ତାଙ୍କୁ ମନ୍ତ୍ରୀମଣ୍ଡଳରୁ ଇସ୍ତଫା ଦେବାକୁ ପଡିଥିଲା । ନୂଆ ଦାୟିତ୍ଵ ପାଇଲା ପରେ  ପୁରୁଣା ବିବାଦ ହୁଏତ ମନମୋହନଙ୍କୁ ଅସୁବିଧାରେ ପକାଇପାରେ ।

ତେବେ ରାଜ୍ୟ ବିଜେପିର ଏକମାତ୍ର ସତ୍ୟ ହେଉଛି, ଏଠି ଯିଏ ସଭାପତି ହେଲେ ମଧ୍ୟ ଅସଲ କ୍ଷମତା ଧର୍ମେନ୍ଦ୍ରଙ୍କ ହାତରେ ରହିବ ଓ ରାଜ୍ୟ ବିଜେପି ସଭାପତି ତାଙ୍କର ପ୍ରକ୍ସି ଭାବରେ  କାମ କରିବାକୁ ବାଧ୍ୟ ହେବେ ।