ରାହୁଲ ଗାନ୍ଧୀଙ୍କ ପାଇଁ ବିଜେପିର ମାଗଣା ପ୍ରଚାର !!

ରାଜନୀତିରେ ବିରୋଧ ମଧ୍ୟ ବିଜ୍ଞାପନର କାମ କରିଥାଏ । ପୂର୍ବତନ କଂଗ୍ରେସ ସଭାପତି ରାହୁଲ ଗାନ୍ଧୀ ଆଜିର ତାରିଖରେ ସବୁଠୁ ଅଧିକ ଚର୍ଚ୍ଚିତ ଏବଂ ପୂରା ଗଣମାଧ୍ୟମରେ ତାଙ୍କର ଛବି ଛାଇକି ରହିବାର ଏକମାତ୍ର କାରଣ ହେଉଛି, ଶାସକ ଦଳ ବିଜେପି ଏବେ ରାହୁଲଙ୍କ ଦ୍ଵାରା ଏକପ୍ରକାର ଆକ୍ରାନ୍ତ । ଇତିହାସରେ ପ୍ରଥମ ଥର ଲାଗି ଶାସକ ଦଳ ସପ୍ତାହେ ରୁ ଅଧିକ କାଳ ସଂସଦ ଚଳାଇ ଦେଉନାହିଁ । ରାହୁଲ ଗାନ୍ଧୀ କ୍ଷମା ମାଗିଲେ ଯାଇ ସଂସଦ ଚାଲିବ ବୋଲି ବିଜେପି କହୁଛି । ତେବେ ରାହୁଲ ଗାନ୍ଧୀ କାହିଁକି ଓ କାହାକୁ କ୍ଷମା ମାଗିବେ ? ସଂସଦରେ ତାଙ୍କ ବିରୋଧରେ ବିଜେପି ଅଭିଯୋଗ କରିଛି । ସେହି ଅଭିଯୋଗ ଆଧାରରେ ରାହୁଲ ଗାନ୍ଧୀଙ୍କୁ ଦୋଷୀ ବୋଲି ଘୋଷଣା କରି ଦିଆଆଯାଇ ପାରିବ କି ? ରାହୁଲଙ୍କ ବିରୋଧରେ ବିଜେପି ଯେଉଁ ଅଭିଯୋଗ ଆଣିଛି, ତାର ଉତ୍ତର ସେ ରଖିବାର ସୁଯୋଗ ପାଇଲେଣି କି ? ଯେହେତୁ ରାହୁଲ ନିଜ ପକ୍ଷ ରଖିବାର ସୁଯୋଗ ପାଇନାହାନ୍ତି, ତେଣୁ ତାଙ୍କୁ ବହିସ୍କାର କରିବାର ସୁଯୋଗ ବାଚସ୍ପତିଙ୍କ ପାଖରେ ମଧ୍ୟ ନାହିଁ । ତାଙ୍କ ବିରୋଧରେ କିଛି ବି କାର୍ଯାନୁଷ୍ଠାନ ନେବାକୁ ହେଲେ ତାଙ୍କର ସ୍ପଷ୍ଟୀକରଣ ଶୁଣିବା ନିହାତି ଜରୁରୀ । ବିଜେପି ଲାଗି ସବୁଠୁ ବଡ ସମସ୍ୟା ହେଲା, ରାହୁଲ ଗାନ୍ଧୀ ଅଭିଯୋଗ କରି ଚୁପ ହୋଇ ବସିନାହାନ୍ତି । ସେ ବାରମ୍ବାର ନିଜ କଥାକୁ  ଦୋହରାଇ ଚାଲିଛନ୍ତି । ଅର୍ଥାତ ସେ ନିଜ କଥାରେ ଅଟଳ ରହିଛନ୍ତି, ତେଣୁ କ୍ଷମା ମାଗିବାର ପ୍ରଶ୍ନ ଉଠୁନାହିଁ ।

ଏବେ ବିଜେପି ଏଇ ପ୍ରସଙ୍ଗକୁ ଏମିତି ଅବସ୍ଥାକୁ ନେଇ ଆସିଛି ଯେ ସେଥିରୁ ଫିଟିବାର ବାଟ ଆଉ ନାହିଁ । ସଂସଦ ଚଳାଇବାକୁ ହେଲେ ରାହୁଲଙ୍କୁ କ୍ଷମା ମାଗିବାକୁ ପଡିବ, ଯାହା ସେ ଆଦୌ କରିବେ ନାଇଁ । ବିଜେପିର ସମ୍ମାନ ବଞ୍ଚାଇବାକୁ ରାହୁଲଙ୍କୁ ହୁଏତ ସସପେଣ୍ଡ କରିବାକୁ ବାଚସ୍ପତିଙ୍କ ଉପରେ ଚାପ ପଡିବ । ଏହା ରାହୁଲଙ୍କୁ ଅଧିକ ଲୋକପ୍ରିୟତା ଦେବ ଏବଂ ଗଣତନ୍ତ୍ର ଏ ଦେଶରେ ସଙ୍କଟରେ ଅଛି ବୋଲି ରାହୁଲ ଯାହା କହିଛନ୍ତି, ତାହା ପୁଣିଥରେ ପ୍ରମାଣିତ ହୋଇଯିବ ।

ଇତି ମଧ୍ୟରେ ବିଜେପିର ରାହୁଲ ବିରୋଧୀ ଅଭିଯାନ ଶୀର୍ଷରେ ପହଞ୍ଚିଛି । ଏକଦା ତାଙ୍କୁ “ପପ୍ପୁ” ବୋଲି କହି ଟ୍ରୋଲ କରୁଥିବା ବିଜେପି ଏଇ କିଛିଦିନ ହେଲା ତାଙ୍କ ବିରୋଧରେ ନିଜର ସବୁ ଶକ୍ତି ଓ ସାମର୍ଥ୍ୟକୁ ବିନିଯୋଗ କରୁଛି । ରାହୁଲଙ୍କ ବିରୋଧରେ ଉପ ରାଷ୍ଟ୍ରପତି ଓ ପ୍ରଧାନମନ୍ତ୍ରୀ ସାଧାରଣ ସଭାରେ ଭାଷଣ ଦେଉଛନ୍ତି। ମନ୍ତ୍ରୀମଣ୍ଡଳର ସବୁ ସଦସ୍ୟ ପାଣି ପିଇ ପିଇ ରାହୁଲଙ୍କୁ ଗାଳି ଦେବାକୁ ନିଜର ସବୁଠୁ ବଡ କର୍ତ୍ତବ୍ୟ ବୋଲି ଧରି ନେଇଛନ୍ତି। ବିଜେପିର ଏହି ବିରୋଧ ଅଭିଯାନ ରାହୁଲଙ୍କ ଛବିକୁ ଅଧିକ ଉଜ୍ଜଳ କରୁଛି । ବିଜେପି ପଇସାରେ ରାହୁଲଙ୍କ ପ୍ରଚାର ହେଉଛି ଏବଂ ବିଜେପି ନିଜ ଜାଲରେ ନିଜେ ଫସିଯାଇଛି ।

ଏହି ପ୍ରସଙ୍ଗକୁ ନେଇ ରାଜନୀତି କରିବାରେ କିଛି ଅସୁବିଧା ନଥିଲା। ଏହାକୁ ସଂସଦକୁ ନେଇ ଆସିବା ବିଜେପି ପାଇଁ ମହଙ୍ଗା ପଡିଛି । ସଂସଦ ଚଳାଇବାର ଦାୟିତ୍ଵ ସରକାରଙ୍କର । ରାହୁଲ ଗାନ୍ଧୀଙ୍କ ଲାଗି ସଂସଦ ଅଚଳ କଲେ ଏଥିରେ କଂଗ୍ରେସର କ୍ଷତି ତ ହେବାର ନାଇଁ, ଓଲଟି ଏହା ସରକାର ଓ ସରକାରୀ ଦଳକୁ ଏକଛତ୍ରବାଦୀ ବୋଲି ବାରତା ଦେବ ।