ମାନସିକ ଭାରସାମ୍ୟ ହରାଇଛନ୍ତି ଜୟନାରାୟଣ: ବିଜେଡି
ସମତା
ବିରୋଧୀ ଦଳ ନେତା ଜୟନାରାୟଣ ମିଶ୍ର ମାନସିକ ଭାରସାମ୍ୟ ହରାଇଛନ୍ତି ଓ ତାଙ୍କର ଚିକିତ୍ସା ଦରକାର ବୋଲି ବିଜେଡି ଆଜି ତୀବ୍ର କଟାକ୍ଷ କରିଛି। ବିଧାନସଭା ବାହାରେ ବିରୋଧୀ ଦଳ ନେତା ଜୟନାରାୟଣ ମିଶ୍ର ଆଜି ନବ ଦାସ ହତ୍ୟା ମାମଲାରେ ଫାଇଭ୍ ଟି ସଚିବ ଭିକେ ପାଣ୍ଡ୍ୟାନ ଏବଂ ଯାଜପୁର ବିଧାୟକ ପ୍ରଣବ ପ୍ରକାଶ ଦାସଙ୍କ ଉପରକୁ ଆଙ୍ଗୁଠି ଉଠାଇବା ପରେ ବିଜେଡି ନିଜର ପ୍ରତି ଆକ୍ରମଣକୁ ଜୋରଦାର କରିଛି। ବିଧାନସଭାରେ ବିଜେଡିର ମୁଖ୍ୟ ସଚେତକ ପ୍ରଶାନ୍ତ ମୁଦୁଲି ଏକ ପ୍ରେସ ବିଜ୍ଞପ୍ତିରେ କହିଛନ୍ତି ଯେ ଜୟନାରାୟଣ ପାଗଳଙ୍କ ଭଳି ପ୍ରଳାପ କରୁଛନ୍ତି ଓ ବିଜେଡି ତାଙ୍କ କଥାକୁ ଗୁରୁତ୍ବ ଦେଉନାହିଁ। ରାଜସ୍ବ ମନ୍ତ୍ରୀ ପ୍ରମିଳା ମଲ୍ଲିକ ମଧ୍ୟ ବିଜେପିକୁ ତୀବ୍ର ସମାଲୋଚନା କରି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ୨୦୧୭ ମସିହାରେ ବ୍ରହ୍ମପୁରର ଲକ୍ଷ୍ମୀଦତ୍ତ ପ୍ରଧାନ ହତ୍ୟା ମାମଲାରେ ଅଭିଯୁକ୍ତମାନଙ୍କୁ ଆଶ୍ରୟ ଦେବାରେ ସହାୟକ ହୋଇଥିଲେ ବୋଲି ଅଭିଯୋଗ କରିଛନ୍ତି। ୨୦୧୮ ରେ ଦିଲେଶ୍ବର ସାହୁ ହତ୍ୟା ମାମଲାରେ ବିରୋଧୀ ଦଳ ନେତା ଜୟ ନାରାୟଣ ମିଶ୍ର ଓ ବିଜେପି ଯୁବମୋର୍ଚ୍ଚା ସଭାପତି ଇରାଶିଷ ଆଚାର୍ଯ୍ୟ ଗିରଫ ହୋଇଥିଲେ। ଅପରାଧ ମାମଲାରେ ଜାମିନରେ ଥିବା ବିଜେପି ନେତାଙ୍କ ଅଭିଯୋଗର କିଛି ମୂଲ୍ୟ ନାହିଁ ବୋଲି ବିଜେଡି କହିଛି।
