ଚମେଲି ଓଝାଙ୍କ ଚିତ୍କାର ଓ ସରକାର

କେନ୍ଦ୍ରାପଡା ଜିଲା ତିଖିରି ଗ୍ରାମ ପଞ୍ଚାୟତର ସରପଞ୍ଚ ଚମେଲି ଓଝା ଏବେ ଜେଲରେ ଅଛନ୍ତି । ନା, ଏବେ ଜେଲରେ ତାଙ୍କ ଦେହ ଖରାପ ହେବାରୁ ସେ ଡାକ୍ତରଖାନାରେ ଅଛନ୍ତି । ଓଡିଶା ସରକାରଙ୍କ ଅତ୍ୟନ୍ତ ତତ୍ପର ଓ ପାରଙ୍ଗମ ପୁଲିସ ତାଙ୍କୁ ଡାକ୍ତରଖାନାରୁ ହିଁ ଗିରଫ କରିଥିଲେ ଓ ଜେଲରେ ତାଙ୍କ ଦେହ ବେଶୀ ଖରାପ ହେବାରୁ ତାଙ୍କୁ ଆଣି କେନ୍ଦ୍ରାପଡା ଡାକ୍ତରଖାନାର ବାରଣ୍ଡାରେ ଗଡେଇ ଦେଇଥିଲେ । ଚମେଲି ଓଝାଙ୍କ ଅପରାଧ କଣ ? ସେ କଣ ଜଣେ ଅଭ୍ୟାସଗତ ଅପରାଧୀ ନା ସେ ଏମିତି କିଛି କରି ପକେଇଛନ୍ତି ଯେଉଁଥିରେ ତାଙ୍କୁ ଜେଲକୁ ପଠାଇବା ଏକମାତ୍ର ସରକାରୀ ବିକଳ୍ପ ଥିଲା ? ପୂରା ଘଟଣାକ୍ରମରୁ ଗୋଟେ କଥା ଜଣା ପଡୁଛି ଯେ, ଚାମେଲିଙ୍କର ଏକମାତ୍ର ଅପରାଧ ହେଉଛି ସେ ବିଡିଓଙ୍କୁ ଦାବିପତ୍ର ଦେବାବେଳେ ତାର ଫେସବୁକ ଲାଇଭ କରୁଥିଲେ । ସେଇ ଲାଇଭ କରିବା ଅପରାଧକୁ ବଢେଇ ଚଢେଇ ବିଡିଓ ତାଙ୍କ ଉପରେ ଆକ୍ରମଣ ହେଇଛି ବୋଲି ଅଭିଯୋଗ ଆଣିଲେ । ଅଥଚ ପୂରା ଜଗତ ଦେଖୁଥିଲା ଯେ, ବିଡିଓ ଓ ପୁଲିସ ଚାମେଲିଙ୍କୁ ଜବତ କରିବାକୁ ଚେଷ୍ଟା କରୁଥିଲେ । ସରକାରୀ ଅଧିକାରୀମାନେ ଲୋକ ପ୍ରତିନିଧିମାନଙ୍କ ପ୍ରତି କେତେ ନିମ୍ନ ରୁଚିର ବ୍ୟବହାର ଦେଖାନ୍ତି, ଏହି ଘଟଣାଟି ତାର ଏକ ଉଦାହରଣ ।

ଏହି ଘଟନା ପରେ ଏବେ ରାଜ୍ୟର ଗଣମାଧ୍ୟମରେ ଚମେଲି ଓଝାଙ୍କୁ ନେଇ ଚର୍ଚ୍ଚା ବଢିଯାଇଛି । ଆଜିର ତାରିଖରେ ସବୁଠୁ ବଡ ପ୍ରଶ୍ନ ହେଉଛି,  ଚମେଲି ଓଝା କିଏ? ସେ କେଉଁ ରାଜନୈତିକ ଦଳର ସମର୍ଥକ ଓ ସେ ମହାକାଳପଡା ବିଧାୟକଙ୍କ ଆଖିରେ କଣ୍ଟା ହେଇ ଫୁଟିଲେ କାହିଁକି ? ଜଣେ ମହିଳା ସରପଞ୍ଚଙ୍କୁ ଜବତ କରିବାକୁ ପୂରା ରାଜ୍ୟ ପ୍ରଶାସନ, ତାଙ୍କର ପୋଷା ମିଡିଆ ଓ ପୁଲିସ ମାତ୍ରାଧିକ ତତ୍ପରତା ପ୍ରକାଶ କରୁଛି କାହିଁକି ? ଏ ସବୁ ପ୍ରଶ୍ନର ଉତ୍ତର ଯଦିଓ ଅଛି, ଆମ ପାଇଁ ସେ ସବୁ ପ୍ରଶ୍ନର କୌଣସି ଅର୍ଥ ନାଇଁ । ସାଧାରଣ ନାଗରିକ ଭାବରେ ଆମେ ଦେଖୁଛୁ ଯେ, ଗୋଟେ ଉଛ ଶିକ୍ଷିତା ସାହସୀ ଝିଅ ଗୋଟେ ପ୍ରଶାସନକୁ ପ୍ରଶ୍ନ ପଚାରିଲେ, ପ୍ରଶାସନ ରାକ୍ଷସ ପାଲଟି ଯାଉଛି କେମିତି । ଆମେ ଦେଖୁଛୁ, କେମିତି ଚମେଲି ଓଝାକୁ ଛାପି ଦେବା ପାଇଁ ପୂରା ସରକାର ଲାଗି ପଡିଛି, ତାକୁ ଦେଖିଲେ ସରକାର ଉପରେ ଦୟା ଆସୁଛି ।

ଚମେଲି ଓଝା ବିଡିଓଙ୍କୁ ବାବିପତ୍ର ଦେବାର ଭିଡିଓ କରିବା ଅପରାଧ କି ? ଯଦି ଏହା ଅପରାଧ, ତା ହେଲେ ଏ ଅପରାଧର ସବୁଠୁ ବଡ ଅପରାଧୀ ଆମର ପ୍ରଧାନମନ୍ତ୍ରୀ ଓ ମୁଖ୍ୟମନ୍ତ୍ରୀ । ଏମାନେ ଯାହା କଲେ ତାର ଲାଇଭ ଚିତ୍ର ଆମେ ଦେଖୁଛୁ । ପ୍ରଧାନମନ୍ତ୍ରୀ ଝାଲମୁଢି ଖାଇବା ଗତ କିଛିଦିନ ତଳର ଏକ ଭାଇରାଲ ଦୃଶ୍ୟ ଥିଲା । ଟେକ୍ନୋଲଜି ସାଧାରଣ ଲୋକଙ୍କୁ ନିଜ ସ୍ଵରକୁ ଅଧିକ ସକ୍ରିୟ କରିବାର ସୁଯୋଗ ଦେଇଛି । ସେଇ ଟେକ୍ନୋଲଜିର ବ୍ୟବହାର ଚମେଲିଙ୍କର ଅଧିକାର । ତାଙ୍କୁ ସେ ଅଧିକାରରୁ ବଞ୍ଚିତ କରିବାକୁ ବିଡିଓ ବା ପୁଲିସର ଅଧିକାର ଆସିଲା କେମିତି ?  

ଏଇ ସମୁଦାଯ ଘଟଣାକ୍ରମର ତର୍ଜମା କଲେ ଗୋଟେ କଥା ସ୍ପଷ୍ଟ ହୋଇଯିବ । ସରକାର ପାଇଁ ଅଧିକ କଥା କହୁଥିବା ଓ ଅଧିକ ସାହସ ରଖିଥିବା ଝିଅଟି ଏକ ସମସ୍ୟା । ଚମେଲି ଓଝା ଏତେ କଥା କହୁଛନ୍ତି କାହିଁକି, ଏଇଟା ସରକାର ପାଇଁ ସବୁଠୁ ବଡ ସମସ୍ୟା । ପ୍ରଶାସନର ବୁଲଡୋଜର ଆଗରେ ଠିଆ ହେବାର ସାହସ ରଖିଥିବା ଏ ଝିଅଟିକୁ ପ୍ରଶାସନ ସବୁଦିନ ପାଇଁ ଚୁପ କରିଦେବାକୁ ଚାହେଁ । ସେଥିପାଇଁ ତାଙ୍କୁ ଗତ ୭୨ ଘଣ୍ଟା ଭିତରେ ଅକଥନୀୟ ନିର୍ଯାତନା ଦିଆଯାଇଛି ଓ ଆଗକୁ ମଧ୍ୟ ତାଙ୍କୁ ଚାପଗ୍ରସ୍ତ କରି ରଖାଯିବ ।  ବିଜେପି ଶାସନରେ କଥା କହୁଥିବା ନାଗରିକକୁ ସହ୍ୟ କରାଯାଏ ନାହିଁ । ଚମେଲିଙ୍କ କଥା କହିବାର ସାହସକୁ ପୁଲିସ ଜରିଆରେ ବିଭିନ୍ନ ଦଫା ଲଗାଇ  ଛାପି ଦିଆଯିବ କିମ୍ବା ଆଗାମୀ ଦିନରେ ତାଙ୍କୁ କିଣିବାକୁ ଚେଷ୍ଟା କରାଯିବ । ଯେତେବେଳେ ଗୋଟେ ସାହସୀ ଝିଅକୁ ସମର୍ଥନ କରିବାକୁ ଆମ ସମାଜ ଆଗେଇ ଆସିବ, ସେତେବେଳେ ଭୟରେ ସରକାର ଚମେଲିଙ୍କୁ ବିଭିନ୍ନ ବାଗରେ ପ୍ରଲୋଭିତ କରିବେ ଓ ତାଙ୍କୁ ନିଜ ସପକ୍ଷରେ ଠିଆ କରିବାକୁ ଉଦ୍ୟମ କରିବେ।  ଚମେଲି ଏତେ ଚାପ ଭିତରେ ନିଜ ବିବେକ ଓ ସାହସକୁ ବଞ୍ଚେଇ ରଖିପାରିବେ କି ନା ତାହା ଆଗାମୀ ସମୟ କହିବ ।