ଜାଳିଦିଅ : ଉଭେଇଯାଅ
ରାଜେନ୍ଦ୍ର କିଶୋର ପଣ୍ଡା 
ମୋଡ଼ ନେବା ଆଗରୁ ୟା'ପରେ
ସାବଧାନ ରୁହ :
ଭୁଲିଗଲି ମାଲିକର ଆଦେଶ ।
କଥା ହେଲା, ପ୍ରତ୍ୟାଶା ନ ଥିଲା :
ସେଥିପାଇଁ ଆଶଂକା ନ ଥିଲା ।
ମୋଡ଼ କ'ଣ, କ'ଣ ନୁହେଁ ମୋଡ଼ :
ଜଂଗଲରେ ଚାଲିବାରେ
ଫରକ ନ ଥିଲା ।
ଘଂଚ ଭିତରେ ଗମିଲେ
ଏକା ଲାଗେ ଖରା ଜ୍ୟୋତ୍ସ୍ନା
ଯଦି କୋଉଠି ପଡ଼େ ।
ନ ପଡ଼େ ତ, ଝାପସାଂଧାର
ମଥା ଉପରେ ସବୁଠାରେ
ଝିପଝିପ୍ ଝରେ...
ମୋଡ଼ ଆସିଯିବ ଆଉ
ମୁହାଁମୁହିଁ ତୁମେ :
ଏହା ମୋର ସ୍ଵପ୍ନର ବାହାରେ ।
ଗଂଠି ପବ ଚେର ପତ୍ର ଶିରାରେ ଶିରାରେ
ଜଂଗଲର ଗଛ ସକଳରେ
ଫିକାଗେରୁ ଜ୍ୟୋତିଟିଏ
ମୃଦୁମୃଦୁ ଖେଳେ ।
ଯିଏ ଯୋଉଠି ଅଛି ଥାଉ ସ୍ଥିର ହୋଇ
ସଚିବାଳୟରେ ଆଉ ଛଅ ନଂବରରେ
ବାଣୀବିହାରରେ ଅବା ସାଁତରାପୁରରେ
ଦୂରଦର୍ଶନରେ ।
ଏ ଋତୁ ସମୟ ବାହାରର ଋତୁ ―
ଭୁବନେଶ୍ଵରୀ ବିରାଜେ
ଭୁବନେଶ୍ଵରରେ ।
ଦୁଂଦୁଭି ଶିହରିଉଠେ ସୁଧର୍ମା ସଭାରେ ।
ସାରା ଜଗତର ଶିଶୁ
ଖିଲଖିଲ୍ଲ୍ ପବିତ୍ର ହର୍ଷରେ ।
ଅଣିମାଲଘିମା ତୁମେ
ମହାଦିମାଭୂମା ତୁମେ
କବିତାର କ୍ଷୁଧା ପାଇଁ ଅନ୍ନପୂର୍ଣା ତୁମେ,
ମୋହି ହୋଇଯାଇଛି ମୁଁ ମୁହୁର୍ମୁହୁଃ
ସାମ୍ନାସାମ୍ନି ଥାଇ ।
କବିତାର ଆଢୁଆଳରେ
ମୁହାଁମୁହିଁ ସିଧା ନ ଅନାଅ :
ଏହା ଭୁଲିଯାଇ ।
ବିଧି ଉପଚାର ବି ତ କିଛି ଜଣାନାଇଁ,
ପ୍ରସ୍ତୁତି ଇ ନାହିଁ ।
କବିତାଠୁ ପ୍ରିୟ ଅବା ନୀରବତା
ମୋହିନୀର ମୋକ୍ଷ-ଛିଟା ପାଇ !
ଚାହାଣିରେ ଜାଳିଦିଅ
ଆଉ ତୁମେ ଉଭେଇଯାଅ
ଏ ପ୍ରାପ୍ତିରୁ
ଦେବ ଯଦି ତ୍ରାହି ।।
