ମଣିପୁର ଭାରତରେ ଅଛି ବୋଲି ଆମେ ଭାବୁଛୁ ତ !!

ଗତ ସାତ ସପ୍ତାହ ହେଲା ମଣିପୁର ଜଳୁଛି । ପୂରା ରାଜ୍ୟରେ ଅରାଜକତା । ହାଣକାଟ ଓ ମାରପିଟ ରୋକିବାରେ ଆମର ସେନାବାହିନୀ ମଧ୍ୟ ସମର୍ଥ ହେଉନାହାନ୍ତି । ସାତ ସପ୍ତାହ ହେଲା ରାଜ୍ୟରେ ଇଣ୍ଟରନେଟ ସେବା ବନ୍ଦ ରହିଛି । ପେଟ୍ରୋଲ –ଡିଜେଲ ମିଳୁନାହିଁ । ଅତ୍ୟାବଶ୍ୟକ ଖାଦ୍ଯ ପଦାର୍ଥ ଓ ଔଷଧ ମଧ୍ୟ ମିଳୁନାଇଁ । ଲୋକେ ପୁଲିସ ଏବଂ ସେନାବାହିନୀର ବିଭିନ୍ନ ଶିବିରରୁ ଅସ୍ତ୍ରଶସ୍ତ୍ର ଛଡେଇ ନେଉଛନ୍ତି । ପୁଲିସ, ସେନାବାହିନୀ, ଆସାମ ରାଇଫଲ୍ସ ଏବଂ ସାଧାରଣ ଲୋକଙ୍କୁ ମିଶାଇ ପ୍ରାୟ ଶହେ ଲୋକ ଏହି ହିଂସାରେ ପ୍ରାଣ ହରାଇଲେଣି । ବାସ୍ତବରେ ମୃତ୍ୟୁ ସଂଖ୍ୟା ବହୁ ଅଧିକ ବୋଲି କୁହାଯାଉଛି । ଗତ ରବିବାର ଦିନ ପୁଲିସ ଉପସ୍ଥିତିରେ ପ୍ରାୟ ୨୦୦୦ ଲୋକ ଗୋଟେ ଆମ୍ବୁଲାନ୍ସକୁ ପୋଡି ଦେଇଛନ୍ତି । ଏଥିରେ ଗୋଟେ ୭ ବର୍ଷର   ବାଳକ, ତା ମା ଏବଂ ଆଉ ଜଣେ ସମ୍ପର୍କୀୟ ଜୀଅନ୍ତା ପୋଡି ମରିଛନ୍ତି । ହିଂସାର ଏ ଜଘନ୍ୟ ତାଣ୍ଡବ ରୋକିବାରେ ଭାରତ ସରକାର ଏବଂ ମଣିପୁର ସରକାରଙ୍କର କୌଣସି ଆଗ୍ରହ ଥିବା ପରି ଦେଖାଯାଉ ନାହିଁ । ଜାତୀୟ ଗଣମାଧ୍ୟମରେ ମଣିପୁରକୁ ନେଇ ସେମିତି କିଛି ଚର୍ଚ୍ଚା ମଧ୍ୟ ନାହିଁ ।

ମଣିପୁରରେ ତଥାକଥିତ ଡବଲ ଇଞ୍ଜିନ ସରକାର ଚାଲିଛି । କେନ୍ଦ୍ର ଏବଂ ରାଜ୍ୟ ସରକାରରେ ବିଜେପି ରହିଛି । ହେଲେ ସାତ ସପ୍ତାହ ଧରି ଗୋଟେ ରାଜ୍ୟରେ ଅରାଜକତାର ଚରମ ଅବସ୍ଥା ଆମେ ଦେଖୁଛୁ । ମଣିପୁର ମୁଖ୍ୟମନ୍ତ୍ରୀ ଏନ ବିରେନ ସିଂ ସଂଖ୍ୟାଗରିଷ୍ଠ “ମଇତେଇ” ଗୋଷ୍ଠୀର । “ମଇତେଇ” ବନାମ “ନାଗା” ଏବଂ “କୁକି” ଜନଜାତି ଭିତରେ ଚାଲିଥିବା ଏହି ଭୟଙ୍କର ହିଂସାକାଣ୍ଡକୁ ରୋକିବାରେ ଭାରତ ସରକାରଙ୍କ ବିଫଳତାକୁ ନେଇ କେହି ପ୍ରଶ୍ନ ବି କରୁନାହାନ୍ତି ।

ପୂରା ରାଜ୍ୟ ଜଳିବାର ମାସେ ପରେ ଜଳିବା ପରେ କେନ୍ଦ୍ର ଗୃହ ମନ୍ତ୍ରୀ ମଣିପୁର ଗସ୍ତରେ ଗଲେ । ଜୁନ ପ୍ରଥମ ସପ୍ତାହରେ ମଣିପୁରରେ ହିଂସାକାଣ୍ଡ ଓ ଅମିତ ଶାହାଙ୍କୁ ଭବ୍ୟ ସ୍ଵାଗତ ସମାନ୍ତରାଳରେ ଚାଲିଥିଲା । ଗୃହମନ୍ତ୍ରୀଙ୍କ ଗସ୍ତ ପରେ ହିଂସାକାଣ୍ଡ କମିବା ପରିବର୍ତୀ ଏବେ ଏହା ଉଗ୍ର ହେବା ଆରମ୍ଭ କରିଛି । ଭାରତ ସରକାର ଏକପ୍ରକାର ହାତ ବାନ୍ଧି ବସିଛନ୍ତି ।

ମଣିପୁର ମୁଖ୍ୟମନ୍ତ୍ରୀ ଶାନ୍ତି ପ୍ରତିଷ୍ଠା ଅପେକ୍ଷା ଏହାକୁ ଅଧିକ ଉଗ୍ର କରାଇବାରେ ପ୍ରମୁଖ ଭୂମିକା ନେଉଛନ୍ତି ବୋଲି ମଣିପୁରର ନାଗରିକ ସମାଜ ଅଭିଯୋଗ କରୁଛନ୍ତି । ସାତ ସପ୍ତାହ ଧରି ଆଇନ ଶ୍ରୁଙ୍ଖଳା ପରିସ୍ଥିତି ସମ୍ଭାଳିବାରେ ବିଫଳ ଜଣେ ବ୍ୟକ୍ତିଙ୍କୁ ବିଜେପି ମୁଖ୍ୟମନ୍ତ୍ରୀ କରି ରଖିବା ଇ ସବୁଠୁ ବିସ୍ମୟକର ଘଟଣା ।

ପୂରା ଗୋଟେ ଭାରତୀୟ ରାଜ୍ୟ ଜଳୁଥିବା ବେଳେ, ଏହାକୁ ନେଇ ପ୍ରଧାନମନ୍ତ୍ରୀ ଗୋଟେ ଶବ୍ଦ ମଧ୍ୟ ଉଚ୍ଚାରଣ କରିନାହାନ୍ତି । ମଣିପୁର ଆମ ଦେଶର ଏକ ଐତିହ୍ୟ ସମ୍ପନ୍ନ ରାଜ୍ୟ। ତାକୁ ସଂପୂର୍ଣ୍ଣ ଅଣଦେଖା କରି ମୋଦୀ ସରକାର ଦେଶକୁ କି ବାର୍ତ୍ତା ଦେବାକୁ ଚାହୁଁଛନ୍ତି ?