ତମେ ଯଦି ଜଣେ ଲେଖକ
କେଦାର ମିଶ୍ର
( ଚାର୍ଲସ୍ ବୁକୋସ୍କି : ୧୯୮୬ ମସିହାରେ ଆମେରିକାର ପ୍ରସିଦ୍ଧ ‘ ଟାଇମ୍ ’ ପତ୍ରିକା ତାଙ୍କୁ କହିଥିଲା ନିମ୍ନବର୍ଗୀୟ ଆମେରିକୀୟମାନଙ୍କର ଲେଖକ । ହେନ୍ରୀ ଚାର୍ଲସ୍ ବୁକୋସ୍କି ( ଅଗଷ୍ଟ ୧୬ , ୧୯୨୦ - ମାର୍ଚ୍ଚ ୯ , ୧୯୯୪ ) ଆମେରିକାର ଅନ୍ୟତମ ଶ୍ରେଷ୍ଠ କବି , ଗାଳ୍ପିକ ଓ ଔପନ୍ୟାସିକ । ସାଧାରଣ ଜୀବନର ଛୋଟ ଛୋଟ ଦୁଃଖକୁ ନେଇ ଚମତ୍କାର କବିତା ଲେଖନ୍ତି ବୁକୋସ୍କି । ତାଙ୍କ କବିତାରେ ସାଧାରଣ ମଣିଷର ଜୀବନଯନ୍ତ୍ରଣା ସୂକ୍ଷ୍ମ କଳାତ୍ମକ ରୂପ ଧାରଣ କରେ । ଚାର୍ଲ୍ସ ବୁକୋସ୍କିଙ୍କର ଏ କବିତା । ଯେ କୌଣସି ଲେଖକ ଲାଗି ଏଇଟା ଗୋଟେ ସତର୍କବାଣୀ । କବିମାନଙ୍କ ଲାଗି କବିତାର ଦିନରେ ଏଇଟା ସବୁଠୁ ବେଶୀ ପଢିବା ଜରୁରୀ । )
ସେ ଯାହା ବି ହେଉ
ତମ ମୁଣ୍ଡରେ ବିସ୍ଫୋରଣ ଭଳି
ଯଦି କିଛି ବାହାରି ଆସୁନାହିଁ
ତା' ହେଲେ ଲେଖ ନାହିଁ
ଅନାୟାସରେ ଯଦି ସେମିତି କିଛି ଆସୁନାହିଁ
ତମ ହୃଦୟରୁ, ମନରୁ
ତମ ପାଟିରୁ କି ଅନ୍ତଃକରଣରୁ
ତା' ହେଲେ ଲେଖ ନାହିଁ ।
ଯଦି ତମକୁ ଘଣ୍ଟା ଘଣ୍ଟା ବସି
ଭାବିବାକୁ ପଡୁଛି କମ୍ପ୍ୟୁଟର ଆଗରେ
ଯଦି ଟାଇପ ରାଇଟର ଆଗରେ ବସି
ତମେ ଖୋଜୁଛ ଶବ୍ଦ
ତା' ହେଲେ ଲେଖ ନାହିଁ ।
ଯଦି ପୁରସ୍କାର କି ପଇସା ଆଶାରେ ଲେଖୁଛ
ତା' ହେଲେ ଲେଖ ନାହିଁ
ଯଦି ପ୍ରେମିକାକୁ ପ୍ରଭାବିତ କରି
ତା ସାଙ୍ଗରେ ଶୋଇବାକୁ ଲେଖୁଛ
ତା' ହେଲେ ଲେଖ ନାହିଁ
ଯଦି ବାରମ୍ବାର ଲେଖୁଛ ଓ କାଟୁଛ
ତା' ହେଲେ ଲେଖ ନାହିଁ
ଯଦି କଠୋର ପରିଶ୍ରମ କଲେ ଯାଇ
ଲେଖି ହେବ ବୋଲି ଭାବୁଛ
ତା' ହେଲେ ଲେଖ ନାହିଁ
ଯଦି ଆଉ କାହା ଭଳିଆ ଲେଖିବାକୁ ଚାହୁଁଛ
ଭୁଲିଯାଅ, ଲେଖିବା ଛାଡିଦିଅ ।
ଯଦି ଲେଖା ତମ ଭିତରୁ ଶୁଭିବାର ଅଛି ଗର୍ଜନ ପରି
ଅପେକ୍ଷା କର
ଯଦି ଆପେ ଆପେ ଆସୁନାହିଁ ସେ ଗର୍ଜନ
ଯାଅ, ଅଲଗା କିଛି କର ।
ଯଦି ଲେଖି ସାରିଲା ପରେ ତମକୁ ଲାଗୁଛି ଯେ
ତମେ ଶୁଣାଇବା ଦରକାର ତମ ସ୍ତ୍ରୀକୁ
ତମ ପ୍ରେମିକ କି ପ୍ରେମିକାକୁ କି
ତମର ବାପା ମା ଙ୍କୁ କି ଆଉ କାହାକୁ
ଶୁଣ, ତମେ ଲେଖିବା ଲାଗି ପ୍ରସ୍ତୁତ ହୋଇନ ଏଯାଏଁ ।
ଅନ୍ୟ କେଉଁ ଲେଖକ ପରି ହୁଅ ନାହିଁ
ଲେଖକ ବୋଲାଉଥିବା ଆଉ ହଜାର ଲେଖକଙ୍କ ପରି ହୁଅ ନାହିଁ
ମାନ୍ଦା କି ବିରକ୍ତିକର ମଣିଷ ହୁଅ ନାହିଁ
ଛଳନା କର ନାହିଁ କି ନିଜକୁ ନିଜେ ଭଲପାଇ ମଜ୍ଜି ଯାଅନି।
ପୃଥିବୀର ଲାଇବ୍ରେରୀରେ ତମ ଭଳି କେତେ କିଏ
ଶୋଇ ଶୋଇ ହାଇ ମାରୁଛନ୍ତି
ସେଠି ଆଉ ଭିଡ଼ ବଢାଅନି
ଜମାରୁ ଲେଖ ନାହିଁ ।
ଯଦି ତମ
ଆତ୍ମାରୁ ହାବେଳି ପରି ଊଠି ଆସୁନି ଲେଖା
ଯଦି ତମକୁ ଲେଖା ଘାରୁନି ପାଗଳାମୀ ପରି
ହତ୍ୟା କି ଆତ୍ମହତ୍ୟାର ପ୍ରବଣତା ପରି
ତା' ହେଲେ ଲେଖ ନାହିଁ
ଯଦି ତମ ଭିତରର ସୂର୍ଯ୍ୟ ଜାଳିଦେଉନି ତମର ଅନ୍ତଃକରଣକୁ
ତା' ହେଲେ ଲେଖ ନାହିଁ ।
ଲେଖା ଯେବେ ଆସିବ
ସେ ଆପେ ଆପେ ଆସିବ
ଲେଖା ତମକୁ ବାଛିବ
ଓ ତମ ଭିତରେ ରହିବ
ତମେ ମଲା ଯାଏଁ କି ଲେଖା ଟି ତମ ଭିତରେ ମରିବା ଯାଏଁ ।
ଲେଖା ଲାଗି ସେଇ ଗୋଟେ ଇ ବାଟ
ତା ଠୁ ଅଲଗା କିଛି ନାହିଁ କି ନଥିଲା କେବେ ହେଲେ ।
........
ମୂଳ ରଚନା - ଚାର୍ଲ୍ସ ବୁକୋସ୍କି
ଅନୁବାଦ - କେଦାର ମିଶ୍ର
