ଗାଳି କରିବା ଯଦି ପ୍ରଧାନମନ୍ତ୍ରୀ ପଦର ଗରିମା ହୁଏ !!!

ଗତକାଲି ଲୋକସଭାରେ ରାଷ୍ଟ୍ରପତିଙ୍କ ଅଭିଭାଷଣ ଉପରେ ଆସିଥିବା ଧନ୍ୟବାଦ ପ୍ରସ୍ତାବର ଉତ୍ତର ରଖି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ବିରୋଧୀ ଦଳ, ବିଶେଷ କରି , କଂଗ୍ରେସ ଉପରେ ପ୍ରବଳ ବର୍ଷିଥିଲେ। ପ୍ରଧାନମନ୍ତ୍ରୀଙ୍କ ଭାଷଣ ସରୁ ସରୁ ଫେସବୁକରେ ଜଣେ ବନ୍ଧୁ ଲେଖିଲେ – “ମୋଦୀ ପାଣି ପିଇ ପିଇ କେବଳ ଗାଳି କଲେ”। ଅନେକ ବର୍ଷ ହେଲାଣି ମୁଁ ମୋଦୀଙ୍କ ଭାଷଣ ଶୁଭୁନାହିଁ । ଶୁଣିବା ଅପେକ୍ଷା ତାଙ୍କ ଭାଷଣ ପଢ଼ିବା ପରେ ତାର ଆଲୋଚନା ଟିକେ ସହଜ । ଭାରତର ଇତିହାସରେ କୌଣସି ପ୍ରଧାନମନ୍ତ୍ରୀ ବିରୋଧୀଙ୍କ ପ୍ରତି ଏ ପ୍ରକାର ଆକ୍ରାମକ ହେବାର ଉଦାହରଣ ବିରଳ । ୯  ବର୍ଷ ଶାସନ ଗାଦିରେ ରହିଲା ପରେ ମଧ୍ୟ ଜଣେ ପ୍ରଧାନମନ୍ତ୍ରୀ ଯଦି ୯ ବର୍ଷ ତଳର ସରକାରକୁ ଗାଳି କରିବା ଇ ନିଜର ସବୁଠୁ ବଡ ଉପଲବ୍ଧି ବୋଲି ଭାବନ୍ତି, ତା ହେଲେ ତାଙ୍କ ନେତୃତ୍ବର ସଫଳତାକୁ ନେଇ ସନ୍ଦେହ କରିବାର ଯଥେଷ୍ଟ କାରଣ ରହିଛି ।

ଚଳିତ ସଂସଦ ଅଧିବେଶନ ପୂର୍ବରୁ ସରକାର ପାଇଁ ଯାହା ସବୁଠୁ ବଡ ଅଡୁଆ ସୃଷ୍ଟି କରିଥିଲା ସେ ପ୍ରସଙ୍ଗରେ ପ୍ରଧାନମନ୍ତ୍ରୀ ପଦେ ବି ଉତ୍ତର ରଖିନଥିଲେ । ସଂସଦରେ ରାହୁଲ ଗାନ୍ଧୀ ଏବଂ ବିରୋଧୀ ଦଳ ଯେଉଁ ପ୍ରଶ୍ନ ସବୁ ଉଠାଇଥିଲେ ସେସବୁ ମୋଟାମୋଟି ଏମିତି –

୧.  ୨୦୧୪ରେ ଗୌତମ ଆଦାନୀଙ୍କ ପୃଥିବୀର ୬୦୯ ନମ୍ବର ଧନୀ ଥିବା ବେଳେ ୯ ବର୍ଷରେ ସେ ପୃଥିବୀର ଦ୍ଵିତୀୟ ଧନୀ ବ୍ୟକ୍ତିରେ ପରିଣତ ହେବାର ରହସ୍ୟ କଣ ?

୨. ମରିସସ ଏବଂ ସାଇପ୍ରସରେ ଥିବା ବିଭିନ୍ନ ବେନାମୀ କମ୍ପାନୀ ଜରିଆରେ ଆଦାନୀ ବ୍ୟବସାୟରେ ଯେଉଁ ପୁଞ୍ଜି ଲଗାଣ ହେଉଛି, ସେସବୁ କାହା ସମ୍ପତ୍ତି ?

୩. ଦେଶର ସାମୁଦ୍ରିକ ବନ୍ଦର, ବିମାନ ବନ୍ଦର, ଭିତ୍ତିଭୂମି ଓ ଫଳ ଉତ୍ପାଦନ କ୍ଷେତ୍ରରେ ଆଦାନୀ ସମୂହକୁ ମାତ୍ରାଧିକ ସରକାରୀ ଅନୁଗ୍ରହ ମିଳୁଛି କାହିଁକି ?

୪. ଦେଶର ବୈଦେଶିକ ନୀତି ଆଦାନୀକୁ କେନ୍ଦ୍ର କରି ଚାଲିଛି କି ? ପ୍ରଧାନମନ୍ତ୍ରୀଙ୍କ ସବୁ ବିଦେଶ ଗସ୍ତ ସହିତ ଆଦାନୀ ବ୍ୟବସାୟର ସୂତ୍ର ସଂଯୁକ୍ତ ରହିଛି କି ?

୫ ଗତ ଦୁଇ ସପ୍ତାହ ଭିତରେ ଆଦାନୀ ବ୍ୟବସାୟର ପ୍ରାୟ ୧୦ ଲକ୍ଷ କୋଟି ଟଙ୍କା କ୍ଷତି ହୋଇଛି । ହିଣ୍ଡନବର୍ଗ ରିସର୍ଚ୍ଚ ରିପୋର୍ଟ ପ୍ରକାଶ ପାଇବା ପରେ ଏହାକୁ ନେଇ ଦେଶ/ବିଦେଶରର ବଜାର ଆଦାନୀ ଉପରେ ଭରସା ତୁଟାଇ ଦେଇଥିବା ବେଳେ ଏ ସଙ୍କ୍ରାନ୍ତରେ ଦେଶର କୌଣସି ତଦନ୍ତକାରୀ ସଂସ୍ଥା ଚୁପ ବସିବାର କାରଣ କଣ ?

ପ୍ରାୟ ଦେଢ ଘଣ୍ଟା ଧରି ପ୍ରଧାନମନ୍ତ୍ରୀ ଦେଇଥିବା ଅନର୍ଗଳ ଭାଷଣରେ ଏ ସବୁ ପ୍ରଶ୍ନର କୌଣସି ଉତ୍ତର ନଥିଲା । ପ୍ରଧାନମନ୍ତ୍ରୀ ଆଦାନୀ ଘୋଟାଲାକୁ ଲୁଚାଇବାକୁ ୟୁପିଏ ସରକାର ଅମଳର ୨ଜି ଓ କୋଇଲା ଘୋଟାଲା କଥା ଉଠାଇଥିଲେ । ଯଦିଓ ନିଜ ୯ ବର୍ଷର ଶାସନ ଭିତରେ ପ୍ରଧାନମନ୍ତ୍ରୀ ଏହି ସବୁ ଘୋଟାଲାର ଦୋଷୀଙ୍କୁ ଦଣ୍ଡିତ କରିବାରେ ବିଫଳ ହୋଇଛନ୍ତି, ତଥାପି ଆଜିର ସରକାର ସମୟର ଦୁର୍ନୀତିକୁ ବିନା ତଦନ୍ତରେ “ସବୁ ବଢିଆ ଚାଲିଛି” ବୋଲି ପ୍ରଧାନମନ୍ତ୍ରୀ କହିବାର ଉଦ୍ୟମ କରିଛନ୍ତି ।

ଆଦାନୀ ସମ୍ପର୍କରେ ଗୋଟିଏ ଶବ୍ଦର ସ୍ପଷ୍ଟୀକରଣ ନଦେଇ ପ୍ରଧାନମନ୍ତ୍ରୀ ନିଜ ସରକାରକୁ ନିଷ୍କଳଙ୍କ ବୋଲି ପ୍ରମାଣପତ୍ର ଦେବା, ଅତୀବ ହାସ୍ୟାସ୍ପଦ । ସରକାର ଭୋଟରେ ଜିତୁଥିବାରୁ କୌଣସି ଅଭିଯୋଗର ତଦନ୍ତ ଜରୁରୀ ନୁହେଁ ବୋଲି ପ୍ରଧାନମନ୍ତ୍ରୀ ଅଜବ ଯୁକ୍ତି କରୁଛନ୍ତି । ଦେଶର ଅଶୀ ଲକ୍ଷ ଲୋକ ସରକାରୀ ମାଗଣା ରାଶନ ଉପରେ ନିର୍ଭରଶୀଳ ରହିବା ମୋଦୀ ସରକାରର ଏକ ବଡ ସଫଳତା ବୋଧହୁଏ ।

୯ ବର୍ଷ ତଳର କଂଗ୍ରେସ ସରକାରକୁ ଗାଳି କରି ଆଜିର ସରକାରର ଗରିମା ବଢିବ ନାହିଁ କିମ୍ବା ବିରୋଧୀଙ୍କୁ କଡା ଭାଷାରେ ଆକ୍ରମଣ କଲେ ପ୍ରଧାନମନ୍ତ୍ରୀ ପଦର ମର୍ଯାଦା ବଢିବ ନାହିଁ । ହେଲେ ନିଜ ଭାଷଣରେ ଅତିମୁଗ୍ଧ ପ୍ରଧାନମନ୍ତ୍ରୀଙ୍କୁ ଏକଥା କହିବ କିଏ?