ଡିଏନ ଗୃପ, ଆୟକର ଚଢାଉ ଓ ଗଣମାଧ୍ୟମର ରାଜନୀତି
କେଦାର ମିଶ୍ର
ଡିଏନ ଗୃପ, ଏ ନାଁଟି ସହିତ ଓଡିଶାର ଜନ ସାଧାରଣ ଗତ ଦଶ ଦିନ ଭିତରେ ବେଶ ପରିଚିତ ହୋଇଯାଇଛନ୍ତି । ଖବର କାଗଜ, ଟେଲିଭିଜନ ଏବଂ ସୋସିଆଲ ମିଡିଆରେ ଡିଏନ ଗୃପକୁ ନେଇ ଅନବରତ ଖବର, ଚର୍ଚ୍ଚା ଓ ବିତର୍କ ଜାରି ରହିଛି । ଦଶ ଦିନ ଆଗରୁ ଏହି କମ୍ପାନୀ ଗୃହ ନିର୍ମାଣ, ଶିକ୍ଷା ଓ ହୋଟେଲ ବ୍ୟବସାୟ କ୍ଷେତ୍ରରେ ପରିଚିତ ଥିଲା, ହେଲେ ଆଜି ଏହା ଘରେ ଘରେ ପରିଚିତ ହୋଇଛି ଭିନ୍ନ କାରଣରୁ । କେନ୍ଦ୍ର ସରକାରଙ୍କର ଆୟକର ବିଭାଗ ଡିଏନ ଗୃପର ବିଭିନ୍ନ କାର୍ୟାଳୟ ଓ ବିଭିନ୍ନ ପଦାଧିକାରୀଙ୍କ ଗୃହ ଉପରେ ଚଢାଉ କରିବାର ଖବରକୁ ନେଇ ଓଡିଶାର ଗଣମାଧ୍ୟମ ମାତ୍ରାଧିକ ଉତ୍ସାହୀ ହୋଇ ପଡିଛନ୍ତି । ବିଭିନ୍ନ ବ୍ୟବସାୟ ପ୍ରତିଷ୍ଠାନ ଉପରେ ଆୟକର ବିଭାଗର ଚଢାଉ ଏକ ସାଧାରଣ ବ୍ୟାପାର ହୋଇଥିବା ବେଳେ ଏହାକୁ ନେଇ ଗଣମାଧ୍ୟମରେ ଏମିତି ଚର୍ଚ୍ଚା ଚାଲିଛି ସତେ ଯେମିତି ଡିଏନ ଗୃପ ପାଖରେ ଓଡିଶାର ସବୁ ସମ୍ପତ୍ତି ଠୁଳ ହୋଇଛି । ଆୟକର ବିଭାଗର ଚଢାଉ ପରେ ତଥ୍ୟ ଅପେକ୍ଷା ଗଣମାଧ୍ୟମରେ ଆମେ ପ୍ରତିଦିନ ନୂଆ ନୂଆ କାହାଣୀ ଶୁଣିବାକୁ ପାଉଛୁ । ଏ ସମ୍ପର୍କରେ ଗଣମାଧ୍ୟମ ତଥ୍ୟ ଅପେକ୍ଷା ଗାଲୁଗପ ଶୁଣାଇ ଲୋକଙ୍କୁ ବିଭ୍ରାନ୍ତ କରିଚାଲିଛନ୍ତି ।
ଏହିସବୁ ଗାଲୁଗାପକୁ ନେଇ କିଛି କଥା ଜାଣିବା ଜରୁରୀ –
୧. ପ୍ରଥମେ ଡିଏନ ଗୃପର ଜଣେ ସାଧାରଣ କର୍ମଚାରୀଙ୍କ ଘରୁ ପ୍ରାୟ ତିରିଶ କୋଟି ଟଙ୍କାର ନଗଦ ଜବତ ହୋଇଛି ବୋଲି ଚାଞ୍ଚଲ୍ୟକର ଖବର ପ୍ରକାଶ ପାଇଲା । ତେବେ ଏହି କର୍ମଚାରୀମାନେ ପରବର୍ତ୍ତୀ ସମୟରେ କମ୍ପାନୀର ନିର୍ଦ୍ଦେଶକ ବୋଲି ଜଣାପଡିଥିଲା । ଜବତ ହୋଇଥିବା ଟଙ୍କାର ପରିମାଣ ୩୦ କୋଟି ନୁହଁ ବରଂ ୯ କୋଟି ବୋଲି ପରବର୍ତ୍ତୀ ସମୟରେ ସ୍ପଷ୍ଟ ହୋଇଗଲା ।
୨. ୩୦ କୋଟି ଟଙ୍କା ହଠାତ ୯ କୋଟି ହୋଇଗଲା କେମିତି ବୋଲି ଗଣମାଧ୍ୟମରେ ଆଉ ଏକ ନୂଆ କାହାଣୀ ଆମେ ଶୁଣିଲୁ । ବାସ୍ତବରେ ଜବତ ହୋଇଥିବା ଟଙ୍କାର ପରିମାଣ ବିଷୟରେ ଗଣମାଧ୍ୟମକୁ କେହି କିଛି କହିନଥିଲେ । ଏହା ଏକ କାଳ୍ପନିକ ସଂଖ୍ୟା ଥିଲା ଓ ସେହି କାଳ୍ପନିକ ସଂଖ୍ୟା ଧାରା ପଡିଯିବା ପରେ ଗଣମାଧ୍ୟମ ପୁଣି ନୂଆ କାହାଣୀ ଗଢିବା ଆରମ୍ଭ କରିଥିଲା ।
୩. ଜବତ ହୋଇଥିବା ନଗଦ ଭିତରେ ଏକ କୋଟି ମୂଲ୍ୟର ଜାଲି ନୋଟ ରହିଥିଲା ବୋଲି ଆଉ ଏକ ଚାଞ୍ଚଲ୍ୟକର ଖବର କେତୋଟି ନିର୍ଦ୍ଦିଷ୍ଟ ଗଣମାଧ୍ୟମ ପ୍ରକାଶ କରିଥିଲେ । ଜାଲି ନୋଟ କାରବାର ଏକ ସଙ୍ଗୀନ ଅଭିଯୋଗ । ସେମିତି କିଛି ଘଟିଥିଲେ ଏହାକୁ ତୁରନ୍ତ ପୁଲିସକୁ ଅନୁସନ୍ଧାନ ପାଇଁ ଦିଆଯାଇଥାନ୍ତା ଓ ଅଭିଯୁକ୍ତଙ୍କୁ ଅବିଳମ୍ବେ ଗିରଫ କରାଯାଇଥାନ୍ତା । ତେଣୁ ଏ ସମ୍ପର୍କିତ ଖବର ମଧ୍ୟ ଗଣମାଧ୍ୟମର ଏକ ଗାଲୁଗପ ଥିଲା ।
୪. ଆୟକର ବିଭାଗର ଚଢାଉ ପଛରେ କରଫାଙ୍କି ଅପେକ୍ଷା ରାଜନୀତିର ପ୍ରଭାବ ଯେ କେତେ ଅଧିକ ତାହା ଜାଣିବା ଜରୁରୀ । ଡିଏନ ଗୃପର ଅଧ୍ୟକ୍ଷ ଜଗଦୀଶ ପ୍ରସାଦ ନାୟକ ଶାସକ ବିଜେଡି ଦଳର ଜଣେ ସଭ୍ୟ ଓ ସେ କେନ୍ଦ୍ରାପଡା ଲୋକସଭା ଆସନ ଲାଗି ଆଶାୟୀ ପ୍ରାର୍ଥୀ ବୋଲି ଗତ କିଛି ବର୍ଷ ହେଲା ଚର୍ଚ୍ଚା ଚାଲିଥିଲା । କେନ୍ଦ୍ରାପଡାରେ ବିଜେପିର ପ୍ରାର୍ଥୀ ଏହାକୁ ନେଇ ଆତଙ୍କିତ ହେବା ସ୍ଵାଭାବିକ । ଆୟକର ଚଢାଉ ପରେ କେନ୍ଦ୍ରାପଡାର ପୂର୍ବତନ ସାଂସଦଙ୍କ ମାଲିକାନାରେ ଥିବା ଗଣମାଧ୍ୟମ ଏ ପ୍ରସଙ୍ଗରେ ସବୁଠୁ ଅଧିକ ଗାଲୁଗପ ପ୍ରଚାର କରିବା ଆରମ୍ଭ କରିଥିଲା ।
୫ ଗୋଟେ ପକ୍ଷରେ ବିଜେପି ତରଫରୁ ଜଗଦୀଶ ନାୟକଙ୍କ ଉପରେ ଆକ୍ରମଣ ଅବ୍ୟାହତ ରହିଥିବା ବେଳେ ବିଜେଡ଼ିର ଏକ ନିର୍ଦ୍ଦିଷ୍ଟ ଗୋଷ୍ଠୀ ମଧ୍ୟ ଏହି ଆକ୍ରମଣରେ ଅସ୍ଵାଭାବିକ ଭାବରେ ସାମିଲ ହୋଇଛନ୍ତି । ଏହା ପୂର୍ବରୁ “ବଣିକ” ଭଳି କିଛି ବ୍ୟବସାୟ ପ୍ରତିଷ୍ଠାନରେ ଆୟକର ବିଭାଗର ଚଢାଉ ବେଳେ ଆମ ଗଣମାଧ୍ୟମ ପ୍ରାୟତଃ ଚୁପ ଥିବା ବେଳେ ଡିଏନ ଗୃପ ବେଳକୁ ମାତ୍ରାଧିକ ସକ୍ରିୟ ହେବା ଆଶ୍ଚର୍ୟକର ମନେ ହେଉଛି ।
୬.. ଆୟକର ଚଢାଉ ଓ ଟିକସ ଫାଙ୍କି ଫୌଜଦାରୀ ଅପରାଧ ନୁହେଁ । ଆୟକର ବିଭାଗ ଟିକସ ଫାଙ୍କି ଅଭିଯୋଗ ଆଣିଲା ପରେ ଅଭିଯୁକ୍ତ କରଦାତା ଏହା ବିରୋଧରେ ବିଭିନ୍ନ ଟ୍ରିବ୍ୟୁନାଲ ଏବଂ ଅଦାଲତରେ ଅପିଲ କରିପାରିବେ । ସୁପ୍ରିମକୋର୍ଟ ରେ ଏହାର ଚୂଡାନ୍ତ ଫଇସଲା ହେବ । ଅନେକ ସମୟରେ ଆୟକର ବିଭାଗ ଏବଂ ଅଭିଯୁକ୍ତଙ୍କ ମଧ୍ୟରେ ବୈଧାନିକ ଭାବରେ ଆପୋଷ ବୁଝାମଣାର ସମ୍ଭାବନା ମଧ୍ୟ ରହିଛି । ଏହା ଏକ ଜଟିଳ ଓ ଦୀର୍ଘ ଆଇନଗତ ପ୍ରକ୍ରିୟା । ତାକୁ ନବୁଝି ଗଣମାଧ୍ୟମରେ ଆମର ସାମ୍ବାଦିକମାନେ ହଠାତ ବିଚାରପତି ସାଜି ଜଗଦୀଶ ନାୟକଙ୍କୁ ପଳାତକ ଓ ଅପରାଧୀ ବୋଲି ଘୋଷଣା କରି ସାରିଛନ୍ତି ।
୭ ରାଜନୈତିକ ଅଭିଳାଷ ଓ ପ୍ରତିଯୋଗିତା ପାଇଁ ଏଠି ସତ୍ୟ ତଥା ତଥ୍ୟକୁ ବଳି ପକାଇ ଗଣମାଧ୍ୟମକୁ ମୋହରା ଭାବରେ ବ୍ୟବହାର କରାଯାଉଛି ।
ବ୍ୟବସାୟ କରିବା ପାପ ନୁହେଁ, କିନ୍ତୁ ବ୍ୟବସାୟ ନାମରେ କର ଫାଙ୍କିବା ମଧ୍ୟ ନୈତିକତା ନୁହେଁ । ଡିଏନ ଗୃପ ଯଦି କର ଫାଙ୍କିଥାନ୍ତି ତାଙ୍କଠାରୁ ଏଥିପାଇଁ ଯଥା ସମୟରେ ଜରିମାନା ଆଦାୟ ହେବ । ତେବେ ଏହା କୌଣସି ଅପରାଧୀ ମାମଲା ନୁହେଁ ।
