ସମଦୂରତା ନା ବିଜେଡ଼ିର ରାଜନୈତିକ ଆତ୍ମହତ୍ୟା ?

ଦିଲ୍ଲୀର ନିର୍ବାଚିତ ସରକାର ହାତରୁ ସରକାରୀ କର୍ମଚାରୀଙ୍କ ନିଯୁକ୍ତି ଓ ବଦଳି ଅଧିକାର ଛଡାଇ ଆଣିବା ଲାଗି ଯେଉଁ ବିଲ ସଂସଦରେ ଆଗତି ହୋଇଥିଲା ତାହାର ସମର୍ଥନରେ କହୁଥିବା ବେଳେ ଲୋକସଭାରେ ପିନାକୀ ମିଶ୍ର ଏବଂ ରାଜ୍ୟସଭାରେ ସସ୍ମିତ ପାତ୍ରଙ୍କୁ ଏକପ୍ରକାର ଲୋକହସା ହେବାକୁ ପଡିଥିଲା । ବିଜୁ ଜନତା ଦଳ ଉଭୟ କଂଗ୍ରେସ ଏବଂ ବିଜେପିଠାରୁ ସମଦୂରତା ଅବଲମ୍ବନ କରୁଛି ବୋଲି ସାଂସଦ ଦ୍ୱୟ କହିବା ବେଳେ ପୂରା ସଂସଦ ହୋ ହୋ ହୋଇ ହସିଥିଲା । “ସମଦୂରତା” ବିଜେଡି ପାଇଁ ଏବେ “ଆତ୍ମ ସମର୍ପଣ” ପାଲଟି ସାରିଛି । ବିଜେପି ଏବଂ ନରେନ୍ଦ୍ର ମୋଦୀ ସରକାରଙ୍କ ସବୁ ଜନବିରୋଧୀ ପଦକ୍ଷେପ ସପକ୍ଷରେ ଠିଆ ହୋଇ ବିଜେଡି ନିଜକୁ “ବିଜେପିର ଲାଞ୍ଜ” ଭାବରେ ଏକାଧିକ ଥର ପ୍ରମାଣିତ କରିସାରିଛି । ବିଜେପିକୁ ସମର୍ଥନ କରିବା ଲାଗି ବିଜେଡି ଭିନ୍ନ ଭିନ୍ନ ସମୟରେ କେବଳ ବାହାନା ଖୋଜିଛି ।  ୨୦୧୯ ପରଠୁ ବିଜେଡିର ଏକମାତ୍ର ନୀତି ହେଉଛି, ମୋଦୀ ସରକାରର ବୋଲକରା ଭାବରେ ସବୁକଥାରେ ହଁ ମାରିବା ।  ତେବେ ବିଜେପି ପାଖରେ ବିଜେଡ଼ି ଆତ୍ମସମର୍ପଣ କରିବାର କାରଣ କଣ ?

ରାଜନୈତିକ ଭାବରେ ଆଜି ମଧ୍ୟ ରାଜ୍ୟରେ ବିଜେଡ଼ିର ଲୋକପ୍ରିୟତା ଅକ୍ଷୁଣ୍ଣ ରହିଛି ଓ ନବୀନ ପଟ୍ଟନାୟକ ସରକାର ବିରୋଧରେ ସେମିତି କିଛି ଜନମତ ନାହିଁ । ପଞ୍ଚାୟତ ଏବଂ ନଗରପାଳିକା ନିର୍ବାଚନରେ ବିଜେଡି ବିଜେପିକୁ ସଂପୂର୍ଣ୍ଣ ଭାବରେ ପରାଜିତ କରିଛି । ତା ସତ୍ତ୍ୱେ ହଠାତ ବିଜେଡି ନିଜକୁ ବିଜେପିର ଲାଞ୍ଜ ଭାବରେ ଉପସ୍ଥାପିତ କରିବାର କାରଣ କଣ ? ନବୀନ ପଟ୍ଟନାୟକ ବିଜେପିକୁ ସତରେ ଭୟ କରୁଛନ୍ତି ନା ନବୀନଙ୍କ ପ୍ରତି ବିଜେପି ମାତ୍ରାଧିକ ଆସକ୍ତ ହୋଇପଡିଛି ? ବିଜେପି ପାଇଁ ୨୦୨୪ ନିର୍ବାଚନରେ କିଛି ସହଯୋଗୀ ନିତାନ୍ତ ଆବଶ୍ୟକ । ସେଥିପାଇଁ ବିଜେପି ନବୀନଙ୍କୁ ନିଜପାଖରେ ରଖିବାକୁ ଚେଷ୍ଟା କରିବା ସ୍ଵାଭାବିକ । ହେଲେ ବିଜେଡ଼ି ପାଇଁ ବିଜେପିର ସମର୍ଥନ କେଉଁଠି ଦରକାର ?

• ବିଜେଡି ସରକାରର ଏମିତି କିଛି ଘୋଟାଲା ଅଛି କି ଯାହାକୁ ଦେଖାଇ କେନ୍ଦ୍ର ସରକାର ବିଜେଡି ନେତୃତ୍ବକୁ ଚାପରେ ରଖୁଛନ୍ତି ?
• ନବୀନ ପଟ୍ଟନାୟକଙ୍କର ବୟସାଧିକ୍ୟ ଯୋଗୁଁ ଦଳ ସଠିକ ରାଜନୈତିକ ନିର୍ଣ୍ଣୟ ନେବାରେ ଅକ୍ଷମ ହୋଇପଡୁଛି କି ?
• ଆଗାମୀ ସାଧାରଣ ନିର୍ବାଚନରେ ବିଜେପି ପାଇଁ ୧୦/୧୧ ଆସନ ବିଜେପି ପାଇଁ ଛାଡି ଦେବାକୁ ବିଜେପି ସହିତ ବିଜେଡି ଡିଲ କରିଛି କି ?
• ସଂସଦରେ ବିଜେଡ଼ିର ସଂଖ୍ୟା ନ ରହିଲେ, କେନ୍ଦ୍ର ସରକାରରେ ଏହାର କୌଣସି ଗୁରୁତ୍ଵ ରହିବ ନାହିଁ । ଲୋକସଭାରେ ବିଜେପିକୁ ଅଧାରୁ ଅଧିକ ଆସନ ଛାଡିଦେବା ବିଜେଡି ପାଇଁ ଏକପ୍ରକାର ରାଜନୈତିକ ଆତ୍ମହତ୍ୟା ହେବ ନାହିଁ କି ?
• ନବୀନ ପଟ୍ଟନାୟକଙ୍କର ଶାରୀରିକ ଦୁର୍ବଳତାର ଫାଇଦା ଉଠାଇ ବିଜେପି ସହିତ ନିଜର ରାଜନୈତିକ ଭବିଷ୍ୟତ ପାଇଁ ଅନ୍ୟ କେହି ଉଦ୍ୟମ ଆରମ୍ଭ କରୁଛି କି ?

ବିଜେଡି-ବିଜେପିର ଏଇ ନୂଆ ସମ୍ପର୍କ ଏମିତି ଅନେକ ରାଜନୈତିକ ପ୍ରଶ୍ନ ଠିଆ କରିଛି, ଯାହାର ଉତ୍ତର ପାଇବା ଏତେ ସହଜ ନୁହେଁ । ରାଜ୍ୟରେ ବିଜେପି ସଂଗଠନକୁ ବଳି ପକାଇ ବିଜେଡି ସହିତ ବିଜେପି କେନ୍ଦ୍ରୀୟ ନେତୃତ୍ଵର ଏହି ସମ୍ପର୍କ ପଛରେ ଏକ ଭିନ୍ନ ଉଦ୍ଦେଶ୍ୟ ଅବଶ୍ୟ ରହିଛି । ନବୀନ ପଟ୍ଟନାୟକଙ୍କୁ ବିଜେପି ନିଜ ସପକ୍ଷରେ ରଖିବାକୁ ପ୍ରରୋଚିତ କରି ଜାତୀୟ ରାଜନୀତିରେ ତାଙ୍କୁ ପ୍ରଥମଥର ଲାଗି ଅପଦସ୍ତ କରାଯାଇଛି । ଏହା ପୂର୍ବରୁ ନବୀନଙ୍କୁ ସବୁ ରାଜନୈତିକ ପକ୍ଷ ସମ୍ମାନ କରୁଥିଲେ। ହଠାତ ସେ ବିଜେପିର ଲାଞ୍ଜ ହେବାର ନିଷ୍ପତ୍ତି ନେବା ପରେ, ତାଙ୍କୁ ଜାତୀୟ ସ୍ତରରେ ନିନ୍ଦିତ ହେବାକୁ ପଡିଛି । ନବୀନଙ୍କ ପ୍ରତି ଜାତୀୟ ସ୍ତରର ବିରୋଧୀ ନେତାମାନେ କଟାକ୍ଷ କରିବା ଆରମ୍ଭ କଲେଣି । ଜଣେ ଶକ୍ତିଶାଳୀ ଓ ସ୍ଵାଧୀନ ରାଜନେତା ଭାବରେ ନବୀନଙ୍କର ପୁରୁଣା ଭାବମୂର୍ତ୍ତି ହଠାତ ବିଜେପିର “ଚିୟର ଲିଡର” ସ୍ତରକୁ ଖସି ଆସିଛି । ସେ ଏବେ ଅମିତ ଶାହାଙ୍କ ଇସାରରେ ନାଚୁଛନ୍ତି ବୋଲି ଏକ ବାର୍ତ୍ତା ଲୋକଙ୍କ ଭିତରେ ପହଞ୍ଚିବା ଆରମ୍ଭ କରିଛି । ଏହି ବାର୍ତ୍ତା ନବୀନ ଓ ବିଜେଡି ପାଇଁ ଆତ୍ମଘାତୀ ସାବ୍ୟସ୍ତ ହୋଇପାରେ ।