ଦେଶର ରଙ୍ଗ
ବେଦପ୍ରକାଶ ନାୟକ
0
70
ଏବେ ଏବେ କମଳା ରଙ୍ଗ ଦିଶୁଥିବା ମୋ ଦେଶ
କେବେ ଦିନେ ସୁନାରଙ୍ଗର ଥିଲା...
ସୁନାର ରଙ୍ଗ ଦେଉଥିବା କିଛି କାରିଗର
ଏବେ ରାସ୍ତାରେ ...
ଦେହର ଲାଲ ରଙ୍ଗ ବୁହାଇବାରେ ବ୍ୟସ୍ତ।
ଲିଭିଯାଇଥିବା ନିଆଁ ର ରଙ୍ଗ
ଏବେ ଧୀରେଧୀରେ ଆଉଟା ହେଉଛି -
ଜାତି ଧର୍ମର ଆଞ୍ଚରେ /
କେହି ଜଣେ ଅବିରତ ଫୁଙ୍କି ଦେଉଛି
ମନ୍ଦିରର ଧ୍ୱନିରେ ତ ମସଜିଦର ଅଜାନରେ।
ଦେଖ ! ମାଟିର ରଙ୍ଗକୁ ଦେଖ
ଧୀରେ ଧୀରେ ଲାଲ ପଡୁଥିବା
ଶୁଖିଲା ହସକୁ ତାର ଦେଖ
ସମସ୍ୟା ହିଁ ସୁଜଳା ସୁଫଳା ଶ୍ୟାମଳା
ହେଉଛି ଦେଖ ।
କେଉଁ ରଙ୍ଗ କଥା କହୁଛ ତୁମେ
କାଣି ଆଙ୍ଗୁଠିରେ କଳା ରଙ୍ଗ ବୋଳି
ମୁଁ ଯାହାକୁ ଉଜ୍ବଳ ଭାବୁଛି
ସେ ବୋଳିଦେବନି ତ ମୋ ଦେଶ ମୁହେଁ କଳା !!
କପାଳରେ ଅନେକ କୁଂଚ ଅଛି
ତଥାପି ସବୁ କ୍ଷତରେ ରଙ୍ଗ ମାରି
ଇନ୍ଦ୍ରଧନୁଟିଏ କରିଛି
ମୋ ଦେଶ ହସୁଛି।।
