ଦିଲ୍ଲୀ ନଗର ପାଳିକା ନିର୍ବାଚନ ନା ମାଫିଆ ୱାର !!

ଗତ ସତୁରୀ ବର୍ଷ ଭିତରେ ଭାରତୀୟ ଗଣତନ୍ତ୍ର ବହୁ ଲଜ୍ଜାଜନକ ଘଟଣା ଓ ଦୃଶ୍ୟର ମୁକସାକ୍ଷୀ । ସଂସଦ ଏବଂ ବିଧାନସଭା ଭିତରେ ମାଡ ମରାମରି ହେବା, ମାଇକ ଭାଙ୍ଗିବା ଭଳି ବହୁ ଅସଭ୍ୟ ଆଚରଣ ଆମେ ଆମର ମାନ୍ୟବର ଲୋକ ପ୍ରତିନିଧିମାନଙ୍କ ଭିତରେ ଦେଖିଛୁ । ଗଣତନ୍ତ୍ରର ମନ୍ଦିର ବୋଲି କୁହା ଯାଉଥିବା ଏହି ସବୁ ଅନୁଷ୍ଠାନରେ ସବୁଠୁ ବଡ ଅପରାଧ ଘଟୁଥିବାର ଆମେ ଆମ ଆଖି ଆଗରେ ଦେଖି, ତାକୁ ସହ୍ୟ କରିଚାଲିଛୁ । ଯେଉଁମାନେ ଆଇନର ନିର୍ମାତା ସେମାନେ ଯଦି ସ୍ଵୟଂ ବେଆଇନ କାମ କରିବେ, ତେବେ ସେମାନଙ୍କୁ ରୋକିବ କିଏ ? ସଂସଦୀୟ ଇତିହାସରେ ଆଗରୁ ଯେତେସବୁ ଏମିତି ଘଟଣା ଘଟିଛି, ତାକୁ ନେଇ ଗଣମାଧ୍ୟମରେ ଲୋକ ପ୍ରତିନିଧିମାନଙ୍କୁ ପ୍ରଚୁର ହଟହଟା କରାଯାଇଛି । ଆଗରୁ ଏହାକୁ ନିର୍ଲଲଯତା ବୋଲି କୁହା ଯାଉଥିଲା । ଅବିକା କିନ୍ତୁ ଏ ପ୍ରକାର ଅପରାଧୀମୂଳକ ଆଚରଣକୁ ରାଜନୈତିକ ଆବଶ୍ୟକତା ବୋଲି କୁହାଯାଉଛି ।

ଗତ କିଛି ଦିନ ହେଲାଣି ଦିଲ୍ଲୀ ମହାନଗର ନିଗମରେ ଯାହା ସବୁ ଘଟୁଛି, ତାକୁ ଦେଖିଲେ ଆମେ ଯେ ଏକ ଗଣତାନ୍ତ୍ରିକ ଦେଶର ନାଗରିକ ଏ କଥା ବିଶ୍ଵାସ କରି ହେଉନାଇଁ । ମହାନଗର ନିଗମ ନିର୍ବାଚନ ପରେ ଅଗଣତାନ୍ତ୍ରିକ ଉପାୟରେ କ୍ଷମତା ଦଖଲ ଲାଗି ବିଜେପି ଯେଉଁ ସ୍ତରର ରାଜନୀତି କରୁଛି, ତାହା କେବଳ ଅପରାଧୀ ରାଜନୀତି ବ୍ୟତୀତ ଆଉ କିଛି ନୁହଁ । ସାମ୍ବିଧାନିକ ପଦରେ ରହିଥିବା ଉପ ରାଜ୍ୟପାଳ ଖୋଲାଖୋଲି ଆଇନ ଓ ସମ୍ବିଧାନର ଉଲ୍ଲଂଘନ କରି ନିଜ ଦଳର ପ୍ରାର୍ଥୀଙ୍କୁ ଜିତାଇବାକୁ ଉଦ୍ୟମ କରିଥିଲେ । ଦିଲ୍ଲୀ ନଗରପାଳିକାର ନିର୍ବାଚନ ଆଜି ସାରା ଦେଶରେ ସବୁଠୁ ବଡ ଅପରାଦ୍ଧମୂଳକ ନାଟକ ଭଳି ଦେଖା ଯାଉଛି । ଲୋକଙ୍କ ଦ୍ଵାରା ନିର୍ବାଚିତ ପ୍ରତିନିଧିମାନେ ବାରମ୍ବାର ଗୁଣ୍ଡାଙ୍କ ଭଳି ଆଚରଣ କରୁଛନ୍ତି ।

ଦିଲ୍ଲୀ ନଗର ନିଗମ ନିର୍ବାଚନରେ ସେଠିକାର ଶାସକ ଦଳ ଆମ ଆଦମୀ ପାର୍ଟି ସ୍ପଷ୍ଟ ଭାବରେ ବହୁମତ ପାଇ ଜିତିଛି । ଗଣତନ୍ତ୍ରରେ ବିଜୟୀ ଦଳକୁ କ୍ଷମତା ଛାଡି ଦେବା ପରାଜିତ ଦଳର କର୍ତ୍ତବ୍ୟ । ହେଲେ କ୍ଷମତା ମୋହରେ ଅନ୍ଧ ବିଜେପି କ୍ଷମତାରେ ରହିବାକୁ ଉପରାଜ୍ୟପାଳଙ୍କୁ ଦଳୀୟ ଏଜେଣ୍ଟ ଭଳି ବ୍ୟବହାର କରୁଛି । ସବୁ ଆଇନ ଓ ସମ୍ବିଧାନକୁ ଅବମାନନା କରି ଦିଲ୍ଲୀ ଉପ ରାଜ୍ୟପାଳ ମେୟର ନିର୍ବାଚନରେ ମନୋନୀତ ସଦସ୍ୟମାନଙ୍କୁ ଭୋଟ ଦେବାର ଅଧିକାର ଦେଲେ । ଏହାକୁ ସୁପ୍ରିମକୋର୍ଟ ସ୍ପଷ୍ଟ ଭାବରେ ବେଆଇନ ଘୋଷଣା କଲେ । ସୁପ୍ରିମ କୋର୍ଟଙ୍କ ରାୟ ପରେ ମଧ୍ୟ ବିଜେପି ଆପ ହାତରୁ କ୍ଷମତା ଛଡାଇ  ଆଣିବାକୁ ବିଭିନ୍ନ ଉପାୟରେ ଉଦ୍ୟମ କରୁଛି ।

ସବୁଠୁ ଲଜ୍ଜା ଏବଂ ଦୁର୍ଭାଗ୍ୟର ବିଷୟ ହେଉଛି, ବାରମ୍ବାର ନଗରପାଳିକା ବୈଠକରେ ନିର୍ବାଚିତ ପ୍ରତିନିଧିମାନେ ନିକୁଷ୍ଟ ସ୍ତରର ଗୁଣ୍ଡାଙ୍କ ଭଳି ଆଚରଣ ପ୍ରଦର୍ଶନ କରୁଛନ୍ତି । ଅତି ସ୍ଵାଭାବିକ ଭାବରେ ସେମାନେ ମାରପିଟ ହେବା ସହିତ ଲୋକଙ୍କ ସମ୍ପତ୍ତି ଭଙ୍ଗାରୁଜା କରୁଛନ୍ତି । ଏହାକୁ ବିଜେପି ତରଫରୁ ନିଜର ଅଧିକାର ବୋଲି କୁହା ଯାଉଛି ଓ ବିଜେପିକୁ ସାମ୍ନା କରିବାକୁ ହେଲେ ଆପ ମଧ୍ୟ ସମାନ ଆଚରଣ ଦେଖାଇବାକୁ ବାଧ୍ୟ ବୋଲି ଯୁକ୍ତି କରା ଯାଉଛି । ଲାଗୁଛି, ଏହା କୌଣସି ନଗର ପାଳିକା ନିର୍ବାଚନ ନୁହଁ, ବରଂ ମାଫିଆ ଯୁଦ୍ଧ । ସିନେମାରେ ଆମେ ଅନେକ ମାଫିଆ ଯୁଦ୍ଧ ଦେଖିଛୁ । ସେସବୁ ତୁଳନାରେ ଦିଲ୍ଲୀର ଏମସିଡି ନିର୍ବାଚନ ଅଧିକ ରୋମାଞ୍ଚକର ଓ ଅଧିକ ଅସଭ୍ୟ ।

ଏ ପ୍ରସଙ୍ଗ ଏକାଧିକ ବାର ସୁପ୍ରିମକୋର୍ଟରେ ମଧ୍ୟ ଉଠିଛି । ମାନ୍ୟବର ସୁପ୍ରିମକୋର୍ଟ ଏ ସମ୍ପର୍କରେ ନିଜ ତରଫରୁ ବିଚାର କରିବା ଉଚିତ ହୁଅନ୍ତା ।  ଗଣତନ୍ତ୍ରରେ ଜନମତକୁ ସୁରକ୍ଷା ଦେବା ସୁପ୍ରିମକୋର୍ଟଙ୍କ ବଡ ଦାୟିତ୍ଵ । ହେଲେ ସର୍ବୋଚ୍ଚ ଅଦାଲତ ଏ ପ୍ରସଙ୍ଗରେ ଆଖି ବୁଜି ବସିଛନ୍ତି ।  ନିର୍ବାଚିତ ସରକାର ଉପରେ ହାକିମାତି ଦେଖାଇବାର ଅଗଣତାନ୍ତ୍ରିକ ପ୍ରକ୍ରିୟା ବିରୋଧରେ ସୁପ୍ରିମକୋର୍ଟ ନୀରବ ରହିବାର ଭୟାନକ ପରିଣତି ଏ ଦେଶର ଗଣତନ୍ତ୍ର ଓ ସମ୍ବିଧାନର ଶାସନକୁ ଇ ଭୋଗିବାକୁ ପଡିବ ।